HUT SAITUN GBKP
Pdt. Larena br. Sinuhadji (Nd. ReyRapha Tarigan)
Si Man Ogen : Kejadin 46:28-34
Tema : JADI KERIAHEN ORANG TUA
Tujun : Gelah Moria :
- Ngidah kemalemen ate Jakup arah perbahanen Jusup
- Nggejapken maka keriahen e me kap engkelengi ras mpehaga orang tua
Metode PA : Diskusi & Aksi
Penaruh
I bas budayanta Indonesia lit piga-piga kisah legenda si nuriken kerna anak si durhaka man orang tuana. I daerah Sumatera Barat lit kisah “Malin Kundang”. I daerah Aceh lit kisah “Hikayat Amat Rhang Manyang”. I daerah Mandailing Natal lit kisah “Sampuraga”. Teluna kisah legenda enda banci idaramindu i Google. Tapi intina teluna nuriken kerna anak si la ngehamati orang tuana. I bas PA-ta sendah, amin pe enggo Moria, iajuk kita guna tetap erlajar jadi anak-anak si hormat nandangi orang tuata, jadi kebanggaan entah pe jadi keriahen orang tua.
Mpebagesi Kata Dibata
Turi-turin kerna Jakup ras Jusup akap kami enggo rusur sibegi. Jusup e me anak Jakup arah Rahel ndeharana si peduaken. Lit dua anak Jakup arah Rahel nari e me Jusup ras Benyamin, duana jadi anak-anak si ikelengi Jakup asangken anak-anak si debanna. Lit 12 anak Jakup si jadi 12 suku Israel, itambah sekalak anak diberu si tergelar Dina. Erkiteken perlakuan istimewa Jakup man Jusup erbahanca senina-senina Jusup cemburu. Akibat kecemburuan senina-senina Jusup, idayaken senina-seninana Jusup seh makana Jusup lit i negara Mesir. Erkiteken perkuah ate Dibata Jusup iangkat jadi orang nomor dua i Mesir, nampati Firaun i bas menanggulangi bencana kelihen.
Erkiteken bencana kelihen melanda seluruh negara paksa si e, isuruh Jakup anak-anakna berkat ku Mesir guna nukur pangan-pangan. Sebab Mesir ngenca si la kena bencana kelihen paksa si e, erkiteken kepentaren Jusup mengelola hasil panen bangsa Mesir. Kenca enggo ndekah la jumpa, jumpalah Jusup ras senina-seninana i Mesir. Kenca enggo jumpa ras senina-seninana, Jusup labo membalas dendam, enggo ialemina perbahanen senina-seninana si jahat man bana janah ibabana kerina keluargana Israel nari ku Mesir. Ogenta sendah nuriken kerna proses kepindahan Jakup ras kerina keluarga anak-anakna, i Israel nari ku Mesir. Kai saja si ilakoken Jusup selaku anak si mehuli nandangi orang tuana Jakup i bas ogenta sendah?
Adi sioge benaken ay. 1 nari bindu 46, teridah maka Jusup makeken kerina si lit i bas ia, baik erta kebayakenna bage pe kekuasaan jabatenna (ay. 5), guna membahagiaken bapana Jakup, bagepe kerina seninana rikut keluargana si enterem. Adi rikutken perikopta sendah, enggo isikapken Jusup ingan i Gosen guna iingani Jakup bapana ras kerina seninana rikut keluargana si enterem (ay. 28-29). Bagepe alu kuasa si lit i bas ia, ijamin Jusup profesi bapana ras senina-seninana sebage permakan si ngasuhi asuh-asuhen, padahal profesi e termasuk si ilarang i Mesir (ay. 31-34).
Pengkenaina
Tema si seh man banta i bas PA Moriata sendah e me “Jadi Keriahen Orang Tua” alu tujun gelah Moria ngidah kemalemen ate Jakup arah perbahanen Jusup ras gelah Moria nggejapken maka keriahen e me kap engkelengi ras mpehaga orang tua. PA-ta sendah i bas rangka HUT Saitun (Lansia) GBKP si pe-8-ken.
Versi audio klik https://www.youtube.com/watch?v=zvIEWoul3hM
Melala hal konkrit si banci silakoken dalam rangka engkelengi ras mpehaga orang tuanta. Si pemena lebe, selaku anak/Moria patut kita ngataken bujur ibereken Tuhan kesempaten ndekah er-orang tua. Kesempaten man banta guna tole ngkelengi ras mpehaga orang tuanta. Kesempaten guna ngadep-ngadep orang tuanta. Emaka patut kita ngataken bujur.
Si peduaken, asa gegeh ras kengasupenta si lit, tetap si mperdiateken kebutuhen orang tuanta. Adi inganta ndauh sirang, rusur siteleponi, mpersingeti guna tetap jaga kesehatan, tetap ertoto man Tuhan, ula lupa man, rsd. Bereken belanjana rikutken gegehta, rsd.
Si peteluken, tetap sijaga kiniersadan arihta sebage erturang ersenina, alu nggeluh sisampat-sampaten. La sidalih-dalihen i bas ngkelengi orang tuanta. Siinget, orang tuanta, subuk lengkap denga ndube entah tading sekalak ngasup ipekena-kenana kita anak-anakna, ididong-doahkenna, itegu-teguna, sekolahkenna, rsd. Genduari waktuna kita negu-negu orang tuanta, nulangisa, njagaisa, mperidisa, notoken ia gelah malem atena nggeluh. Dibata si mpengasup kita engkelengi ras mpehaga orang tuata.
Tidak ada komentar:
Posting Komentar