SUPLEMEN PA MORIA GBKP TGL. 26 MARET - 1 APRIL 2023

Pdt. Larena br. Sinuhadji (Nd. ReyRapha Tarigan)

Ogen : 1 Kronika 17:16-18

Tema : ITANDAI DINGEN IPEHAGA TUHAN (Pengenalan Tentang Moria) 

Tujun : Gelah Moria :

- Meteh kuga Daud nggejapken Tuhan mpetunggung ia ras keluargana

- Nandai dirina i adep-adepen Tuhan lako pemuliakenca

Metode : Meditasi

Penaruh

Lit peribahasa si ngatakenca “Tak kenal maka tak sayang”. Si rusur sipahani kita kerna erti peribahasa enda e me, adi lenga sitandai seseorang maka la lit perhatianta man bana. Tapi lit erti si akap kami lebih mbages, kenalilah dengan baik orang-orang yang hadir dalam hidup kita, maka kita akan memahami makna kehadiran mereka dalam hidup kita. Lit tingkaten-tingkaten i bas nandai entah pe mengenal seseorang. Butuh proses si labo kentisik guna kita nandai seseorang secara mendalam. 

Mpebagesi Kata Dibata

Ogenta lit i teruh judul “Daud ertoto ngataken bujur man Dibata”. Guna lebih memahami konteks pertoton Daud enda, mari radu ras sioge perikop sebelumna. I bas perikop sebelumna alu judul “Pedah Natan man Daud” ituriken maka kenca Daud ringan i bas istana si mbaru denga ipajekkenna, ngerana Dibata man Daud erkelangken Nabi Natan. Lit telu hal penting si ipeseh Dibata man Daud. Si pemena, labo Daud pagi si majekken Rumah Pertoton, tapi kesusurenna. Si peduaken, kerina si enggo icapai Daud i bas pemerentahenna, benaken ia jadi raja nggantiken Saul, e me bekas pengarak-ngarak Dibata. Si peteluken, kesusuren Daud pagi si nggantiken Daud jadi raja janah kerajanna tetap paguh, sebab Dibata si njagasa ras ngarak-ngaraksa.

Kenca enggo ibegi Daud Kata Dibata erkelangken Nabi Natan, lawes Daud ku Kemah Perjumpan guna ertoto man Dibata. Rikutken ogenta sendah lit telu hal si banci radu ras sirenungken. Si pemena, ay. 16, sebage raja si baru denga nggantiken Saul, igejapken Daud maka ia ras keluargana situhun la metunggung ngaloken kai si enggo ibahan Dibata man bana. Si peduaken, ay. 17, Daud muji padan Dibata man kesusurenna, amin pe ndauh denga padan e bakal igenepi Dibata, janah situhuna terlalu dini bagi Daud guna meteh maka labo ia si bakal majekken Rumah Pertoton i tengah-tengah bangsa Israel. Si peteluken, secara tersirat Daud ngataken bujur man Dibata erkiteken itandai Dibata dirina janah amin pe enggo itandai Dibata dirina tetap denga ipehaga Dibata. I bas telu hal ndai, teridah kiniterukken ukur Daud i lebe-lebe Dibata. Patuh ia nandangi ketetapen Dibata, sebab yakin Daud erkiteken itandai Dibata dirina, maka si terbaik si bakal ibereken Dibata man bana bage pe kesusurenna.

Pengkenaina

Tema i bas PA-ta sendah e me “Itandai dingen ipehaga Tuhan” alu tujun gelah Moria meteh kuga Daud nggejapken Tuhan mpetunggung ia ras keluargana. Janah gelah Moria nandai dirina i adep-adepen Tuhan lako pemuliakenca. Alu metode meditasi. PA-ta sendah i bas rangka pengelanan tentang Moria.

Selaku kalak si tek man Dibata i bas Yesus Kristus, enggo ipetunggung Dibata kita ras kerina kalak si tek i belang-belang doni enda. Tergejap entah lang maka kerina kita kalak si tek enggo ipetunggung Dibata? Arah kerina pasu-pasu (berkat) si enggo sialoken sedekah geluhta seharusna labo mesera guna nggejapken maka enggo ipetunggung Dibata kita guna ngaloken kerina pasu-pasu ndai.

Versi audio klik : https://www.youtube.com/watch?v=JFH_Q-H2ok0

Arah tujun si peduaken iajuk kita Moria guna nandai dirinta lebih dalam lagi i adep-adepen Dibata. Tentu hal si pemena si igejapken kita, bagi Daud, labo metunggung kita ngaloken kerina pasu-pasu Dibata i bas geluhta, erkiteken sitandai ise dirinta manusia berdosa. I bas si e, harus kita mengucap syukur dan memuji Tuhan senantiasa. Si peduaken, harus siakui maka kita enda manusia si lemah, si murah ndabuh ku bas hal-hal si la ngena ate Dibata. Emaka i bas si e, kita sangat membutuhkan penampat i bas Dibata nari guna mpegegehi kita. Sipindolah gegeh i bas Dibata nari arah pertotonta.

Terakhir, kerna pengenalan tentang Moria secara kelembagaan. Bagi kata penaruh i datas, agar lembaga Moria ini lebih bermakna kehadirannya dalam hidup kita, marilah sioge mulihi sejarah terbentuknya Lembaga Kategorial Moria, marilah sioge aturen-aturen si lit i bas Lembaga Moria gelah siteh kai si jadi visi ras misi Lembaga Moria i tengah-tengah GBKP. Kenca si e, mari radu ras kita ikut ambil bagian di dalam mewujudkan visi dan misi Lembaga Kategorial Moria, gelah gelar Dibata semakin ipermuliaken arah keterlibatenta. Selamat bermeditasi. Dibata si masu-masu ras mpegegehi kita.