SUPLEMEN PA MORIA GBKP TGL. 12 - 18 MARET 2023

MENGAYAK I BAS PELAYANEN

Pdt. Larena Sinuhadji (Nd. ReyRapha Tarigan)

Ogen : 1 Korinti 15:57-58

Tema : MEJINGKAT NDAHIKEN DAHIN TUHAN

Tujun : Gelah Moria :

- Meteh palas mejingkat i bas ndahiken dahin Tuhan

- Tetap ukur guna ndahiken dahin Tuhan

Kata Penaruh

Tema tahunen arah Buku PA Moria GBKP tahun 2023 e me “mengayak”, ertina proaktif. La nari man iahenken, tapi ia ngiah-ngiyahi kalak si deban. Enggo lit kesadaren secara pribadi pentingna melayani. Terlebih i bas minggu enda temata “Mejingkat ndahiken dahin Tuhan”. Berarti enggo lit ketutusen, sebab enggo igejapkenna nanamna melayani i bas Tuhan e.

Penjelasen Bahan Ogen

Kota Korinti e me sebuah kota kuno i Yunani, kota metropolitan si terkenal i bas jaman Paulus. I bas kota Korinti pe lit i je pelabuhen si terkenal, emaka banci kataken secara finansial kota enda bayak, erbage-bage suku bangsa reh guna erbisnis, termasuk pe kota enda bejat secara moral. Segala macam dosa merajalela bas kota enda, secara khusus percabulan.

Bahan renungenta i teruh judul perikop “Kekeken kula”. Umumna kalak Yunani  tek nandangi keabadian jiwa, tapi la kalak enda tek nandangi kekeken kula. I bas pengakap kalak enda, kekeken kula la mungkin, nginget fakta maka kula sumber kelemahen ras dosa manusia. Emaka kematen seh kel inanti-nantiken, sebab alu kematen jiwa ibebasken i bas kula nari. Tapi kekeken kula la iarapken sebab dalanna jiwa mulihi ikuburken ras kula. Pemahamen enda mempengaruhi kalak Kristen i Korinti si umumna latar belakangna Yunani nari (bdk. Perb. Rasul 17:31,32). Enterem kalak Kristen i Korinti la ngaloken kekeken i bas si mate nari (1 Korinti 15:12). Iterangken Paulus benaken peristiwa kematen Jesus Kristus, keke i bas si mate nari, bage pe piga-piga peristiwa i ja icidahken Yesus diriNa kenca enggo ia keke i bas si mate nari (1 Korinti 15:3-7). Arah kai si enggo ijelasken Paulus maka itegaskenna pemahamen kalak Korinti la payo. Kristus enggo ipekeke Dibata i bas simate nari, janah enda merupaken jaminen  maka kalak si enggo mate nggeluh ka mulihi (1 Korinti 15:20).

Emaka i bas renungenta ay. 57 ibenaken alu kata “bujur ninta man Dibata”. Perbahan kai kita ngataken bujur? Perban Yesus Kristus si enggo keke i bas si mate nari nandakenca maka kematen enggo italuken, dosa enggo italuken. Kekeken Jesus i bas si mate nari mereken kemenangen man banta kalak si tek man Jesus Kristus. Erkiteken kalak Kristen enggo itebus, enggo imenangken, enggo ndatken kegeluhen si rasa lalap, maka enggo seharusna kalak Kristen, kalak si tek tetap ukurna, ula mbewat-mbewat ras mejingkat rusur i bas ndahiken dahin Tuhan  (Bhs. Ind., “Karena itu, saudara-saudaraku yang kekasih, berdirilah teguh, jangan goyah, dan giatlah selalu dalam pekerjaan Tuhan! Sebab kamu tahu, bahwa dalam persekutuan dengan Tuhan jerih payahmu tidak sia-sia”).

Sebage pengataken bujurta man Tuhan Dibata, sabab enggo iberekenNa kemenangen man banta, maka si pemena lebe, tetap ukurta. Amin kai pe si terjadi, sekali pe la bagi ukur, kinitekenta tetap man Tuhan, ola mbewat-mbewat. Si erbahanca tetap ukurta e me kerembakenta tetap ras Tuhan (melekat dengan Tuhan), subuk arah pertoton bage pe ibadah-ibadah pribadi si ilakoken kita. 

Sipeduaken, tetap ukurta, adi paguh kiniersadanta ras teman-temanta sada kiniteken. Kehadiren teman sada kiniteken banci mereken motivasi, semangat bage pe persinget man banta (desken kayu bakar, tetap gurlah api e. Tapi adi serap sada kayu, la banci lang reh kitikna api e, bahkan banci mate). Jenari tetap kita mejingkat i bas ndahiken dahin Tuhan, labo gelah terkelin tapi sebage pengataken bujurta man Tuhan. Mejingkat (giat selalu dalam pekerjaan Tuhan). La ia nggit tading i bas melayani sebab enggo irasakenna manfaatna, labo hanya man diriNa tapi pe man kalak si deban, terlebih arah si e Tuhan imuliaken.

Pengkenaina

Tema i bas PA Morianta “Mejingkat i bas ndahiken dahin Tuhan”. Tujun si pemena, meteh palas mejingkat i bas ndahiken dahin Tuhan enggo jelas, labo gelah ipujiken kalak kita, labo gelah kita selamat, labo dalam rangka mengisi kesibuken. Tapi mejingkat kita i bas ndahiken dahin Tuhan erkiteken enggo ibereken Tuhan kemenangen man banta, bebas i bas kuasa dosa ras kematen nari.

Tujun si peduaken, tetap ukur guna ndahiken dahin Tuhan. Enggo pasti enggo leben lit kesadaren i bas diri sendiri, keterpanggilan untuk melayani. Maka tetap semangat makeken wari-wari tupung bereken Tuhan denga waktu ras kesempaten. Melayani rikutken talenta si enggo ibereken Tuhan banta, ras la lit pelayanen si kitik i lebe-lebe Tuhan. Asum alu tulus ras motivasi si benar tentu menyenangkan hati Tuhan. Lit pe hambaten, tantangen, la kita murah megelut entah sakit hati. Kita menjadi pelaku (subyek) i bas melayani. Adi sedekah enda lalap kita jadi obyek, kita usur idahi, kita usur itotoken, gundari waktuna kita ndahi ras notoken temanta. Walaupe lit ka kari waktuna kita idahi ras itotoken (salah sada contoh).

Si perlu lebe itingkatken e me kehadirenta. 40% Jemaat GBKP si hadir i bas kegiaten ibadah-ibadah. E lebe sitingkatken. Alu erbahan perkunjungan ras pendekatan, sisungkuni kai alasen la pulung atau jarang pulung. Ras-ras kita ndarami solusi. Kenca bage libatken i bas pelayanen rikutken talentana (bahanta minggu nderbih). Bahan pembinaan-pembinaan gelah semakin ietehna kai tanggung jawab ras uga ndalankenca. Moria tetap saling mendukung, sisampat-sampaten. Bere dukungen man Morianta si lenga lit kepercayaan dirina ras totoken. Ula pandangi, ula icikuraki. Semangat erpengayak enda arus terus ikumandangken. Satu orang satu pelayanan. Ikut aku sada, kam pe teman ula ka tading. Firman Tuhan jelas ngatakenca banta labo percuma dahin si idahiken kita i bas Tuhan. Meriah ukurta, reh paguhna kinitekenta, enggo isikapken Tuhan inganta i surga.