Pdt. Larena Sinuhadji (Nd. ReyRapha Tarigan)
Teks : Bilangen 14:1-10
Tema : PEMIMPIN SI ERNALEM MAN TUHAN
Tujun : Gelah Mamre :
- Meteh kepemimpinen Josua rikutken teks
- Ertetap ukur meteh tantangen jadi peluang i bas Tuhan
Josua bin Nun salah sada tokoh i bas Pustaka Si Badia si igambarken tanpa cacat dan cela. Josua ertina “Tuhan menyelamatkan”. Kerina turi-turin kerna Josua, baik si lit i bas Kitab Keluaren, Bilangen, Ulangen, Josua, Hakim-hakim, 1 Raja-raja, 1 Kronika, bagepe Heber, mehuli kerina. La lit sada pe nuriken si la mehuli si ibahan Josua. Melala prestasi si ilakoken Josua sedekah ia jadi pemimpin i tengah-tengah bangsa Israel. Emaka Josua enda rusur jadi role model kalak si tutus erkiniteken man Dibata. “Joshua Generation” (entah pe Gen-J) nina piga-piga Gereja, maksudna arah pembinaan-pembinaan si ilakoken Gereja gelah litlah generasi, entah pe para calon pemimpin muda bagi Josua enda.
Ogenta sendah lit i teruh judul, “Jungut-jungut kalak Israel”. Perikop sebelumna nuriken kerna 12 mata-mata si ikirim guna menyelidiki taneh Kanaan. I bas si 12 mata-mata ndai, hanya 2 mata-mata si maba berita mehuli kerna taneh Kanaan e me Kalep ras Josua. Sementara si 10 mata-mata maba berita palsu (hoax) si erbahanca mbiar bangsa Israel. Perikop si jadi ogenta sendah e me kelanjuten turi-turin 12 mata-mata si iutus Musa guna menyelidiki taneh Kanaan.
Kenca enggo tersebar berita palsu (hoax) ku tengah-tengah bangsa Israel nandangi penduduk tanah Kanaan, erbahanca bangsa e jungut-jungut man Musa ras Harun. Labo terjeng jungut-jungut, bangsa e pe memberontak (i bas Alkitab bhs. Ind., judul perikop enda e me “Pemberontakan umat Israel”). Ipilih bangsa e sekalak pemimpin gantiken Musa ras Harun guna mabai bangsa e mulih ku Mesir (ay. 4). Musa ras Harun pe enggo erjimpuh i lebe-lebe bangsa e, ayona seh ku taneh, tandana enggo lanai ngasup mimpin bangsa e.
I tengah-tengah situasi si kalut e, tampil Josua ras Kalep. Kenca enggo icaingkenna uisna sebage tanda ceda atena ngenehen perbahanen bangsa e, ngerana kalak enda duana man bangsa Israel. Josua ras Kalep berusaha meyakinkan bangsa e maka Dibata si enggo mabai bangsa e Mesir nari, pasti mereken negeri si mehuli ras si mehumur e. Ula lawan Tuhan janah ula mbiar man kalak si ringan i bas Kanaan, sebab Tuhan ras bangsa e guna naluken bangsa-bangsa si lit i bas Kanaan. Tapi kai si ilakoken bangsa e? Iancamna Josua ras Kalep alu ibenteri batu. Tapi la sahun ilakoken sebab rempet idah bangsa e sinalsal terang kerehen Tuhan mbincar i babo Kemah Perjumpan e.
Tema ras tujun PA-ta sendah ngajuk kita gelah ngusih kepemimpinen Josua si ernalem man Tuhan janah ngasup mengubah tantangen menjadi peluang. Rikutken ogenta sendah, situhuna labo terjeng Josua si ernalem man Tuhan. Musa, Harun, ras Kalep pe ernalem man Tuhan. Janah labo terjeng Josua si ngasup mengubah tantangen jadi peluang, Kalep pe bage nge. Tapi perban Josua si jadi fokus emaka i bas kesempaten enda Josua ngenca si jadi role model pemimpin si mehuli i bas kesempaten enda.
Arah teksta, enggo tangkas maka Josua e me sekalak pemimpin si ernalem man Tuhan. Karakter pemimpin si ernalem man Tuhan enda teridah i bas ay. 7-9. I ja yakin kel Josua kerna penyertaan Tuhan nandangi bangsa Israel. Yakin kel Josua maka Dibata si isembah bangsa e ngasup naluken bangsa-bangsa si lit i taneh Kanaan. Karakter si bagenda banci terwujud hanya apabila Josua memiliki hubungan yang erat ras Dibata. Adi sitelusuri kegeluhen Josua khususna i bas Kitab Josua, teridah maka Josua ras keluargana e me keluarga si tuhu-tuhu erkiniteken man Tuhan (bdk. Josua 24).
Selanjutna kerna karakter pemimpin si isebutken i bas tujun si peduaken, situhuna enggo teridah i bas bindu 13, khususna ay. 30. Adi rikutken teksta sendah, ay. 7-9 je tersirat maka Josua e me sekalak pemimpin si lit bas ia karakter si positif ras optimis i bas menghadapi tantangan. Emaka ngasup ia mengubah tantangen menjadi peluang. Karakter pemimpin si positif ras optimis i bas menghadapi setiap tantangen e harus ilatih. Radu ras siteh maka sope jadi pemimpin si luar biasa nggantiken Musa, Josua e me pembantu Musa mulai anak peranana nari (Bilangen 11:28). Ertina, Josua membangun karir kepemimpinannya dari bawah. Lit kiniteruken ukur i bas Josua guna erlajar jadi pemimpin si mehuli.
Arah telu kali rangkaian tema PA Mamre si berkaiten ras kepemimpinen kristiani, iajuk kita guna menjadi pemimpin-pemimpin si ernalem man Tuhan. Janah kerina karakteristik pemimpin si mehuli arah kerina teluna bahan PA-ta banci jadi acuan i bas kita milih sekalak pemimpin si mehuli rikutken konteksna (Pilpres, Pilgub, Pilkada, Pilkades, Pemilihen-pemilihen i bas Runggunta khususna Pemilihan Pt./Dk.). Dibata si mpengasup kita jadi pemimpin si ernalem man Tuhan, ras ipengasupNa kita mengubah tantangan menjadi peluang.
Tidak ada komentar:
Posting Komentar