SUPLEMEN PJJ GBKP TGL. 26 MARET - 1 APRIL 2023

Pdt. Larena br. Sinuhadji (Nd. ReyRapha Tarigan)

Tema : MERE PERSEPULUHEN (2 Kronika 31:4-12)

Persembahen alu sistem persepuluhan enggo ibenaken i bas Gerejanta kira-kira tahun 2000-an. Sebelumna melala jenis persembahen si ilaksanaken i bas Gerejanta. Gundari hanya lit dua jenis persembahen e me persepuluhan ras persembahen kerja rani, selain tentuna kolekte-kolekte i bas kebaktin-kebaktin Gerejanta. Kenca enggo ilaksanaken persembahen alu sistem persepuluhan enda akap kami enggo semakin meningkat kuantitas ras kualitas perbeliten i bas Gerejanta guna menopang kerina bentuk pelayanen, amin pe lenga kerina kita nehken persembahen persepuluhan. Ertina melala manfaat si enggo radu ras sigejapken arah persembahen alu sistem persepuluhan i bas Gerejanta.

Si jadi ogen i bas PJJ sendah lit i teruh judul “Hizkia pelimbarui kegeluhen eragama”. Kai saja si ipelimbarui Hizkia i bas kegeluhen eragama kalak Israel? Adi sioge benaken bindu 29 seh perikop si jadi ogenta sendah lit 5. 

1. Rumah Pertoton ibersihken, iendesken man Tuhan janah ifungsiken mulihi kenca enggo ndekah la igunaken erkiteken bangsa e nembah dibata-dibata si deban (2 Kron. 29).
2. Wari-wari raya keagamaan bagi si enggo itentuken i bas Undang-undang irayaken mulihi bagi semalna (2 Kron. 30).
3. Kerina gana-gana ingan ersembah kalak perbegu si lit i tiap kota i Juda ibulakkenna ras iradaskenna (2 Kron. 31:1).
4. Itetapken raja Hizkia mulihi pembagian tugas Imam-imam ras kalak Lewi guna ngelaksanaken dahin-dahin keagamaan i bas Rumah Pertoton (2 Kron. 31:2).
5. Raja Hizkia mereken contoh nehken persembahen man Tuhan janah ilumbakenna man kerina raykat gelah nehken persembahen man Tuhan rikutken si enggo itentuken i bas Undang-undang, termasuk je persembahen persepuluhen. Kerina rakyat ngikutken kai si ikataken raja janah kenca enggo empat bulan ndekahna mbue terpepulung persembahen-persembahen, termasuk persembahen persepuluhen, si tuhu-tuhu menopang kerina pelayanen i bas Rumah Pertoton (2 Kron. 31:3-12).

Rikutken tema PJJ-ta sendah lit piga-piga hal si akap kami banci jadi bahan renungenta erpalasken ogenta.

1. Pemahamen si payo kerna persembahen man Dibata harus ibenaken alu pembaharuan erkiniteken man Dibata. Adi enggo payo (benar) kinitekenta man Dibata emaka labo mesera untuk memahami makna persembahen persepuluhen man Dibata.
2. Para “pemimpin” i bas GBKP iarapken banci jadi usihen i bas nehken persembahen, khususna persembahen persepuluhen. 
3. Persembahan persepuluhen man Dibata harus diimbangi dengan penataan pelayanan yang semakin baik secara kuantitas dan kualitas i bas Gerejanta. Termasuk je perencanaan dan pelaksanaan program yang baik sesuai dengan kebutuhan jemaat serta transparansi keuangan. 

Adi ngerana kerna mere persepuluhen akap kami perlu ilengkapai alu pemahamen teologis i teruh enda.

Kerna persembahen persepuluhen, rikutken Bil. 28:14 lit je ukuren : setengah, sepertiga, ras seperempat si arus ipersembahken. I bas Im. 27:30-31 lit je ukuren : sepersepuluh ras seperlima si arus ipersembahken. Ertina persepuluhen i bas konteksta sendah e me ukuren si kitikna (bdk. Mal. 3:10). Janah i bas Gerejanta enggo lit aturen ras tujun si jelas kerna persepuluhen enda. Memang lit denga perdebaten soal persepuluhen enda i bas Gerejanta. Umumna bersifat teknis, umpamana, apakah sepersepuluh e enggo termasuk je persembahen-persembahen si deban entah murni sepersepuluh? Lit ka deba, la pakenna istilah persepuluhen tapi bagin persepuluhen. Sementara i bas Gereja si deban (contoh: GKI) enggo la nai lit istilah “persepuluhan” tapi “Persembahan Bulanan” erkiteken istilah “persepuluhan” e enggo membatasi jemaatna nehken tergalangen asangken sepersepuluh. Bicara la sepersepuluh pe si isehken kita ma la ise pe si metehsa? Hanya kita secara pribadi ras Dibata si metehsa.

Versi Audio klik https://www.youtube.com/watch?v=3yFB7CtRWms

Ertina, marilah kita nehken persembahen erpalasken kinitekenta si tuhu-tuhu nandangi Dibata si enggo mereken kegeluhen si tuhu-tuhu (keselamaten gratis si holistik) man banta, labo erpalasken asa kai si ibereken kalak si deban (bagi les bas jambur) entah pe erpalasken logikanta. Bahkan Rikutken Roma 12:1 Paulus ngelumbaken man banta guna nehken kulanta (labo terjeng materi) sebage persembahen si nggeluh, si ngena ate Dibata.

Enggo lit sada brosur kerna Persembahen Persepuluhan si ibahan Moderamenta. Akap kami brosur e perlu denga siedarken janah ibahan brosur si deban secara periodik gelah semakin mpebagesi kinitekenta kerna persembahen persepuluhen enda. Persembahen persepuluhen e me soal kinitekenta secara pribadi man Dibata. Tading kinipangenta mbuktikenca, apakah kerina si ikataken Dibata i bas Pustaka si Badia kerna persembahen e payo entah lang? Soli Deo Gloria.