Pdt. Larena br. Sinuhadji (Nd. ReyRapha Tarigan)
MEDIATE ERKADE-KADE (Jop 42:11)
Penaruh
Adi ngerana kerna erkade-kade, suku Karo termasuk salah sada suku si sistem kekerabatanna mejile. Lit merga si lima, rakut si telu, tutur si waluh, ras perkade-kaden dua belas tambah sada. Orat nggeluh Karo mabai kalak Karo nggeluh sisampat-sampaten ras sikeleng-kelengen. Aminna pe la sada kuta, la sada dareh, tapi banci ndeher erkiteken orat nggeluh, kerina enggo banci erkade-kade. Bahkan si la pe kalak Karo, adi enggo bengket ia ku bas masyarakat Karo erkiteken perjabun, minter ban mergana, ras enggo lit sangkep geluhna. Bagem adi ngerana kita kerna erkade-kade i bas budayanta kalak Karo.
I bas kesempaten enda radu ras kita erlajar mulihi kerna erkade-kade erpalasken Kata Dibata.