Pekan Kebaktin Keluarga GBKP Tahun 2019

PEKAN KEBAKTIN KELUARGA GBKP TAHUN 2019

Tema Umum : JABU SI ERBUAH (Bdk. Masmur 1:1-3)

WARI I, MINGGU 17 NOVEMBER 2019

Pdt. Larena br. Sinuhadji (Nd. Rey Rapha Tarigan)

Invocatio : “Tetaplah kam i bas Aku, janah Aku pe tetap i bas Kam. Dahan labo ngasup erbuah adi la kin ersada dahan e ras batangna. Bage me pe kam, adi la kin kam ersada ras Aku labo kam erbuah” (Johanes 15:4)

Ogen 1 : Kolose 1:9-12

Khotbah : Masmur 1:1-3

Tema : JABU SI ERBUAH

Buah e me gambaren pasu-pasu (berkat), potensi, sebab adi sisuan batang sinuan-sinuan sura-suranta erbuah meramis dingen entebu. Bage me iarapken arah bahan Pekan Keluarganta tahun enda, secara khusus i bas wari si pemena gelah jabunta jadi jabu si erbuah, jabu si jadi pasu-pasu (berkat) man sekelewetna.

Bahan khotbahta ngerana kerna kegeluhen kalak si erkemalangen man Tuhan versus kalak si la erdalan i bas dalan Tuhan (jahat). Man kalak si erkemalangen man Tuhan, kemalemen ate jadi sikerajangenna. Sabab i bas kegeluhenna, patuh ia man undang-undang Tuhan. Meriah ukurna erlajar kerna Kata Dibata ras nggit ndalankenca i bas kegeluhenna. Labo terjeng formalitas, kebiasaan, bahkan beban man bana kerna Kata Dibata, tapi merupaken sada keriahen ukur (enggo jadi kebutuhenna). Lit kesempatenna guna ngukurisa je nari lit gegeh guna ndalankenca. Ertina labo sambil lalu ialokenna Kata Dibata e, tapi irenungkenna, ipekusur-kusurna i bas ukurna, ipenanam-nanamina ras idalankenna. Bijaksana ia i bas pergaulen sebab ras ise pe banci ia bergaul tapi perbahanen si la mehuli la ikutina. Pang ia ngataken “LANG” terhadap kejahaten. La ia murah terpengaruh entah ikut-ikuten. Dingen la ia nggit erteman ras kalak si megombang man Dibata sebab seri ertina, idukungna perbahanen si la mehuli si idalanken kalak si megombang man Dibata. Kalak si bage igambarken bagi batang kayu si turah i tepi lau anak. Erbuah i bas paksana, dingen bulungna pe la melus. Sangap ia i bas kerina si idahikenna. Ertina, lit proses si arus sibentasi kita gelah geluhta banci erbuah (ernanam). I bas paksana erbuah. La ia ipaksa erbuah, tapi arah proses kesetian nggeluh i bas Kata Dibata. Ertina, kalak si tetap mengandalken Tuhan, nggeluh i bas KataNa maka geluhna jadi pasu-pasu (berkat). Tetap ia rukur kai nari si banci i-eksplore (iberdayaken) i bas kegeluhenna si enggo iberkati Tuhan gelah tuhu-tuhu erguna (ernanam) man kalak i sekelewetna. Arah motivasina, kegeluhen jabuna si sempabu, semangat ras kebujuren i bas erdahin, arah ketutusenna ngikutken Tuhan, arah talenta si lit bas ia, rsd. Bahkan megegeh ia amin sekali perbeben nderpa, sabab e merupaken sada ujian guna kinitekenna (gambaren bulungna la melus). Perbeben ras kiniseran si ialamina dalanna guna tole ngerembakken diri ras Dibata ras terus-menerus mpelimbarui diri.

Ogen si pemena e me kerna surat Paulus man perpulungen Kolose, perpulungen si labo Paulus mantekisa tapi rutang pusuhna nehken kata persinget sabab paksa si e mbue guru-guru palsu si nehken pengajaren si papak ku tengah-tengah perpulungen Kolose. Si menarik i jenda, Paulus tetap rutang pusuhna mendukung jemaat i bas pertoton, bahkan i jenda secara intensif (rusur). Kai saja si nipindoken Paulus man Tuhan guna perpulungen Kolose?

- Alu pemeteh ras kepentaren si ibereken Kesah Dibata man perpulungen maka perpulungen meteh kerina sura-sura Dibata. Ertina, si idalanken perpulungen labo sura-surana tapi sura-sura Dibata.

- Nggeluh bagi si ngena ate Dibata si erbahanca meriah ukur Dibata, seh makana i bas geluhna erbuahken perbahanen si mehuli.

- Erbagesna penandai perpulungen kerna Dibata.

- Megegeh i bas Tuhan ras megenggeng i bas kai pe.

Tema i bas Pekan Keluarganta enda bage pe i bas wari si pemena e me “Jabu Si Erbuah”. Erbuah i jenda e me jabu si erguna, ernanam, jadi pasu-pasu man sekelewetna. Kunci gelah banci kita erbuah, berpontensi e me nggeluh i bas Tuhan. Leben sibangun hubungenta secara pribadi, jabu man Dibata subuk arah doa pribadi, doa keluarga, erbahan kebaktian keluarga, ikut muat bagin i bas kegiaten Gerejanta. Sibangun geluh kinitekenta secara konsisten ras disiplin (la wari-warin), labo song-song. Dingen arah kegeluhenta, subuk kesenangen, kesusahen i je Dibata membentuk kita, memproses kita maka ambah warina reh dewasana kita. Adi enggo dewasa kita secara kiniteken, secara perukuren berarti enggo kita selesai nandangi diri, la nari rukur guna kepentingen dirinta tapi lebih jauh rukur guna kiniulin kalak si deban. Geluhta raduken jabunta jadi pasu-pasu man sekelewetta, man isi doni enda. Penungkunenna man banta (jabunta) : “kai nari si banci kulakoken guna mpenahangi beban kalak, berbuat guna kiniulin kalak si deban?” Perukurenta positif, pengerananta si membangun, si memotivasi (labo ndabuhken, la ngompor-ngompori), perbahanenta si nampati, si mehuli, ernanam man kalak.

WARI II, SENIN 18 NOVEMBER 2019

Pdt. Larena br. Sinuhadji (Nd. Rey Rapha Tarigan)

Invocatio : “Dage lit telu si tetap arus idalanken, e me: erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban” (I Korinti 13:13)

Ogen : Rut 2:8-9 (iogeken tuan rumah)

Khotbah : Lukas 14:12-14

Tema : JABU SI ERMALEM ATE

Rikutken bahanta i bas Pekan Kebaktin Keluarga (PKK) wari si peduaken, maka jabu si ermalem ate, e me jabu si enggo dung ngukuri dirina (jabuna) ras beralih ngukurken kiniulin kalak si deban. Banci ikataken keluarga si jadi berkat (pasu-pasu) man kalak si deban.

Bahan khotbahta e me bagin i bas Lukas 14:7-14 si ibere judul “Ingan kundul arah gugung ras arah berneh” (terj. TB-LAI : “Tempat yang paling utama dan yang paling rendah”). Kenca dung Jesus mereken masuken man kalak si iundang ku kerja erdemu bayu gelah ola ndarami ingan si mehamat leben, tapi darami ingan si isuah gelah banci jadi ibereken kehamaten man si mada kerja dingen la kita ipermelaken bas pesta e. Pesan si pemena ikataken Jesus e me, ise si peganjangken bana ia me pagi ipeteruk janah ise si peteruk bana ia me pagi ipeganjangken. Je nari perkataan Jesus man kalak si ngudang IA, gelah adi erbahan pesta subuk suari entah berngi ola undang teman-teman entah senina-seninandu entah kade-kade entah anak kutandu si bayak-bayak, gelah ola ia ersemulih man bandu alu ngudang ka kam. Tapi adi atendu erbahan kerja man-man, undanglah kalak musil, kalak cempang-cempang, kalak pangpangen ras kalak pentang, maka malem atendu tuhu-tuhu sabab la ia ngasup ersemulih man bandu. Dibata nge pagi si ersemulih man bandu i bas wari kekeken kalak si benar. Ertina, i jenda Jesus menekanken kerna nehken kekelengen si tuhu-tuhu alu motivasi si benar, labo lit udang di balik batu. Sabab lit ka deba pengakap i bas kita, kusampati gelah banci aku sampatina ka i bas waktu si deban. Tapi adi kalak si musil, cempang, pentang si isampati kita, enggo pasti kecil kemungkinen ia membalas kai si enggo sibereken kita ndai. Ertina, perbahanen baik ndai tuhu-tuhu murni labo lit unsur gelah ersemulih ka ia dengo man banta. Tapi Dibata si ngidah perbahanenta, IA pagi si ersemulih man banta kerna kiniulin si enggo sisehken ndai.

Bahan ogenta si pemena pe ngerana kerna kiniulin Boas si biak kade-kade Elimelek man Rut. Boas sekalak bayak si paksa si e sangana rani gandum tanpa sengaja ipilih Rut guna inganna mumahi ruhi gandum si tading ibahan kalak rani. Boas aminna pe kalak bayak, tapi dem i bas ia kekelengen ras peduli man kerina si edahinna, teridah i jenda asum ia reh ku juma minter iperkuankenna kerina kalak si erdahin alu ungkapen mejuah-juah. Ras minter ka ietehna lit kalak baru si ikut erdahin bas jumana (berarti jelmana perhatian). Isungkun Boas mandurna ise diberu enda? Ras ikataken mandurna permen Naomi sekalak bangsa Moab. Berita kerna Noami ras Rut enggo mbar i daerah Betlehem, termasuk enggo ieteh Boas. Emaka minter ijumpai Boas si Rut, ras ikatakenna : “Tetaplah kam i bas juma enda mpepulung gandum. Erdahinlah kam ras diberu-diberu si ngemo e. Pernehen ia kerina, i ja ia rani ras-ras kam i je. Enggo kukataken man kerina si erdahinku si dilaki maka ula kam igasgasina. Janah adi muas kam, inem saja lau si enggo isikapken si erdahin i bas guci”.

Tema i bas PKK wari si peduaken enda “Jabu si ermalem ate”. Terang man banta maka sura-suranta erjabu gelah si datken kemalemen ate. Kemalemen ate megati igambarken adi enggo sidatken kai si jadi sura-suranta. Malem ateta adi enggo lit tambah barang ini-itu i jabunta tapi enda kebalikenna, malem ateta, jabunta adi banci kita peduli man kalak, nampati kalak, nehken kekelengen. Malem ateta ‘di kenca kalak si deban tersampat geluhna, menahang beban geluhna. Mekatep si terjadi bas kita, “bas kami pe kurang denga, bas kita butuh denga”, orientasinta tetap ku kita, ku aku, piah dungna la pernah kita berbuat man kalak si deban.

Paulus negasken man banta lit telu hal si arus idalanken, e me erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban. Nggeluhlah kita sikeleng-sikelengen leben i tengah-tengah jabu. Bapa, nande ras anak-anak. Termasuk ku keluarga besar. Pedauh biak egois, meganjang ukur, sentimen, rsd. La sicakapen bibi ras permain, la siperkuanen. Adi enggo saling menghargai, sikeleng-keleng tersuan i bas jabu, maka jabu e enggo dung dengan dirina, jabuna ras banci jabu e menjadi pasu-pasu (berkat) man kalak si deban. Tapi adi bas jabunta pe gerupuh, rubat katawari paksa pe enggo pasti sulit guna ngukurken man kalak si deban. Jadilah keluarga si jadi pasu-pasu (berkat) man kalak si deban.

WARI III, SELASA 19 NOVEMBER 2019

Pdt. Larena br. Sinuhadji (Nd. Rey Rapha Tarigan)

Invocatio : “Adi kam ngerana ula sitik pe belasken cakap si la erturi-turin. Tapi kata-kata si ergunalah belasken, si banci nampati kalak si deban rikutken perluna, gelah kata-katandu e maba kiniulin man si megisa” (Epesus 4:29)

Ogen : Kuan-kuan 1:7-10 (pegancih, ay. 7-8, ay. 8-9 Mamre, ay. 10 Moria)

Khotbah : Jakub 1:19-25

Tema : JABU SI MEGERMET NDALANKEN SI NGENA ATE DIBATA

Sada ketuahen, kemalemen ate adi kita jadi pelaku Firman Tuhan labo megi entah pe nehken KataNa saja. E me si rusur ilumbaken i bas Kebaktin Minggu kenca dung iogeken pengogen Kata Dibata bagin si pemena. Enda me si jadi penekanen i bas bahan PKK wari peteluken.

Bahan khotbahta ibere judul “Megi dingen ndalankenca” (terj. TB-LAI : “Pendengar atau pelaku Firman”). I bas Pustaka Si Badia, arah judul icidahken lit tahap si arus sidalanken e me megi je nari ndalanken Kata Dibata. Sedangken i bas TB-LAI iberena pillihen man banta jadi pendengar atau pelaku Firman? Enggo pasti duana arus saling terkait, sebab iman timbul dari pendengaran akan Firman Tuhan (Roma 10:17). Lit piga-piga poin penting ilumbaken i bas bahan khotbahta :

- Kerina arus metinggel (cepat untuk mendengar), dingen ola minter ngerana dingen ola sukah merawa. Tuhan nepa manusia alu dua cuping, sada babah alu maksud lebih mbue kita ninggel-ninggel gelah lebih jelas kai maksud si nibelasken lawan bicaranta maka banci sirespon. Mekatep si terjadi lenga jelas man banta minter enggo sirespon si erbahanca turah mis komunikasi, bahkan emosi alu merawa-rawa. Aminna pe kari kedungenna kita merawa, rawanta jelas alu tujun si payo, dingen ku ise sialamatken. Labo ate-ateta saja merawa. Rawa manusia labo ngasup erbahan si mehuli si ngena ate Dibata.

- Kata Dibata arus ialoken alu meteruk ukur, sabab Kata Dibata ngasup nelamatken kita. Mekatep si terjadi bagi formalitas, rutinitas, beban, gelah menggo i bas kita megiken Kata Dibata, piah dungna labo lit perobahen i bas geluhta aminna pe enggo rusur kita megiken Kata Dibata.

- Kalak si megiken Kata Dibata, mperdiateken pedah Dibata alu mehuli, terus mpergemetkenca, si la megi-megi saja, kalak si bage ipasu-pasu Dibata i bas kerina pendahinna. Kebalikenna, kalak si megi-megi Kata Dibata saja tapi la idalankenca, berarti sitipu banta.

Bage pe i bas bahan pengogen si pemena mereken kata telah maka bena-bena kepentaren e me mehamat dingen erkemalangen man Dibata. Kebalikenna kalak lenge, la nggit mperdiateken kepentaren dingen la nggit erlajar. Ertina i bas benana kitab Kuan-kuanen enda lit dua jenis kalak e me kalak pentar dingen kalak lenge. Kalak pentar ietehna ia terbatas janah terus-menerus atena erlajar, mbelin keingintahuannya ras tetap meteruk ukurna aminna pe lit pemetehna, sabab palasna e me erkemalangen man Dibata. La erpenulak (melawan) asum iajarken orang tua, sabab igejapkenna orang tua e me wakil Tuhan i doni enda. Pengajaren orang tua nambahi lagu langkah si mehuli desken rudang-rudang i babo takalndu entah bura-bura i bas kerahungndu si erbahanca mejile. Dingen arah pengajaren-pengajaren si ialoken kita mabai kita la murah terpengaruh. Lit pe pengajuk kalak jahat la kita nggit sabab sieteh apai si ngena ate Dibata si arus ipilih ras idalankenna.

Tema i bas PKK wari peteluken “Jabu si mergemet ndalanken Kata Dibata”, e me jabu si tetap mengandalken Tuhan i bas kerina dampar kegeluhen jabuna. Sabab ietehna jabu e lit erkiteken ipersadaken Tuhan Dibata. Leben ibangunna ibadah keluarga, si enggo pasti ibenaken i bas inisiatif orang tua, bapa ras nande, maka kenca enggo lit anak, ilibatken ras kerina anggota jabu. Kata Dibata jadi penuntun, pedoman i bas jabu ope kai pe ilakoken. Alu bage kerina anggota jabu banci saling mpersingeti rikutken firman Tuhan si enggo iogeken i bas Kebaktian Keluarga. Mpergermetken ertina, labo terjeng ngoge entah megi Kata Dibata, tapi lit kesempaten guna ngukurisa, niksiki, guna banci idalanken. Seh makana Kata Dibata nerangi anggota jabu si erbahanca pengajuk kalak jahat pe banci iolangi, sura-sura guna ngelakoken kejahaten pe iukurken ndauh-ndauh efek negatifna, i bas jabu saling menghargai, nggeluh sikeleng-keleng, bekerja sama, i ja kel gelah ula menyakiti sada ras si debanna i bas jabu.

Memang labo mesukah ndalanken tema enda i bas era teknologi informasi si enggo merasuki i bas kegeluhenta ras jabunta. Bapa, nande, anak terkadang la nari saling bertegur sapa, berkomunikasi, bermesraan, erkiteken waktu enggo mbuen tersita HP-nta, si erbahanca si jauh jadi dekat, si dekat jadi jauh. Tantangen enda me si arus isedari anggota jabu, aminna pe teknologi maju, tapi tetap keutuhan, keharmonisan keluarga janah keluarga si erkemalangen man Tuhan, jadi si pentingna ras nomor satu.

WARI IV, RABU 20 NOVEMBER 2019

Cl. Pdt. Albert Einstein Ginting

Invocatio : “O Tuhan, jagai min babah ku, eruk min biberku” (Masmur 141:3)

Ogen : Kolose 3:18-21

Khotbah : Kuan-kuanen 15:1-5

Tema : RANAN JABU SI MABA KEGELUHEN

Jabu e me komunitas sosial si kitikna i bas masyarakat. Amin pe kitik, jabu e me pusat (sentral) pendidikan si pentingna i bas kegeluhen. Arah jabu si kitik e me ingan namaken palas kegeluhen sekalak jelma, khususna kerna pengajaren kiniteken bage pe sosial ras moral. Jabu si mehuli pasti teridah arah lagu langkah anak jabuna, tapi jabu si sontar (broken home) pasti teridah arah lagu langkah si la mehuli. Cara si paling sederhana guna meteh situasi keluarga e, e me arah cara anak jabuna ngerana, bage pe kai-kai saja si terbelas arah babahna i bas ia ngerana man kalak si deban.

Ranan si mehuli rehna i bas Dibata nari kap, tapi ranan si la mehuli rehna i bas Iblis nari. Sekalak jelma si jabuna enggo terbiasa bergaul ras Dibata entah pe nggeluh i bas Kata Dibata pasti jarang melasken cakap merampus/mantak si banci erbahanca segat ate jelma si megi-megi, tapi ranan si ibelaskenna tuhu melias dingen banci maba pasu-pasu man sekelewetna. Tambah-tambah si e, perukuren si melias e iisi ka alu pemeteh si erbahanca anak jabu e jadi sekalak si pentar, gelah kai si ibelaskenna jadi ranan melias si maba pasu-pasu, bage pe ranan si pentar si dem alu pemeteh. Latihlah anak jabunta guna si e, segelah anak jabunta la jadi pribadi penyebar hoax, fitnah, cikurak rsd.

I bas ogenta pe Paulus enggo mpersingeti jabu kalak si erkiniteken, gelahna tetap nuduhken biak-biak si mehuli selaku jabu si dem Kata Dibata. Kolose 3:18-21 e me gambaren jabu si ngena ate Tuhan, kepatuhen ndehara man perbulangen, kekelengen perbulangen man ndehara, ola kasar man ndehara, anak patuh man orang tua bage pe ola jungut-jungut man anak. Si e kerina teridah sederhana ras biasa-biasa saja, tapi situhuna mbelin kel pengaruhna bas kegeluhen jabunta. Jabu si erpalasken Kata Dibata, e kap si ikataken jabu kalak Kristen. Tapi jabu kalak Kristen si la erpalasken Kata Dibata, e labo jabu si ngena ate Tuhan.

Pindolah gegeh man Tuhan gelahna kam ngasup jadi keluarga si mehuli i lebe-lebe Dibata, bage pe banci maba kemalemen ate man temanta manusia. Bagi nina invocatiota, “O Tuhan, jagai min babahku, eruk min biberku”, ertina ukurilah lebe kai si atendu ibelaskenndu, ertimbang-timbang kam lebe i bas pusuhndu. Sungkunlah lebe pusuhndu kerna kai si atendu ibelaskenndu e, apakah e ngena ate Dibata entah lang janah maba pasu-pasu entah lang. Segelah arah pengeranandu pe teridah maka kam anak-anak Dibata, ranan si melias si maba pasu-pasu, bage pe ranan si pentar si maba pemeteh si mehuli.

“Jikalau hubungan anda dengan orang lain dalam keadaan yang tidak baik, cobalah periksa hati anda apakah hubungan anda dengan Tuhan baik-baik saja?”

WARI V, KAMIS 21 NOVEMBER 2019

Pdt. Larena br. Sinuhadji (Nd. Rey Rapha Tarigan)

Invocatio : “Setialah kempak ndeharandu dingen man bana sajalah atendu ngena” (Kuan-kuanen 5:15)

Ogen : 1 Tesalonika 4:1-8 (iogeken si mada jabu)

Khotbah : Maleakhi 2:13-16

Tema : JABU SI SETIA

Lit sada tulisen i bas Majalah Basis nari, “Keluarga : kapal yang sudah karam?” Ertina, icidahkenna i bas pakasa genduari (jaman modern) enda melala keluarga-keluarga si la nari terpertahankenna jabuna, kawin-cerai e me kap hal si biasa i bas paksa enda, la nari siangkan, mbuen cekcokna asangken cocokna, bahkan si lebih parah erkiteken terjadi kekerasen i tengah-tengah jabu, subuk fisik, psikis, kekerasan ekonomi, kekerasan seksual. Sada atap, tapi la sada pusuh. La nari sehati, sejiwa. Ateta erjabu e me ndatken kemalemen ate, kebahagian i bas jabu. Sabab lit ka jabu, enggo 20 tahun usia perjabunna, tapi masing-masing pihak suami-istri tidak mengalami kebahagian. Ipertahankenna jabu e perban enggo lit anak-anak saja.

Adi siidah bahan khotbah, e me kap kerna pedah gelah setiap pasangan ngergaken perjabun. Kegeluhen perbulangen ras ndehara i bas perjabun la banci melket. Dibata pagi ngukumsa kalak si erlagu la mehuli ras erlua-lua. Tuhan kesal la nari alokenna persembahen bangsa Israel, erkiteken enggo ilanggarna padan perjabunna ndube i ja Tuhan jadi saksi. La nari ia setia. Nina Tuhan jelas, “Enggo Kubahan kam sada kula ras sada ukur ras pasangenndu gelah banci ipupusndu anak-anak si tuhu-tuhu kel bangsa Dibata”. Tapi kinatana la bage, simulihen, terjadi kekerasen. Bindu 2:16 "Nembeh ateKu kalak si mulihen," nina TUHAN Dibata man Israel. "Nembeh kal ateKu adi lit kam ngelakoken perbahanen si kejam e nandangi ndeharana. Inget maka tetap igelemndu padanndu maka kam tetap setia man ndeharandu." Kepatuhen bangsa enda man Dibata hanya secara seremonial (nehken persembahen, perpuluhen), tapi la iaplikasikenna arah kegeluhenna tep-tep wari secara khusus i bas geluh jabuna.

I bas pengogen si pemena, Paulus arah suratna man perpulungen Tesalonika mpersingeti gelah tetap nggeluh bagi si ngena ate Dibata. Perpulungen arus nggejapken maka geluhna enggo itebus Tuhan alu darehna si badia dingen karakterna arus berbeda ras kalak si deban si lenga tek man Tuhan. Geluhna iserapken jadi sikerajangen Kristus alu nggeluh la erlua-lua (melakukan percabulan). Berarti paksa si e lit kalak secara khusus dilaki geluh erlua-lua. Emaka petunjuk si ibahan Paulus, kerina dilaki si lit i perpulungen Tesalonika arus itehna min muat ndeharana alu cara badia dingen terpuji, labo erpalasken sura-sura kula saja (hawa nafsu), bagi kalak si deban si la nandai Dibata. Sabab kita ipilih Dibata labo gelah nggeluh erlua-lua tapi gelah nggeluh badia. Emaka adi lit kalak nulak pengajaren si enggo iajarken Paulus labo manusia si itulakna tapi Dibata si mereken Kesah Si Badia man banta sekalak-sekalak.

Melala faktor si erbahanca i bas jabu la nari harmonis, si kedungenna salah sada pihak la nari ngasup ngergai kebadian jabuna, lit wanita idaman lain (WIL) ntah pria idaman lain (PIL). Banci jadi erkiteken ekonomi kurang entah pe enggo mbuesa kinibayaken piah dungna enggo murah-murah saja iakapna ndarami teman si deban selain ndehara/perbulangen, alu istilah gelah lit variasi. Faktor si deban erkiteken sakit-pinakit sialami pasangenta, la lit pupus, CLBK, rsd. Kai pe alasenna labo ibenarken ketidaksetian i bas jabu, sabab jelas padan perjabun ngatakenca “aku erpadan tetap njagai kebadian perjabunta seh Dibata nirangken kita salu kematen”. Senang susah, meriah ukur ceda ate, sehat ras sakit tetap aturna kita ngaloken pasangenta alu dem kekelengen.

Emaka gelah tetap lit keharmonisan jabu, kesetian i bas jabu masing-masing pribadi i bas jabu (suami-istri) arus lit kesepakaten untuk selalu mpelimbarui geluh perjabun. Alu erbage cara :

- Mengikuti Retreat Pasutri.

- Konseling paska erjabu.

- Kebersamaan ras pasangen 3/6 bulan sekali uga pe sibukna entah ngebakso bersama, nonton bersama, rekreasi bersama.

- Erbahan kebaktin i bas jabu, gelah terang Kata Dibata si jadi pedoman i bas geluh jabu ras Kesah Si Badia tetap negu-negu anggota jabu nggeluh bagi si ngena ate Dibata.

WARI VI, JUMAT 22 NOVEMBER 2019

Pdt. Jefri A. Keliat

Invocatio : “Lit sora erlebuh nina, “Pekena dalan TUHAN i bas taneh si mesawang, i bas gurun pasir, pesikap dalan man Dibatanta” (Jesaya 40:3)

Ogen : Matius 25:1-3

Renungen : Miha 5:2-5a

Tema : JABU SI NGALO-NGALO RAJA KEGELUHEN

Natal enggo nandangi reh. Natal si maba keriahen man kerina manusia. Erbage-bage cara ibahan kalak Kristen guna ngalo-ngalo wari Natal. Gereja pe enggo ersikap guna ngalo-ngalo kerehen Tuhan enda. Tentu menjadi penungkunen paling mendasar i bas kerina persiapen enda, enggo me e si pasna si man pesikapenken? La kalah enggo siakap latih nikapken kerinana tapi ternyata enda labo si menjadi hal paling penting? Gelah ula kita bagi diberu lenge (Matius 25) si la ia ersikap. Iakapna maka kai si enggo ibahanna enggo bias, kepeken ndauh bas kata harusna. Diberu lenge banci iertiken sekalak si labo bodoh (la kin angkana) tapi angkana tapi la ibahana. Kalak si erkiniteken itehna tuhu makna Natal ras kai si man pesikapen ngalo-ngalo Natal, tapi la idalankenna. Tentu gelah la bage, harus ipetangkas ulihi man banta kai kin makna Natal situhuna, kai kin tujun raja e reh gelah alu bage ertangkasna man banta kai si man pesikapenken.

Nabi Miha asalna arah kuta Moresyet-Gat. Secara umum isi surat Miha e me kerna kritik Musa man imam-imam, nabi palsu perbinaga si la bujur ras nggit korupsi. Tapi min gia situasi jelma si bage mekelekna bas dosa, tapi, Miha ernubuat maka mehuli kedungenna. Dibata kedungenna ngalemi dosa manusia, alu rehna sekalak penampat si rehna i Juda nari. Bagi sieteh maka kota Juda termasuk kuta si kitik (Miha 5:2). I je daerah pegunungen si terletak sekitar Yerusalem ras Bait Allah. Daerah e gersang ras kering. Erkiteken bage kondisi daerahna maka si biasa ilakoken kalak i je e me kap erkambing bage pe melihara domba. Labo ianggap daerah si hebat. Tapi kepeken arah daerah si la hebat e me reh penampat man manusia. Makna Natal si pemena arah Miha ngingetken kita gelah ula megati menghakimi kalak si tempa la lit gegehna bas jabu. Anak si la berprestasi, perbapan si pencarinna biasa-biasa saja, pernanden si la ligat, sebab banci ipakeken Dibata ia jadi mbelin kel nanamna man banta. Maka Natal situhuna e me kap uga kita ngasup ngergaken kerina jabu. Enda me si man pesikapen si pemena.

Kenca kerehen Raja Penampat e pagi terjadi sada pur-pur sage bas bangsa Israel (Miha 5:3). Kalak Yuda ras Israel si gel-gel enggo ndekah sirang (mulai masa Daud) ulihi ersada. Si bas pembuangen pe ulihi ersada kerina ras si la ibuangken. Kepeken Natal ngerana pe kerna perdamen. Megati gara-gara Natal justru turah perubaten, la nai siangkan. Kepeken harusna Natal e me kap wadah guna saling berdamai. Sia-sia me mejile uis, sikap koor, tapi adi la kita erdame. Siman pesikap jabu si peduaken guna er-Natal e me kap erdame. Megati melala kel persoalen jabu si la terdungi. Dungna enggo ngutkut bagi api bas segal. Natal harus erdame. Labo soal ise si benar ise si salah, sebab Kristus pe labo bas salahna ia ihukum. Tapi erkiteken keleng ateNa nggit ia mate guna manusia.

Rehna Mesias igambarken selaku raja si megegeh. Bas gegehna banci ibabaina rakyatna geluh senang (Miha 5:4-5a). Kepeken cara ngalo-ngalo raja si peteluken e me kap uga kita mpesikap kinitekenta. Megati enda hal si penting tapi e la sipesikap. Miha gambarken adi tek kita man Dibata maka sidatken kesenangen. Megati kesenangen menjadi sada impianta si tempa lalap la tersehi. Natal e me kap ngalo-ngalo Raja si mbaba kemalemen ate. Kemalemen e banci sidatken adi kita jadi kalak si erkiniteken man bana. Natal harusna min erbahnca jabu erngasupna erpengendes dingen erkiniteken man Dibata. Melala jabu kinitekenna hanya polesan saja. Tempa erkiniteken tapi labo ia tek seutuhna man Dibata. Payo maka adi la igegehi labo banci kai pe jadi. Tapi bicara ugapa pe sekali pegegehi tapi adi la kin arah pasu-pasu Dibata labo banci lit dalanna. Pesikaplah kinitekenta. Tek kita maka Mesias (Yesus) si reh e, e me kap Raja si mbaba kemalemen ate. Malem naring ateta adi ras IA.

Arah penjelasen Miha maka tangkas man banta kepeken hal paling prinsip i bas ngalo-ngalo Mesias e me kap mpesikap pusuh. Alo-alo me dage Raja si reh e alu pusuh si erdame, pusuh si nggit ngaloken kerina anggota jabu (ngergaken) bage pe pusuh si dem alu dem kiniteken. Gelah alu bage la sia-sia latih siakap tapi kai pe la lit ulih Natal man jabunta.

WARI VII, SABTU 23 NOVEMBER 2019

Pdt. Jefri A. Keliat

Invocatio : “Terpujilah Dibata i bas Surga si meganjangna. Janah dame i doni man manusia si ngena ateNa” (Lukas 2:14)

Ogen : Jesaya 7:13-15

Khotbah : Roma 1:1-7

Tema : JABU SI NGALOKEN HAK ISTIMEWA

Kerina kalak tentu merincuh kel guna banci ndatken hak istimewa entah pe iistimewaken. Adi istilah bas doni enda tentu VIP (very important person) lit ka terdatasen e me kap very very important person (VVIP). Kalak si bage biasa khusus si ibahan man bana. Baik cara ngalo-ngalosa bage pe si debanna. Melala tuhu kalak mengayak guna banci ngaloken hak enda. Adi bas doni enda guna banci ndatken si e la banci lang kita harus lit pangkat si meganjang, erta si melala, prestasi si gemilang, ras si debanna. Secara singkat statusta mempengaruhi hakta. Tentu menarik guna nungkun apakah enda pe berlaku bas kegeluhenta erkiniteken? Lit nge kalak si VIP/VVIP atau uga kin situhuna?

Rikutken bahanta Paulus mpetandaken dirina selaku suruh-suruhen Tuhan. Sekalak suruh-suruhen bas kalak Yahudi ikatken doulus. Doulus e me kap budak si la lit ergana, seh maka erbahan keputusen kerna dirina pe la ia banci. Adi enggo itukur, maka kerina si lit bas ia tuanna empuna termasuk kesahna. Paulus si sekalak budak enggo ipilih jadi Rasul Tuhan. I bas pemahan kiniteken maka asum manusia erdosa ia jadi budak Iblis, maka tentu Iblis mbabai manusia guna lawes kempak ku kematen. Tapi erkiteken keleng ate Dibata itebusNa manusia maka arah pengorbanenNa IA jadi penebus gelah manusia banci lepas i bas Iblis nari. Kematen dingen kekeken Kristus e me “biaya” maka kita genduari enggo mulihken jadi si kerajangen Dibata. Kenca Paulus iselamatken Dibata terjadi perubahen statusna. La nai Ia budak tapi ia me Rasul. Doni banci menggolongken kita alu erbage-bage cara. Tapi bas Dibata kepeken kerina seri ras iangkatkenna kerina. Labo lit berbeda. Paulus saja, si awalna iimbangina kel kalak Kristen, tapi kenca ia bertobat iangkatken Dibata ia. La nai ia budak tapi nggo Rasul.

Apakah Paulus banci ndatken enda erkiteken kehebatenna? Tentu lang. Berbeda kel ras doni enda, hak istimewa si banci idatken Paulus (tentu kita pe) reh i bas lias ate Dibata (ay. 7). Lias ate banci iertiken sada pemere si ialoken percuma tanpa usaha. Si nimaksud i jenda e me kap keterkelinen sialoken kita. Keselamaten sialoken e me kap sada bentuk lias ate Dibata. Labo erkiteken beluhta ras hebatna kita tapi Dibata erdahin erpalasken keleng ateNa si mbelin man banta. Seh maka kita kalak si erdosa kedungena enggo serta ras ngaloken sada hak istimewa si mbelin e me kap keselamaten.

Arah bahanta enggo tangkas maka kita (jabunta) enggo ngaloken hak istimewa. Kita enggo itebus Kristus. Tentu si menjadi penting uga dage geluh jadi istimewa? Adi kalak si masuk ku bas group VIP tentu harus ijagana dirina. Sebab lit standartna. Bicara lit pe gegehta, tapi la kita ngasup guna ngimbagi cara geluhna banci jadi kita terbuang bas group e. Bas Dibata pe bage. Kalak si enggo ngaloken hak istimewa, tentu harus lit tanggung jawabna. Kai deba tanggung jawabna?

Si pemena tentu njagai gelar tuanna. Selaku budak Kristus kita harus njagai gelar Dibata. Ula curnaken gelar Dibata arah perbahenta. Maka kalak si istimewa nggit terus njagai dirina. Ndauh ia i bas kerina perbahenen si banci erbahanca curna gelar Dibata. Sebab asal bage ilakokenNa situhuna secara tidak langung hak istimewa si lit bas ia e pe banci ka ipertanyaken terdauhen.

Si peduaken kalak si enggo ngaloken hak istimewa ia pe harus ngusih Paulus. Paulus kenca ia iselamatken Dibata, tutus atena guna bermisi. Isadarina ia labo pengkhotbah si sikap, tapi ia motivator dingen penulis si mehuli. Emaka arah talenta si lit bas ia erberita me ia kerna keleng ate Dibata. Jabu si enggo ngaloken hak istimewa lit ka tanggung jawabna. La banci lang jabu e harus jadi jabu si er-Berita Si Meriah. Imulaina arah isi jabu e lebe. Sikeleng-kelengen sada ras si debanna. Terdauhen jabu e pe harus banci jadi saksi kerna keleng ate Dibata arah ketutusenna engkelengi Gereja ras doni enda.

Labo lit hak si la iikuti tanggung jawab. Hak si idatken kita cuma-cuma. Maka kewajiben e pe harusna cuma-cuma. Melala jabu genduari justru ertimbang erbahan keleng ate. Kai ka dat balasna nina rusur bas ukurna. Arah bahan enda, tangkas man banta maka la nai bo man sungkunen kai si banci sialoken, sebab leben nge kita ngalo hak. Kalak si enggo ngalo hak, tanggung jawabna naring ngenca si harus idalankenna.

SELAMAT MENYAMBUT WARI NATAL 2019 & TAHUN BARU 2020

TUHAN SI MASU-MASU KITA KERINA

(Mohon maaf i bas kekurangen kami sedekah tahun 2019)