SUPLEMEN PJJ GBKP TGL. 2 - 8 APRIL 2023

Pdt. Larena br. Sinuhadji (Nd. ReyRapha Tarigan)

Tema : REH BELINNA DINGEN REH TAMBAHNA PEMETEH (Luk. 2:51-52)

[HUT Kategorial - Peringeten 133 Tahun Sehna Berita Si Meriah]

Penaruh

Lit kuan-kuanen si ngatakenca nina, “Menjadi tua itu pasti, menjadi dewasa itu pilihan”. Ertina kedewasaan seseorang tidak ditentukan oleh usianya. Kedewasaan pe maun labo itentuken oleh seberapa tinggi tingkat pendidikan dan jabatan seseorang. Adi siperdiateken peristiwa-peristiwa si viral baru-baru enda, mamang ateta, sebab melala kalak si secara tingkat pendidiken bagepe jabatenna meganjang tapi dahinna pencucian uang hasil mencuri seh ratusen triliun, korupsi, munuh, rsd. Si iarapken tentuna, semakin ertambahna usia, ertambah pemeteh, janah ertambana ka kedewasaanta. Lit kuan-kuanen ilmu padi nina, “semakin berisi semakin merunduk”.

I bas PJJ sendah radu ras kita mengenang kembali (mperingeti) sehna Berita Si Meriah si 133 tahun si lepas enggo isehken missionaris Belanda ku tengah-tengah masyarakat Karo. Penungkunen reflektif man banta kerina e me, enggo seh i ja kedewasaan GBKP?

Mpebagesi Kata Dibata

Ogenta sendah nuriken kerna Yesus si beranjak dewasa. I bas tradisi erkiniteken kalak Jahudi, sekalak anak si beranjak dewasa, kira-kira usia 12 - 13 tahun, enggo jadi “Bar Mitsvah”, ertina “Putra Hukum”, adi diberu “Bat Mitsvah” nina, ertina “Putri Hukum”. Putra entah pe putri hukum enda, wajib ngelakoken kerina Hukum Taurat, termasuk erziarah Paskah ku Jerusalem, entah pe ngikuti rangkaian ibadah Paskah i bas Rumah Pertoton i Jerusalem. I bas hal enda teridah maka Maria ras Jusuf tuhu-tuhu ngelaksanaken tugas tanggung jawabna selaku orang tua si harus mendampingi ras melatih anak-anakna sedini mungkin guna erkemalangen man Dibata.

Adi sioge bindu 2 ay. 46 - 47, je teridah kedewasaan Yesus. Kundul Yesus i Rumah Pertoton, tutus IA megiken pengajaren-pengajaren Guru-guru Agama, nungkun IA, janah mereken tanggapen alu dem kepentaren. Emaka mamang ate kalak kerina megiken tanggapen-tanggapen Yesus, termasuk orang tuanNa. I jenda teridah hasil i bas proses si enggo idalani Yesus. Kundul ras tutus megiken pengajaren e me perlu latihan si labo murah, apai ka nguda denga usia Yesus. Bagepe nungkun ras mereken tanggapen, e pe labo murah, harus lit latihan-latihan guna pang nungkun alu penungkunen ras tanggapen si analitis ras pentar. 

Selanjutna i bas ay. 51 ituriken, “Je nari mulih Yesus ras orang tuaNa ku Nasaret. Kerina si enggo jadi enda itimbangken nandeNa i bas ukurna”. Kai si itimbangken Maria nande Yesus i bas ukurna lit kaitenna ras kejadin i bas ay. 48 - 49, i ja erjabab Yesus nina, “Engkai maka idaramindu Aku? La kin ietehndu Aku harus i Rumah Bapangku?” Enda jawaben polos tapi dem alu kepentaren i bas Dibata nari. Lenga iangka Maria kai si imaksudken Yesus, isimpanna saja i bas ukurna. I bas turi-turin selanjutna radu ras siteh, kenca enggo iidahna kiniseran, kematen, kekeken, ras kenangkihen Yesus ku surga, iangkai Maria kai si imaksudken Yesus i bas jawabenNa ndai (maka kerina geluh Yesus e me guna mewujudnyataken karya penyelamatan BapaNa).

I bas ay. 51 enda pe banci siidah kedewasaan Yesus, i ja Yesus tetap tunduk man orang tuaNa (senantiasa taat, tetap patuh), iikutkenNa orang tuaNa mulih ku Nasaret. Bage pe Maria ras Jusup tetap denga ngelakoken tugas tanggung jawabna alu mehuli i bas mendampingi ras melatih anak-anakna erkemalangen man Dibata.

Selanjutna ay. 52 ituriken, “Yesus pe reh belinna dingen reh tambahna pemetehNa, janah reh tambahna pe ngena ate Dibata ras manusia man baNa”. I bas Alkitab BIS-BIMK nina, “Yesus makin bertambah bijaksana, serta dikasihi oleh Allah dan disukai oleh manusia”. Kata-kata “reh” entah pe “makin” i bas bahasa Indonesia nggambarken maka kedewasaan i bas diri Yesus labo terjadi secara instan, lit je proses menuju kedewasaan sope IA secara full time melayani i tengah-tengah bangsa Israel. Lit waktu si cukup panjang sekitar 18 tahun sope Yesus menaken pelayanenNa i usia 30 tahun (bdk. Lukas 3:23). 

Pengkenaina

Tema i bas PJJ-ta sendah, “Reh belinna dingen reh tambahna pemeteh” i bas rangka mperingeti 133 tahun Sehna Berita Si Meriah (SBM) ku tengah-tengah masyarakat Karo sekaligus mperingeti HUT Kategorial. Labo isingetken i bas BUKU PJJ-ta, kategorial kai? Mungkin si imaksudken i jenda e me Kategorial KAKR. Tema “Reh belinna dingen reh tambahna pemeteh” adina sikaitken ras ogenta sendah tentu mengacu ku kedewasaan iman di dalam Yesus Kristus. Emaka adina rikutken gedang usia 133 tahun SBM tentuna iarapken anggota GBKP enggo dewasa i bas erkiniteken bagepe GBKP secara kelembagaan enggo semakin mehuli i bas penataan kerina pelayanenna.

Versi audio klik https://www.youtube.com/watch?v=2_rOdr4oPGw

Apakah payo anggota GBKP enggo dewasa i bas erkiniteken? Data si rusur sibegi nina, lit sekitar 40% anggota GBKP si proaktif ikut muat bagin i bas dahin-dahin melayani. Si 60% banci ikataken e me anggota GBKP si lenga tutus i bas erkiniteken. I bas si e tentuna patut kita ngataken bujur man Dibata sebab lit progres amin pe mungkin banci ikataken labo meter (lambat). Memang adi soal kiniteken la lit alat si banci mengukur enggo seh i ja kedewasaan erkiniteken seseorang. Tapi kedewasaan erkiniteken banci radu ras siidah ras sigejapken. Emaka mari radu ras siidah ras sigejapken, apakah lingkungen Gerejanta idemi alu kekelengen si tulus, lit pengampunan, ramah, sabar, dem alu penghiburen i bas kecedaan ate, peduli man si lit i bas kiniseran, dem alu sukacita, dem alu dame, rsd.? Adi enggo, puji Tuhan! Adi lenga, mari radu ras kita bertumbuh menuju kedewasaan erkiniteken. Nggit kita erproses, erlajar bagi Yesus, sebab Yesus pe 100% manusia seri ras kita.

GBKP secara kelembagaan, adi siidah ku pudinta, tentu enggo melala kemajun si icapai GBKP secara kelembagaan. Enggo melala penataan-penataan organisasi ras pelayanen si semakin mehuli, amin pe melala denga si man pekenan. I bas hal enda, mari radu ras kita ikut muat bagin i bas mpekena-kena GBKP si malem enda. Bagepe i bas kemajun Kategorial KAKR, mari sinen pembinaan anak ras remaja i bas Gerejanta masing-masing, janah mari radu ras muat bagin i bas kemajun KAKR i bas Gerejanta. Amin pe kita labo pengurus, panitia, pertua entah diaken, jadilah jemaat-jemaat yang proaktif melayani. Dibata si masu-masu GBKP ras kita kerina anggota-anggotana.