Pdt. Larena br. Sinuhadji (Nd. ReyRapha Tarigan)
Teks : Lukas 16:10-12
Tema : TUTUSLAH I BAS SI KITIK
Tujun : Gelah Mamre :
- Ngangkai uga erti ketutusen i bas perkara si kitik
- Tutus i bas ndalanken hal-hal si kitik i bas geluhta (umpamana: Gerakan 2.000, 10.000, rsd.)
Penaruh
Mungkin enggo radu ras siteh peribahasa Melayu, “Sekali lancung ke ujian seumur hidup orang tak percaya”. Lancung ertina palsu, tidak jujur, curang, tidak murni. Jadi peribahasa enda ertina, i bas pergaulan sosial, kalak si la jujur, tidak murni, palsu, entah pe curang, e me kalak si la layak ipercaya. Lancung enda ndai mungkin antitesisna i bas budaya Karo e me “tutus”. Jadi banci ikataken, kalak si la tutus la layak ipercaya.
Mpebagesi Kata Dibata
Perikopta sue ras teksta sendah lit i teruh judul “Tutuslah i bas si kitik” i bas Alkitab TB-LAI bhs. Ind., nina “Setia dalam perkara yang kecil”. Kai si imaksud perkara yang kecil entah pe hal si kitik? Rikutken ay. 11, jelas si imaksud hal-hal si kitik entah pe perkara kecil e me erta doni. Erta doni i bas Alkitab bhs. Ind., nina “mamon”. Kata “mamon” hanya lit i bas dua kitab e me Matius ras Lukas (Matius 6:24; Lukas 16:9, 11, 13). Konteks i bas Matius 6:24 e me kiniarun ate manusia kerna geluhna si erbahanca mamon ijadiken tuanna. Sementara i bas ogenta sendah konteksna erkaiten ras kinilatutusen, kinilabujuren, bagepe la terteki nandangi erta doni. Tutus, bujur, ras terteki akap kami jadi kata-kata kunci.
Tutus i bas Kamus Bahasa Karo ertina, sungguh-sungguh, dengan sepenuh hati, tulus, tidak main-main, tidak setengah hati. Ketutusen ertina, kesungguhan, kerajinan, ketulusan hati. Bujur i bas Kamus Bahasa Karo ertina, jujur, tulus hati, adil, pantas. Terteki i bas Kamus Bahasa Karo ertina, dapat dipercaya. Adi sioge i bas Alkitab TB-LAI bhs. Ind., telu kata enda iterjemahken, “setia”, “benar”, ras “mempercayakan”. Sedangken i bas Alkitab BIS-BIMK, telu kata enda iterjemahken i bas sada kata e me “dipercayai”.
Erta doni enda igolongken sebage hal-hal si kitik, entah pe perkara-perkara kecil, si nilaina ndauh ibandingken erta si tuhu-tuhu e me kegeluhen si rasa lalap. Rikutken ay. 13 jelas i jenda si imaksudken Yesus e me ula sempat erta doni enda si menguasai geluhta. Ula sempat erta doni jadi tuan si mengendaliken kegeluhen kalak si enggo tek man Dibata. Sebab erta doni enda sifatna sementara, murah masap janah la sibaba mate. I bas si e, Yesus ngajuk ajar-ajarNa gelah tutus, bujur ras terteki i bas mengelola hal si kitik e me harta kekayaan doni enda sebage wujud nyata maka kalak si tek enggo datken erta si tuhu-tuhu, e me kegeluhen si dem alu keselamaten si rasa lalap.
Pengkenaina
Tema i bas PA-ta sendah e me “Tutuslah i bas si kitik” alu tujun gelah Mamre ngangkai uga erti ketutusen i bas perkara si kitik, janah Mamre tutus i bas ndalanken hal-hal si kitik i bas geluhta (umpamana: Gerakan 2.000, 10.000, rsd.).
Kecenderungen si terjadi i bas geluh manusia, i bas jaman Yesus bagepe i bas jamanta genduari, menganggap bahwa erta doni enda e me perkara besar, hal si mbelin, hal si penting, paling utama, jadi prioritas rsd. Sementara i bas sudut pandang ajaren Yesus entah pe kiniteken kristiani, erta doni hanyalah sekedar alat guna mpermuliaken gelar Dibata. Emaka ula aru ateta sebab si ncukupken kerina kebutuhen kalak si tek labo duit entah pe erta doni enda, tapi Dibata.
Versi audio silahkan klik https://www.youtube.com/watch?v=A6WkoWGeNAs
Adi bage engkai makana bagi mberat kel man banta guna mereken erta doni si ititipken Dibata man banta guna mpermuliaken gelar Dibata? Khususna guna mendukung pelayanen-pelayanen i bas Gerejanta? Payo, kerina kita butuh sen entah pe erta kebayakan guna kelangsungen geluhta i doni enda. Tapi rikutken ogenta sendah, iajuk kita gelah ula sempat hal-hal si kitik e menguasai geluhta seh makana sen enggo memperbudak kita. Enda tentuna labo hal si murah. Harus lit kiniteken si paguh i bas dirinta seh ngasup kita mengelola erta kebayakenta hanya untuk kemuliaan nama Tuhan Yesus Kristus.
Ogenta sendah ngajuk kita gelah tutus, bujur, ras terteki i bas kita mengelola erta doni si ipercayaken man banta. I bas pengantar i datas, kepercayaan e me hal si penting i bas geluh i doni enda. Lit si ngatakenca, “Uang hilang mudah dicari gantinya, tetapi apabila kepercayaan hilang dengan apa menggantinya?” Emaka mari radu ras kita tutus, bujur, ras terteki i bas erta doni si enggo ipercayaken Dibata man banta. Man banta si lenga nggalar iuren Mamre, Buku PA Mamre, bagepe kerina gerakan-gerakan mpepulung dana guna mendukung pelayanen i bas Lembaga Kategorial Mamre, mari asa gegehta silunasi. Ula sempat gara-gara hal-hal si kitik enda bene erta si tuhu-tuhu e me keselamaten i bas Yesus Kristus bagepe kegeluhen si rasa lalap. Teklah kita maka Dibata si ncukupken kerina kebutuhen geluhta. Sipindo gegeh i bas totonta gelah ipengasupNa kita erkiniteken i bas hal enda. Dibata si masu-masu kegeluhenta.
Tidak ada komentar:
Posting Komentar