SUPLEMEN PA MAMRE GBKP TGL. 5 - 11 MARET 2023

Pdt. Larena Sinuhadji (Nd. ReyRapha Tarigan)

Ogen : 1 Samuel 16:6-13

Tema : PENTAR MILIH PEMIMPIN

Tujun : Gelah Mamre :

- Meteh kuga usaha, cara (keterlibaten) Samuel i bas ndarami dingen milih pemimpin Israel nggantiken Raja Saul alu ersukuten man Dibata

- Ngasup ras nggit makeken kepentaren Dibata guna ndarami pemimpin si tepat

Penaruh 

Lit si ngatakenca nina, “Kepemimpinan adalah suatu gejala universal yang secara defacto sudah ada sejak waktu yang lama dalam sejarah umat manusia dan dijalankan dalam kurun yang panjang”. Ertina usia kepemimpinen e seri ras usia manusia. Adi sioge kitab Kejadin, kenca enggo itepa Dibata manusia dilaki ras diberu enggo mis je ibereken Dibata tugas-tugas guna mimpin. Ertina rikutken kinitekenta, kepemimpinen enggo iciptaken Dibata guna ilaksanaken manusia. Emaka topik-topik entah pe pengajaren si berkaiten ras kepemimpinen selalu relevan guna sipelajari ras sirenungken.

Tema ras tujun PA-ta sendah ngerana kerna kepemimpinen. Lenga iteh kami engkai maka ibahan tema enda? Mungkin lit kaitenna ras Pemilihan Pertua Diaken 2024, entah mungkin lit kaitenna ras Pemilu 2024. La lit keterangen i bas Buku PA Mamreta. Tapi secara positif itanggapi kami, mungkin gelah radu ras kita erlajar kerna kepemimpinen kristiani secara kontinyu. Emaka telu kali berturut-turut tema ras tujun PA-ta erkaiten ras kepemimpinen.

Mpebagesi Kata Dibata

Ogenta sendah akap kami enggo rusur kita ngogesa entah pe megikenca alu judul perikop e me “Daud ipilih jadi raja”. Arah turi-turin kerna pemilihen Daud jadi raja enda, erlajar kita piga-piga hal i teruh enda.

Si pemena, kriteria si ipake Dibata guna milih sekalak pemimpin rikutken ay. 1, e me lit bas ia kepatuhen (taat). Adi sioge benaken bindu 9 nari, awalna Dibata nge si milih Saul jadi raja, tapi i bas perdalanenna Saul la patuh man Dibata, banci sioge bindu 13:13-14 ras 15:13. Labo terjeng la patuh, Saul pe ngelawan perentah Tuhan (15:23). Jadi kriteria si pemena si harus lit i bas sekalak pemimpin rikutken ogenta e me kepatuhen man perentah Dibata. 

Si peduaken, kriteria si ipake Dibata guna milih sekalak pemimpin rikutken ay. 7 e me pusuhna. Bhs. Ind., nina, “Tuhan melihat hati”. Engkai maka pusuh? Pusuh entah pe hati terjemahen i bas bhs. Ibrani nari “lev” entah pe “levav” (bhs. Yunani “kardia”) e me metafora (kiasan) si mengacu ku pusat kehendak, niat entah pe maksud di balik semua perkataan dan perbuatan seseorang. Banci ka mengacu ku kepribadian, kehidupan batin, nurani, watak, atau keadaan emosional seseorang. Jadi “Kupernehen pusuhna” ertina pusuh peraten si bersih si ngena ate Dibata (bdk. Masmur 24:4; Masmur 73:1; Heber 10:22; 1 Petrus 3:21; rsd.). 

Si peteluken, erlajar kita arah Daud. I bas ay. 12 secara penampakan fisik, Daud sekalak anak perana si ngasup merawat dirina alu mehuli. Rikutken kriteria si peduaken i datas, Daud ipilih Dibata jadi pemimpin erkiteken pusuh peratenna si bersih labo terjeng penampakan fisik mejile, sehat, ras matana mejile saja. Janah i bas kitab Masmur nari radu ras siteh maka Daud e me sekalak raja si erkemalangen man Dibata. Emaka i bas diri Daud erkuasa Kesah Si Badia (ay. 13). Selain si e, amin pe pernah ndabuh ku bas dosa, si istimewa i bas Daud, la ia membantah entah pe membela diri sanga ipersingeti Nabi Natan, mis Daud ngaku salah. Sebalikna, Saul lalap membantah, membela dirina sanga ipersingeti Samuel erkiteken kinilapatuhenna man Dibata. Enda salah sada kualitas sekalak pemimpin si mehuli, berani mengakui kesalahan, menyesalinya, mohon ampun dan bertobat.

Si peempatken, erlajar kita arah Samuel, ia sekalak pemimpin si patuh man Dibata, bujur dingen perkeleng ras peduli nandangi bangsana (bdk. 1 Sam. 12:4), pang ia ngataken si benar amin pe nyawa si jadi taruhenna (bdk. 1 Sam. 13:13-14; 1 Sam. 15:19; 1 Sam. 16:2; rsd.). Secara khusus i bas ogenta, ersukuten ia man Dibata i bas ia ngelaksanaken tugas tanggung jawabna, janah lit kesehatian antara ia ras Dibata, seh makana ceda kel ate Samuel erkiteken Saul (bdk. 1 Sam. 15:35). Idungina tugas tanggung jawab pelayanenna sebage pemimpin kalak Israel alu mehuli seh ku kematenna (la ia ngadi i tengah dalan entah pe finishing well - bdk. 1 Sam. 25:1).

Pengkenaina

Tema ras tujun i bas PA-ta sendah ngajuk kita gelah pentar milih pemimpin. I bas kita pentar milih pemimpin enda tentuna leben harus siteh kriteria pemimpin si tepat sue ras peraten Dibata. I bas PA-ta sendah erlajar kita kerna piga-piga kriteria pemimpin si tepat sue ras ogenta, e me:

1. Patuh (taat) man Dibata.
2. Lit bas ia pusuh peraten si bersih si ngena ate Dibata (ikuasai Kesah Si Badia).
3. Ngasup memimpin dirina alu mehuli.
4. Berani mengakui kesalahan.
5. Lit i bas ia kekelengen ras empati (kepedulian).
6. Pang menyuarakan kebenaran kai pe resikona.
7. Ersukuten man Dibata i bas ngelaksanaken tugas tanggung jawabna
8. Lit kesehatian ras Dibata.
9. Ngasup ngelaksanaken tugas tanggung jawabna alu mehuli seh dung.

Emaka i bas kita milih sekalak pemimpin i bas kerina konteksna (Pemilu, Pilkada, Pilkades, Pemilihan RT/RW, Pemilihan Pt./Dk., Pemilihan Pengurus PJJ & Kategorial, rsd.), si pemena, harus iteh kita rekam jejak kerina calon pemimpin. I bas si e harus memang kita “kepo” (kepengen tau), mau mencari informasi berkaiten ras rekam jejak calon-calon pemimpin si bakal sipilih. Adi rekam jejakna la sue ras kriteria pemimpin si tepat, ula sipilih. Emaka ula kita lupa ertoto gelah Kesah Si Badia mereken kepentaren i bas kita milih sekalak pemimpin.

Si peduaken, harus nggit kita ikut muat bagin i bas memilih pemimpin, ula golput entah pe la kita peduli nandangi pemimpin si bakal memimpin kita. Emaka kita si sedekah enda kurang peduli nandangi pemilihan pemimpin i bas konteksna masing-masing, marilah siperobahi gelah kita pe ikut bertanggung jawab i bas memilih pemimpin si benar sue ras peraten Dibata.

Si peteluken, marilah kita ikut muat bagin i bas menciptaken pemimpin-pemimpin masa depan si erkemalangen man Dibata, ibenaken alu pentar kita memimpin diri sendiri gelah jadi usihen anak-anakta.