Pdt. Larena Sinuhadji (Nd. ReyRapha Tarigan)
Teologi Bapa V: Bapa Si Setia
Ogen : Masmur 78:1-8
Tema : LALAP PATUH MAN PERENTAH-NA
Tujun : Gelah Mamre :
1) Ngelumbaken kinitekenna si tetap man Tuhan
2) Setia nuriken perentah Tuhan man isi jabuna
Metode : Diskusi
Penaruh
Kepatuhen man Dibata i bas Pustaka Si Badia rusur ituriken secara individual bage pe secara komunal. Kepatuhen secara individual banci iteh kita arah turi-turin kegeluhen pribadi tokoh-tokoh Alkitab, Abraham, Yusuf, Daniel, Petrus, Paulus, rsd. Kepatuhen secara komunal banci iteh kita arah turi-turin kerna bangsa Israel si radu ras ngelawan Dibata tapi i bas kesempaten si deban radu ras ersembah man Dibata. I bas PA-ta sendah radu ras kita erlajar kerna kepatuhen secara individual si ibaba ku kepatuhen secara komunal erpalasken ogenta sendah.
Mpebagesi Ogen
Ogenta sendah lit i teruh judul perikop “Dibata ras bangsaNa.” Perikop enda merupaken bagin pujin si rusur iendeken bangsa Israel, e me kerna kuasa ras keleng ate Tuhan si harus tetap ituriken, entah pe iajarken, man kerina kesusurenna. Secara khusus si jadi bahan renungenta, maka i je Pemasmur, jelas ngelumbakenca maka Tuhan enggo mereken pedahNa, perentahNa man kesusuren Jakub. Janah tugas nini-nininta ngajarken man anak-anakna. Bdk. i bas Ul. 6, kerna undang-undang pematang si harus iajarken ras isingetken orang tua bangsa Israel man anak-anakna, subuk sanga i rumah, i bas perdalanen, sangana ngadi-ngadi, entah pe sangana erdahin. Lebe orang tua harus nggeluh i bas perentah Tuhan e, je nari iajarkenna. Penting i jenda keteladanan ras pengajaren si la erngadi-ngadi.
Bahkan kai si enggo idalanken orang tua, idalanken anak-anak si arah pudi ka secara estafet. Hal si mehuli si enggo idalanken orang tua, idalanken anak-anakna. Bahkan adi pengajaren Kata Dibata idalanken sekalak nande si sangana natang tuah, maka anak si bas bertinna pe ikut nggejapken Firman Tuhan si ipelajari orang tuana.
Tujunna enggo jelas maka kerina kesusuren si arah pudi tetap ernalem man Dibata, tetap iingetna kerna keleng ate Dibata si enggo iberekenNa. Tetap patuh man perentah Dibata. Janah pengalamen nini-ninina ndube si la malang man Tuhan, si memberontak man Tuhan dingen lit akibatna, banci isilahina. La ia ikut terbawa arus bagi si enggo pernah ilakoken nini-ninina ndube bahkan la terbawa arus jaman erkiteken penalemenna tetap man Dibata ras KataNa.
 |
| Versi Audio silahkan klik : https://youtu.be/nsNlHo75i6E |
Pengkenaina
PA-ta sendah ngajuk kita, khususna kam kerina Mamre kami, gelah jadi “role model” nggeluh erkiniteken man Dibata. “Role model” ertina jadi panutan, usihen, teladan nandangi isi jabuna. Perbulangen nandangi ndeharana. Perbapan, entah pe orang tua, nandangi anak-anakna. Alu bage banci terbentuk jabu-jabu si erkemalangen man Dibata. Jabu e me kap persekutuan si kitikna i bas masyarakat. Lit si ngatakenca, adi jabu-jabu hancur maka masyarakat pe ikut hancur. Emaka la banci lang, keluarga lebe si harus iperlengkapi gelah tetap paguh, nteguh, harmonis seh makana la terbawa arus jaman. Adi sedekah enda enggo kam jadi usihen, puji Tuhan! Sitingkatken kualitasna. Adi lenga, enda paksa si tepat guna kita berobah ku si mehuli sue ras peraten Dibata.
PA-ta sendah ngajuk kita, khususna kam kerina Mamre kami, gelah patuh nandangi perentah Dibata. Pemasmur enggo mereken teladan maka kepatuhen, bage pe kesetiaan, nandangi perentah Dibata erbahanca malem ukurta. Perikop ogenta sendah adi sioge i bas terj. Bhs. Ind., nina “Pelajaran dari sejarah. Nyanyian pengajaran Asaf,” ertina kita pe harus belajar dari pengalaman masa lalu, khususna i bas erkiniteken man Dibata. Melala si banci sipelajari i bas masa lalu nari, baik pengalamen si mehuli bage pe pengalamen si la mehuli, gelah alu bage reh mehulina pengkebet geluhta sue ras peraten Dibata. Pindolah gegeh i bas Dibata nari gelah ipengasupNa kita, khususna kam kerina Mamre GBKP, lalap patuh man perentahNa.
Tidak ada komentar:
Posting Komentar