SUPLEMEN PA MORIA GBKP TGL. 14 - 20 JUNI 2026

Pdt. Larena Sinuhadji (Nd. ReyRapha Tarigan)

Cara Manusia Mengasihi Allah

Si Man Ogen : Ulangen 12:29-32

Tema : SETIA ERSEMBAH MAN TUHAN DIBATA

Tujun : Gelah Moria:

- Meteh kata persinget Tuhan Dibata man bangsaNa

- Nulisken orat nggeluh kalak si setia ersembah man Tuhan Dibata

Metode : Diskusi

Penaruh

Setia e me salah sada karakter kristiani rikutken ulih Kesah Si Badia i bas Gal. 5:22-23. Janah Pustaka Si Badia pe rusur nuriken kerna kesetian Dibata entah pe pengajuk man banta gelah setia. Ertina karakter setia enda penting i bas kinitekenta janah rusur isingetken gelah silakoken i bas kegeluhenta si tep-tep wari, khusuna kerna kesetianta erkiniteken man Dibata i bas Yesus Kristus. I bas PA-nta sendah mulihi kita erlajar kerna karakter setia.

Mpebagesi Si Man Ogen

Perikop si man ogenta sendah lit i bas bagin aturen-aturen entah pe hukum-hukum sentral i bas Kitab Ulangen (bindu 12-26). Bagin enda rusur isebut “Deuteronomic Code” kenca pengakun kiniteken Israel si igelari “Shema” i bas Ul. 6:4-5. Fokus utamana e me gelah bangsa Israel nggeluh setia man Dibata i bas taneh perjanjian e me Kanaan.

Secara historis bagin enda lit i bas konteks bangsa Israel si sangana lit i bas proses bengket ku taneh Kanaan, janah seterusna kari tading berdampingan ras bangsa-bangsa Kanaan si kinitekenna berbeda: nembah Baal, Asyera, ritual kesuburan, bage pe lit ritual pengorbanen anak. Kerina ritual agama bangsa-bangsa Kanaan ndai la sue ras peraten Dibata. Banci ikataken ancamen man bangsa Israel kenca enggo tading i Kanaan labo soal politik, tapi soal asimilasi kiniteken si berbeda. Lit kemungkinen maka bangsa Israel terpengaruh kiniteken-kiniteken si deban si la sue ras peraten Dibata ndai.

Secara khusus bindu 12 mereken persinget man bangsa Israel kerna pentingna ersembah man Dibata. Bangsa Israel la banci beribadah ate-atena saja entah pe ngikutken cara ersembah bangsa-bangsa si deban. Bangsa e harus beribadah alu cara ras ingan si itentuken Dibata. Emaka hal penting si pemena i bas ogenta sendah e me persinget si tegas kerna sinkretisme (pencampuran iman kepada TUHAN dengan praktik agama lain). Ula sempat sada pe bangsa Israel si ngelakoken sinkretisme. Si peduaken, iajuk bangsa e gelah tutus setia beribadah man TUHAN Dibata saja, si enggo mulahi bangsa e i bas perbudaken Mesir nari. Ay. 32 i bas terj. Bhs. Ind., ikataken bagenda nina, “Segala yang kuperintahkan kepadamu haruslah kamu lakukan dengan setia, jangan menambahinya ataupun menguranginya.” Lit je kata “setia” sue ras tema PA-nta sendah.

Pengkenaina

Kegeluhen i bas jamanta si gundari enda akap kami menam seri ras kegeluhen bangsa Israel sanga jaman Musa. Praktek-praktek sinkretisme secara terang-terangan bage pe si terselubung, menyembah dua tuhan, masih denga lit si ngelakokenca. Lit denga kita si ku Gereja, tapi ingan pajuh-pajuhenna pe lit. Sipindo pertoton i bas Pdt./Pt./Dk. nari, tapi ku dukun ka nungkun. Teridah bagi si tutus ku Gereja, tapi i bas kegeluhenna si tep-tep wari la pernah ertoto, apai ka ngoge Pustaka. Kerina keputusen i bas geluhna ibahanna erpalasken gegeh beluhna. Enda akap kami menam seri ka nge ras sinkretisme, men-tuhan-kan diri sendiri.

Alu bage PA-nta sendah, si pemena lebe, mulihi ngingetken kita kerna 10 Perentah Dibata Tuhan, khususna i bas perentah si pemena ras si peduaken, “Ula sembah dibata-dibata si deban, seakatan Aku. Ula bahan man bandu gambar-gambar kerna kai pe si lit i langit entah i doni, entah pe si i bas lau i teruh doni. Ula kam nembah erjimpuh man gana-gana, erkiteken Aku kap TUHAN Dibatandu si percemburu. Kuukum kalak si rate nembeh man bangKu, seh ku kesusurenna sundut si peteluken ras si peempatken” (Ul. 5:7-9). Adi lit denga kita si ngelakoken sinkretisme baik secara terang-terangan bage pe terselubung, bertobatlah!

Si peduaken, tema bage pe tujun PA-nta sendah, ngajuk kita kerina gelah setia ersembah man Dibata. Kesetiaanta ersembah man Dibata teridah arah pengkebet geluhta. Tapi si tuhu-tuhu meteh maka setia kita ersembah man Dibata, e me Dibata ras dirinta sendiri. Sebab banci saja arah lebe teridah setia, tapi arah pudi ersembah ka kita man dibata-dibata si deban, termasuk men-tuhan-kan diri sendiri. Pindolah gegeh i bas Dibata nari gelah ipengasupNa kita setia ersembah man baNa.