SUPLEMEN PJJ GBKP TGL. 14 - 20 JUNI 2026

Pdt. Larena Sinuhadji (Nd. ReyRapha Tarigan)

BELUH MUAT UKUR - 1 Timotius 5:1-7

(PJJ Intergenerasional: Fokus Keluarga - Ilakoken I Bas Jetro)

Penaruh 

Adi sisungkun AI erti kata “intergenerasional,” bagenda nina, “Intergenerasional adalah segala sesuatu yang melibatkan, berkaitan dengan, atau terjadi di antara dua atau lebih kelompok generasi yang berbeda (seperti antara anak-anak, remaja, orang dewasa, dan lanjut usia). Pendekatan ini sangat populer dalam upaya membangun komunikasi, pemahaman, dan kolaborasi untuk menjembatani kesenjangan antargenerasi di berbagai bidang.” Istilah “intergenerasional” enda, asa penginget kami, enggo ipetandaken man banta kerina benaken tahun 2025 nari, mungkin alu tujun gelah reh mehulina komunikasi bage pe pemahamen kiniteken bersama antar generasi si berbeda i bas konteks GBKP. Emaka PJJ-nta sendah iarapken ilakoken i bas Jetro masing-masing, gelah reh ndeherna jabu-jabu sada ras si debanna, rikut ras orang tuanta si enggo lansia, anak-anak, bage pe kaum muda-mudi. 

Mpebagesi Ogen

Surat Paulus man Timotius termasuk ku bas kelompok surat-surat pastoral si salah sada tujunna e me gelah pemimpin-pemimpin Gereja paksa si e reh beluhna mimpin Gereja khususna i bas menata kegeluhen perpulungen ku si mehuli sue ras peraten Dibata. Ogenta sendah lit i teruh judul perikop “Tanggung jawab nandangi kalak Kristen.” I bas Alkitab terj. Bhs. Ind., bindu 5 ibagi ku bas telu perikop, si pemena ay.1-2 “Mengenai saudara-saudara seiman.” Si peduaken ay. 3-16 “Mengenai janda.” Si peteluken ay. 17-25 “Beberapa petunjuk dan nasihat lagi.”

Arah pembagin perikop enda teridah maka, lit telu kategori perpulungen si membutuhken pelayanen khusus. Si pemena, kelompok perpulungen si usiana enggo metua (lansia). Lit metode khusus i bas melayani kalak si enggo metua. Lit ka cara si khusus i bas ngelai perpulungen si usiana nguda denga. Si peduaken, kelompok perpulungen si enggo mbalu, lit ka cara si khusus i bas ngelai perpulungen si enggo mbalu rikutken konteks si terjadi paksa si e. Janah si peteluken kelompok Serayan. Man Serayan pe lit pelayanen si khusus, si labo seri ras pelayanen man si deban. Si jadi fokus i bas PA-ta sendah termasuk ku bas bagin si pemena ras si peduaken, pelayanen man lansia, usia muda, bage pe man perpulungen si enggo mbalu.

I bas ay. 1-2, iajarken Paulus Timotius gelah ngelai alu mehuli perbapan, pernanden, ras kalak si usiana tuan asangken Timotius. Otoritas pastoral harus idalanken alu relasi si dem alu keleng ate ras kehamaten. Man perpulungen si usiana ngudan asangken Timotius, Paulus ngajarkenca gelah ngelai bagi sekalak kaka man agina. Bage pe man diberu si nguda denga, bahanlah bagi turangna janah harus ngelai alu bersih lagu langkahna, i bas terj. Bhs. Ind., “dengan sikap yang murni.” Enda kaitenna ras pentingna integritas moral i bas relasi pastoral. I jenda Paulus mereken pengajaren man Timotius kerna “eklesiologi relasional,” i ja gereja labo terjeng iangkai secara organisasi tapi si utamana e me membangun jaringan persahabatan dan kekerabatan rohani.

Ay. 3-4, e me pelayanen man diberu si enggo mbalu. Kata “mehamatlah” (hormatilah - Yun.: timaō) i bas ay. 3, ertina labo terjeng ngergaken secara emosional tapi pe mereken dukungen secara materi. Tapi i bas si e Paulus mbedakenca diberu mbalu si lanai ersima-sima (benar-benar hidup seorang diri - miskin), ras diberu mbalu si lit denga keluargana. Berekenlah dukungen materi man diberu mbalu si lanai ersima-sima. Tapi man diberu mbalu si lit denga keluargana, iajuk gelah keluargana ikut bertanggung jawab mperdiatekenca. Ertina i jenda Paulus mereken pengajaren man jabu-jabu gelah tuhu-tuhu mperdiateken anggota keluargana si lit i bas perbeben entah pe kiniseran. I jenda teridah maka lit tanggung jawab domestik ras sosial i bas nggeluh erkiniteken.

I bas ay. 5-7, Paulus ngajuk diberu mbalu-mbalu si lanai lit sima-simana, ula terjeng ngaloken penampat, tapi jadilah usihen i bas nggeluh erkiniteken ras erpengarapen man Dibata. I jenda teridah maka kondisi nggeluh si mesera seharusna labo jadi penghalang entah pe alasen i bas erkiniteken ras erpengarapen man Dibata. Sebab i bas kondisi nggeluh si bage rupana lit spiritualitas ketergantungan man Dibata si tuhu-tuhu. Man diberu mbalu-mbalu si geluhna serba berkecukupan, ula pakeken situasi e guna nggeluh alu gaya hidup hedonis, entah pe geluh egois guna pesenangken dirina saja. Geluh egois erbahanca kiniteken man Dibata terganggu, entah pe mengalami kematian spiritual. Emaka iajuk Paulus Timotius gelah ngajarkenca kerinana man perpulungen gelah kerina perpulungen nggeluh alu la erpandangen sue ras peraten Dibata.

Pengkenaina

PJJ-nta sendah lit i teruh tema “Beluh muat ukur.” Tema enda akap kami ibuat i bas ay. 1 nari ogenta. Adi sioge i bas terj. Bhs. Ind., nina “tegorlah dia sebagai bapa” entah pe “ajaklah dia mendengarkan kata-katamu seolah-olah ia bapakmu.” Enda akap kami antusenna erkaiten ras komunikasi si asertif i bas konteks kearifan lokal budaya Karo. Rikutken informasi i bas AI nari, nina, “Komunikasi asertif adalah kemampuan menyampaikan pikiran, perasaan, dan kebutuhan secara jujur dan tegas tanpa merugikan atau menyakiti perasaan orang lain. Ini adalah keseimbangan ideal antara komunikasi pasif (terlalu mengalah) dan agresif (menyerang atau mendominasi). Gaya komunikasi ini berpusat pada rasa saling menghargai untuk mencapai kesepakatan bersama.”

Beluh muat ukur adi siterjemahken ku Bhs. Ind., kira-kira menam seri ras “pandai mengambil hati.” Beluh muat ukur i jenda tujunna tentu labo guna keuntungen pribadi sue ras sura-sura doni enda. Tapi guna mpeteguhi kiniteken ras si pentingna kel guna memotivasi ngelakoken kerina si jadi peraten Dibata. Enda si ateta ikomunikasiken, baik orang tua man anak, anak man orang tua, lansia man kalak si nguda denga, bage pe sebalikna, kalak si nguda denga man lansia, baik i tengah-tengah jabu masing-masing bage pe i tengah-tengah perpulungen kalak si tek.

Rasul Paulus i bas ogenta sendah pe ngajarkenca man Timotius gelah berkomunikasi secara asertif erpalasken kiniteken man Dibata i bas Yesus Kristus. Alu bage nilai-nilai konkrit kiniteken man Dibata i bas Yesus Kristus banci ialoken ras ilakoken kerina perpulungen. I bas si e, kita pe iajuk gelah terus erlajar kerna Kata Dibata, bage pe terus erlajar berkomunikasi secara asertif erpalasken kiniteken man Dibata i bas Yesus Kristus. Gelah alu bage Kata Dibata banci teraloken kerina kalangan, janah Kata Dibata banci silakoken i bas kegeluhenta si tep-tep wari. Pindolah gegeh i bas Dibata nari gelah ipengasupNa kita ngelakokenca.