SUPLEMEN PA MAMRE GBKP TGL.14 - 20 JUNI 2026

Pdt. Larena Sinuhadji (Nd. ReyRapha Tarigan)

Teologia Bapa VI : Bapa Si Mandiri

Ogen : Kuan-kuanen 10:1-5

Tema : MAMRE SI MEJINGKAT RAS PENTAR

Tujun : Gelah Mamre:

1) Meteh biak Mamre si ngasup ncukupi keperlun jabu sue ogen

2) Encidahken biak Mamre si mandiri

Penaruh

Adi sidarami i bas internet, melala kata-kata bijak alu topik kinijingkaten, umpamana: “Tidak ada keberhasilan yang dapat dicapai hanya dengan sikap santai, gampang putus asa dan menunggu.” “Kerja keras, ulet mencari dan menciptakan kesempatan harus dilatih sejak dini.” “Proses tidak pernah mengkhianati hasil.” “Orang-orang hebat sepanjang sejarah adalah mereka yang lebih banyak bekerja daripada berbicara.” Tujun kata-kata bijak enda tentuna guna memotivasi ise pe si ngogesa gelah semangat bekerja, mejingkat, la murah putus asa, anti mekisat, rsd. I bas kesempaten enda erlajar kita mulihi kerna kepentaren, kinijingkaten, ras Mamre si mandiri i bas kai pe.

Mpebagesi Ogen

Adi siperdiateken umumna materi pengajaren i bas Kuan-kuanen 10:1-31:31 bersifat teknis, praktis ras rikutken pengalamen geluh si tep-tep wari, si tujunna gelah si ngogesa berhasil ras berguna baik guna pribadi bage pe guna kesejahteraan masyarakat. Sebage contoh i bas perikop enda, ijumpai pengajaren kerna kinijingkaten si ibadingken ras kemalasen i bas musim panen. Secara khusus i bas perikop ogenta ibere judul “Pertenget Salomo” (TB-LAI, “Kumpulan amsal-amsal Salomo”) si isina kerna dua karakter si saling berlawanen - “pararel antitesis,” umpamana anak pentar ras lenge, kebayaken ulih kejahaten ras kebayaken ulih kebujuren, kalak bujur ras kalak jahat, kalak malas ras mejingkat rsd.

I bas ay. 1 anak si pentar jadi keriahen bapana, tapi kebalikenna, anak si lenge erbahanca ceda ate nandena. Arah ayat enda penting kel gelah anak megiken ajar orang tua (ajaren kepentaren). Janah ayat enda pe ncidahken relasi sada ras si debanna i tengah-tengah keluarga. Terlebih i bas masyarakat Israel kuno sangat penting peran keluarga. I bas ayat enda telu anggota jabu si isebutken secara bersamaan e me: bapa, nande ras anak. Anak bergantung man orang tua bage pe sebalikna. Anak si pentar tuhu-tuhu maba keriahen man orang tuana, kebalikenna, anak si lenge erbahanca ceda ate orang tuana. Pengajaren enda penting, sebab karakter ras reputasi anak sebage pewaris menentuken labo saja kebahagiaan orang tua tapi pe keberlangsungen geluh sada keluarga ras status sosialna i bas masyarakat. Janah ayat enda pe sebage penjemba man orang tua guna mendidik anak-anakna jadi kalak pentar bahkan labo terjeng pengajaren, orang tua pe tuhu-tuhu jadi usihen.

Ay. 2-5 e me kerna kebayaken ras cara ndatkenca. Ay. 2 isina peringatan kerna kinibayaken ras kejahaten janah ibandingken ras kebujuren. Kinibayaken ulih kejahaten labo maba keuntungen. Banci jadi senembas menguntungken tapi situhuna maba cilaka. Ertina, kinibayaken ulih erbage kejahaten, kinilabujuren, cara kekerasen, kinilaadilen, rsd. Kedungenna labo terjeng la maba keuntungen, tapi pe maba kematen (nehen antitesis ay. 2b, “Kebujuren mulahi kalak i bas kematen nari”). Janah i bas ay. 3 Salomo mereken kata persinget nandangi pengkawali ras pemeliharaan Tuhan man kalak bujur. Kebalikenna, sura-sura kalak jahat la banci erdalan, la ipebentas Dibata. Rikutken keadilen Tuhan, maka kalak bujur geluhna ipasu-pasu Tuhan ras kalak jahat (fasik) ihukum Tuhan.

Selanjutna ay. 4 e me kerna sikap (karakter) i bas kita manusia. Lit deba mekisat, lit ka mejingkat. Rulih adi mejingkat e me kebayaken tapi kebalikenna adi mekisat kita, musil nge. Kemusilen rikutken ayat enda banci irobah alu sikap hidup si rajin. Hal enda ncidahkenca maka kemusilen si nimaksud i jenda terjadi murni erkiteken kemalasan, labo erkiteken penindasan, entah pe sistem si la adil. Emaka banci denga sikap geluh e siperobahi, perkisat jadi mejingkat. Janah i bas ay. 5 mulihi Salomo mereken pengajaren maka kalak pentar, rani i bas paksana. Ertina, kinijingkatenna, semangatna, kebujurenna (kerja keras, kerja cerdas, kerja tuntas) ulihna e me kerina si mehuli. Sebalikna kalak si ersura-sura bayak secara materi tapi la nggit bekerja keras, ibahanna hal-hal si la mehuli: nangko, korupsi, memeras, pinjol, judol, rsd.

Pengkenaina

Gaya bahasa Salomo si nuriken dua karakter si saling berlawanen (“pararel antitesis”) tujunna jelas gelah kerina si ngogesa rukur lebe sope ngelakoken kai pe. Sebab kerina tindakenta lit konsekuensina. Secara khusus i bas PA-ta sendah, iajuk kam kerina Mamre gelah, si pemena, nggit ertimbang, rukur lebe alu mehuli kerna dampak-dampak entah pe konsekuensi i bas kerina si ilakokenndu. Iajuk kam kerina gelah pentar, entah pe rukur alu mehuli kerna dampak-dampak entah pe konsekuensi kepentaren ras kinilapentaren, bage pe konsekuensi kinijingkaten ras kinilajingkaten.

Si peduaken, sue ras tema PA-nta sendah e me “Mamre si mejingkat ras pentar,” leben harus siakuken maka kepentaren ras kinijingkaten rehna i bas Dibata nari si harus terus siukurken ras silakoken i bas kegeluhenta si tep-tep wari. Erkiteken pentar ras mejingkat enda biak-biak (karakter), maka harus terus-menerus ilatih i bas kegeluhenta si tep-tep wari. I bas si e pindolah gegeh i bas Dibata nari gelah ipengasupNa kita tekun berlatih, ngukurkenca ras ngelakokenca i bas geluhta si tep-tep wari.

Si peteluken, ulih kepentaren ras kinijingkaten e me kinibayaken. Kinibayaken i jenda labo terjeng erkaiten ras hal-hal si sifatna materi ngenca. Tujun utamana e me ngelakoken kerina si jadi peraten Dibata sebage wujud nyata pengataken bujurta erkiteken keselamaten i bas Yesus Kristus si enggo leben ialoken kita. Ulih si terulin asangken erta kebayaken e me pasu-pasu, kesangapen ras kedamen. Kepentaren ras kinijingkaten enda harus iajarken man anak-anakta kitik-kitik nari arah pengajarenta bage pe teladanta.

Si peempatken, tema umum bage pe tujun PA-ta sendah ngajuk kam kerina Mamre gelah semakin mandiri i bas kai pe. Adi soal mandiri i bas encari guna kebutuhen geluh si tep-tep wari, tentu enggo lanai man ajaren. Tapi guna ncukupken kerina keperlun jabu, i bas kinatana, labo terjeng keperlun si sifatna materi ngenca. Anak jabu pe perlu hal-hal si deban, umpamana, perhatian, komunikasi, nggit megiken keluh kesah, jadi teman curhat man anak-anak, janah si pentingna kel, jadi usihen ras ngasup mabai jabu ku hal-hal si mehuli sue ras peraten Dibata. Mandiri i jenda pe maksudna, enggo lanai man iah-iahenken i bas erkiniteken man Dibata. Lit kesadaren ras niat i bas diri Mamre guna ertoto, ngoge Pustaka, ikut muat bagin i bas kegiaten-kegiaten Gereja, rsd.-na. Pindolah gegeh kepentaren i bas Dibata nari, gelah ipengasupNa kam kerina Mamre guna ngelakokenca.