SUPLEMEN PA MORIA GBKP TGL. 21 - 27 JUNI 2026

Pdt. Larena Sinuhadji (Nd. ReyRapha Tarigan)

Cara Manusia Mengasihi Allah

Si Man Ogen : 1 Petrus 1:13-16

Tema : BADIA I BAS KERINA PERBAHANEN

Tujun : Gelah Moria :

- Meteh cara nggeluh badia selaku anak-anak Dibata

- Nuratken kata pengajuk gelah nggeluh metenget nandangi sura-sura doni

Metode PA : Puzzle

Penaruh

I bas kegeluhenta si tep-tep wari, rusur kita ngadapi erbage-bage pilihen. I bas erbage pilihen e, rusur kita erbebe, bergumul, apakah sipilih ngelakoken si mehuli entah si jahat? Sedekah kita nggeluh i doni enda, lalap lit dua pengaruh si saling bertentangan ras saling tarik-menarik, e me kekuatan kebaikan ras kekuatan kejahatan. I bas Pustaka pe pemahamen kerna tarik-menarik antara kecenderungen guna ngelakoken si mehuli sue ras peraten Dibata, biasana isebut “sura-sura Kesah Dibata,” ras kecenderungen guna ngelakoken si jahat isebut “sura-sura daging.” Salah sada contoh umpamana perbeben kalak si tek i bas Gal. 5:24 ras Kol. 3:5, i ja kalak si tek iajuk gelah ngelawan kerincuhen entah pe sura-sura daging.

I bas kesempaten enda radu ras kita erlajar kerna nggeluh badia sue ras sura-sura Dibata erpalasken si man ogenta sendah.

Mpebagesi Si Man Ogen

Surat Petrus si pemena ialamatken man kalak Kristen si merap i belang-belang bagin utara Asia Kitik. I bas surat enda kalak Kristen igelari “bangsa pilihen Dibata.” Tujun surat Petrus si pemena enda e me mpegegehi ukur si ngogesa si sangana iayak-ayak dingen ngenanami kiniseran erkiteken kinitekenna man Yesus. Guna si e, Petrus ngingetken kalak si ngoge suratna e nandangi Berita Si Meriah kerna Yesus Kristus, i ja kematenNa, kekekenNa, ras kerehenNa, si enggo ipadankenNa mereken pengarapen man banta kerina. Erkiteken si e, kalak si tek la banci lang harus megenggeng i bas kiniseranna, sebab kiniseran e sada ujian nandangi kinitekenna si sejati, janah la banci lang kerina kalak megenggeng ngaloken pemere asum kerehen Yesus si peduakaliken. Janah kerina kalak si tek iajuk alu mesangat gelah nggeluh bagi kalak si enggo jadi sikerajangen Dibata i bas paksa kesusahen.

Ogenta sendah lit i teruh judul “Kegeluhen si mbaru man anak-anak Dibata” i bas terj. Alkitab TB-LAI Ed. II nina, “Kekudusan dan kasih persaudaraan.” I bas ogenta sendah, iajuk Rasul Petrus kerina perpulungen si sangana ngenanami kiniseran si mberat, gelah, si pemena, tetap erpengarapen nandangi pasu-pasu si pagin ibereken Dibata sanga kerehen Yesus si peduakaliken. Tapi i bas erpengarapen e labo terjeng kem saja, entah pe pasrah, menyerah pada keadaan. Iajuk Petrus perpulungen gelah tetap nikapken ukur ras metenget (waspada) katawari pe. “Sikapken ukur” i bas terj. BIMK nina, “hendaklah kalian siap siaga.”

Si peduaken, perpulungen imotivasi gelah tetap erkemalangen man Dibata, ngikutken sura-sura Dibata alu nggeluh badia. I bas terj. BIMK nina, “Taatlah kepada Allah, dan janganlah hidup menurut keinginanmu yang dahulu, pada waktu kalian masih belum mengenal Allah. Sebaliknya, hendaklah kalian suci dalam segala sesuatu yang kalian lakukan, sama seperti Allah yang memanggil kalian itu suci.” I bas ay. 14 ras 15 lit kesan tersirat maka lit perbeben si mberat i bas diri perpulungen antara nggeluh ngikutken sura-sura daging entah nggeluh i bas kegeluhen si mbaru alu ngikutken sura-sura Dibata. I bas si e tentu Rasul Petrus erpengarapen gelah perpulungen kalak si tek paksa si e tetap megenggeng nggeluh badia alu ngikutken sura-sura Dibata amin pe mberat konsekuensina.

Pengkenaina

I bas kesempaten enda, amin pe ndauh ulin geluhta asangken perpulungen paksa Rasul Petrus, iajuk kita gelah tetap erpengarapen alu tetap waspada setiap saat, sebab Iblis imbangta e gawah-gawah ku jah ku je bagi sada singa si erngaung ndarami si man jergemenna (1 Pet. 5:8). Berikutna, iajuk pe kita gelah tetap nggeluh erkemalangen man Dibata, alu ngikutken sura-sura Dibata, e me hidup di dalam kekudusan, entah pe nggeluh badia.

Tema bage pe tujun PA-nta sendah mulihi ngingetken kita kerna identitasta selaku kalak si enggo ngaloken keselamaten i bas Kristus. Konsekuensina e me nggeluh badia i bas kerina perbahanen. Mehuli akap kami sope iwujudnyataken i bas perbahanen, nggeluh badia e harus sibenaken perukuren. Sebab melala kalak teridah badia i bas perbahanenna, tapi pusuh ukurna macik, lit niat entah pe maksud-maksud si deban si labo sue ras peraten Dibata. Emaka mehuli i bas kerina perbahanen e hanya dirinta sendiri ras Dibata si metehsa kai palasna. Adi palasna keleng ate Dibata, maka kai pe si ibahan kita labo guna kepentingen diri sendiri tapi guna kemulian gelar Dibata.

Sendah akap kami sada kesempaten si ibereken Dibata guna radu ras kita mengevaluasi diri ras bertekad guna nggeluh sue ras sura-sura Dibata. Memang labo murah, sebab lit denga kerincuhen daging i bas dirinta. Tapi adi sipindo gegeh man Dibata, tek kita maka kerincuhen daging labo ngasup engkuasai dirinta. Emaka ula sempat kita ngadi ertoto mindo gegeh i bas Dibata nari. Janah sada hal si labo kalak pentingna, e me dukungen arah lingkungenta nari. Marilah sibahan lingkungan pertemanan, i bas bahasa si gundari “circle” nina, si membangun sada ras si debanna. Saling menopang dalam doa, saling mengingatkan, saling mendukung, saling memberi motivasi, rsd. Alu bage nggeluh badia i bas kerina perbahanen e banci iwujudnyataken i bas kegeluhenta si tep-tep wari. Dibata si mpengasup kita kerina.