Pdt. Larena Sinuhadji (Nd. ReyRapha Tarigan)
Konfesi V: Pustaka Si Badia
Ogen : Mazmur 119:105
Tema : KATA DIBATA KAP TENDANG
Tujun : Gelah Mamre :
1) Meteh kerina isi Pustaka Si Badia e me rehna arah Dibata nari ras ertujun guna mbangun ras ngkuhi geluh kalak si tek
2) Ertutus ate ngoge Pustaka Si Badia
Penaruh
Konfesi, entah pe pengakun kiniteken GBKP, ibenaken alu pengakun kerna Pustaka Si Badia entah pe Alkitab. Enda ncidahkenca maka Pustaka Si Badia e seh kel pentingna i bas kinitekenta. Memang tuhu, Pustaka Si Badia e me sumber utama berita keselamaten i bas Yesus Kristus. Adi la lit Pustaka Si Badia, banci jadi berita keselamaten e labo seh man banta kerina. Emaka i bas kesempaten enda radu ras kita mulihi erlajar kerna pentingna Pustaka Si Badia i bas kinitekenta erpalasken ogenta sendah.
Mpebagesi Ogen
Masmur 119 e me bindu si gedangna i bas Putaka Si Badia, lit 176 ayat. Rikutken AlkiPEDIA, Mas. 119 masuk ku bas kelompok Mazmur kepercayaan dan pengabdian yang mengungkapkan: 1) Kepercayaan seseorang akan integritas Allah dan pertolongan kehadiranNya. 2) Pengabdian hati kepada Allah. Rikutken Wikipedia, lit tradisi si ngatakenca maka Mas. 119 enda ipake Daud guna ngajari Salomo kitik-kitik nari seh ngayak dewasa. Alkitab TB-LAI mereken judul perikop ay. 1-176 e me “Bahagianya orang yang hidup menurut Taurat TUHAN.” Sedangken i bas Alkitab edisi BIMK bage pe i bas terj. Bhs. Karo, perikop enda ibagi ku bas piga-piga judul perikop. Si jadi ogenta sendah lit i bas perikop ay. 105-112 alu judul “Undang-undang TUHAN mereken terang.”
Ogenta sendah sada ayat ngenca e me ay. 105, “KataNdu kap tendang man nahengku, nerangi dalan si kudalani,” i bas terj. Bhs. Ind., nina, “FirmanMu itu pelita bagi kakiku dan terang bagi jalanku.” Ayat enda sangat populer erkiteken lit laguna si rusur iendeken kita sope ngoge ras megiken Kata Dibata i bas PJJ, PA-PA Kategorial, rsd.-na. Amin pe enggo rusur siendeken, radu ras mulihi kita erlajar kerna ogenta sendah. Kai kira-kira antusen ayat si jadi ogenta sendah?
Si pemena, Kata Dibata e me pelita si fungsina alat penerangan. Pelita i bas jaman si nai kitik ngenca terangna, hanya ngasup nerangi sada dua langkah ku lebe man kalak si erdalan nahe i bas gelap. Amin pe kitik terangna, tapi penting fungsina, gelah kalak si erdalan i bas gelap e la ndabuh erkiteken terantuk batu entah pe kena alangen si deban si lit i bas dalan. Alu gambaren enda ate Pemasmur ngatakenca maka geluh kalak si tek harus bergantung sepenuhna ku Kata Dibata gelah ula ndabuh ku bas erbage hal si la ngena ate Dibata i tengah-tengah doni si dem alu dosa enda.
Si peduaken, gambaren nahe encidahkenca kegeluhen si tep-tep wari si harus terus idalani ras ibentasi. Erbage-bage peristiwa si terjadi i bas kegeluhen si tep-tep wari: suka-duka, sehat-sakit, berhasil-gagal, rsd.-na. Kai pe situasi si terjadi, kalak si tek ula sempat ngadi, janah ula sempat papak, erkiteken enggo lit pedomanta, e me Kata Dibata, si nuduhkenca man banta dalan ku keselamaten.
Arah ogenta sendah teridah maka enggo tuhu-tuhu igejapken Pemasmur uga luar biasana Kata Dibata negu-negu kegeluhenna. Ogenta sendah banci ikataken kesaksin Pemasmur maka Kata Dibata e seh kel pentingna i bas kegeluhenna. Kata Dibata erbahanca geluh Pemasmur e jelas arahna, sue bage tema PA-nta sendah, Kata Dibata kap terang. Janah i bas dampar si deban, idatken Pemasmur gegeh arah Kata Dibata nari i bas ia ngalaken erbage-bage tantangen geluhna i doni enda.
Pengkenaina
PA-ta sendah ngajuk kita kerina, khususna kam kerina Mamre, gelah semakin engkelengi Kata Dibata i bas Pustaka Si Badia. Keleng ate memang banci muncul dengan sendirinya, tapi keleng ate pe banci ka lit erkiteken itumbuhkembangken i bas dirinta. Lit kuan-kuan kalak Jawa nina, “Witing tresno jalaran soko kulino” ertina cinta itu akan tumbuh seiring berjalannya waktu karena semakin terbiasa. Emaka i bas PA-nta sendah mari radu ras situmbuhkembangken rasa cinta nandangi Pustaka Si Badia i bas kegeluhenta si tep-tep wari. Enda akap kami menjawab tujun si peduaken i bas PA-ta sendah, keleng ate nandangi Kata Dibata erbahanca reh tutusna kita ngoge Kata Dibata i bas Pustaka Si Badia.
Tujun si pemena PA-nta sendah akap kami lit kaitenna ras Konfesi GBKP kerna Alkitab. I bas Konfesi GBKP si ngakuken kerna Alkitab i bas Bab I, poin si pe-6-ken ikataken bagenda nina, “Alkitab adalah dasar kehidupan orang Kristen (Mzm. 119:105) yang merupakan dasar pengajaran, nasehat dan penuntun tingkah laku (2 Tim. 3:16).” Tegas je ikataken maka la lit palas si deban selain Pustaka Si Badia si jadi palas kegeluhen kalak si tek. Adi palasta paguh maka la lit kai pe si ngasup menghancurkan kegeluhenta. Selanjutna i bas poin si pe-7-ken ikataken, “Pemahaman dan penghayatan yang benar akan Alkitab hanya oleh pertolongan Roh Kudus (1 Kor. 2:10; Yoh. 16:8-11).” Ertina alu gegehta la kita ngasup ngantusi bage pe ngelakoken Kata Dibata i bas geluhta si tep-tep wari. E maka i bas kita erlajar Kata Dibata harus sipindo penampat i bas Kesah Si Badia nari gelah ipengasupNa kita ngantusi bage pe ngelakoken kerina si jadi peraten Dibata i bas kegeluhenta si tep-tep wari. Selanjutna i bas poin si pe-8-ken ikataken nina, “Penghayatan isi Alkitab menjadikan hidup berbuah dalam kehidupan sehari-hari (Gal. 5:22-23; Yak. 2:14-26; Yoh. 15:5).” Harus lit ulih i bas kita erlajar Kata Dibata, harus lit bukti ras dampakna i bas geluhta si tep-tep wari. Geluhta harus semakin ipelimbarui janah kehadirenta ernanam mehuli man sekelewetta.
Puji Tuhan maka arah Konfesi bage pe Misina, GBKP enggo ngakuken maka erlajar Kata Dibata e me hal si seh kel penting i bas kegeluhen kalak si tek. Salah sada misi si ate icapai i bas GBKP e me “Menumbuhkembangkan spiritualitas jemaat berbasis Alkitab.” Enggo sibentuk tim-tim pelayanen salah sadana e me kelompok membaca Alkitab. Kerina kegiaten si berkaiten ras Alkitab harus tetap sidukung. Mari radu ras kita menumbuhkembangkan rasa cinta kepada Alkitab. Sebab melala kel manfaat si idatken kita arah ngoge Pustaka bagi si enggo isaksiken Pemasmur i bas ogenta sendah. Tek kita adi ibereken Dibata man Pemasmur erbage-bage ulih si mehuli arah kekelengenna nandangi Undang-undang Tuhan, ibereken Dibata pe man banta kepentaren, pengertin (akal budi), gegeh, janji-janji Dibata si erbahanca kita idemi alu kemalemen ate, keriahen ukur, bage pe dame i bas kegeluhenta. Dibata si mpengasup kita.
Tidak ada komentar:
Posting Komentar