SUPLEMEN PA MORIA GBKP TGL. 12 - 18 JULI 2026

Pdt. Larena Sinuhadji (Nd. ReyRapha Tarigan)

Hubungan Pribadi Dengan Tuhan

Si Man Ogen : 2 Korinti 9:6-15

Tema : MERE PERSEMBAHEN ALU UKUR MERIAH

Tujun : Gelah Moria:

- Meteh palas, tujun ras pengajuk mereken persembahen

- Ratur mereken persembahen persepuluhen

Metode PA: Baca Gali Alkitab (BGA)

Penaruh

Salah sada sumber keuangan Gerejanta e me arah persembahen persepuluhen nari. I bas kesempaten enda mulihi kita erlajar kerna persembahen persepuluhen. Mbera PA-nta sendah semakin mpegegehi kinitekenta i bas kita nehken persembahen si mehulina man Dibata, khususna man banta si seh asa gundari lenga tergerak guna ikut muat bagin i bas nehken persembahen persepuluhen. Metode i bas PA-nta sendah e me BGA, mbera semakin reh mbagesna pengangkanta kerna palas teologis i bas nehken persembahen persepuluhen.

Mpebagesi Si Man Ogen

Latar belakang si man ogenta sendah e me kap kerna penjemba man Perp. Korinti gelah ersuruh ras meriah ukurna ikut muat bagin i bas nampati Perp. Judea si sangana mengalami kesusahen (Rom. 15:25-27; 1 Kor. 16:1-4; 2 Kor. 8-9; Gal. 2:10). Perpulungen i Korinti pernah nuriken ukurna guna nampati perpulungen i Judea ras ipujiken Paulus sikap perpulungen Korinti enda man perpulungen i Makedoni (ay. 2a-b). Janah kai si ikataken Paulus enda mpegegehi ras tole jemba perpulungen Makedoni guna akhirna ikut muat bagin nampati (ay. 2c, “erkiteken ketutusenndu teremen i bas ia enggo keke ukurna”). E maka i jenda mulihi Paulus mpersingeti perpulungen Korinti guna merealisasiken sura-surana ndube. Sebab banci jadi mela kari iakap perpulungen Korinti ‘di kenca reh Paulus ras perpulungen Makedoni, janah idapetina lenga sikap perpulungen Korinti. Je nari iutus Paulus, Titus ras teman-temanna si deban, leben ku Korinti guna mpersingeti ras nikapken perkuah ate (penampat) si enggo ipadankenna ndube. Persembahen si iberekenna bekas ukurna meriah dingen labo terpaksa. Si penting labo soal nominal, tapi ukur ersuruh ras motivasi i bas nehken penampat.

Janah i jenda ipake Paulus gambaren kerna kalak nuan page (gandum), gelah banci perpulungen e ersuruh ukurna ras sukarela i bas nehken persembahen rikut ras penampatna man kalak si sangana mengalami kesusahen. Maka kalak si sitik ngerdangken benih, sitik ka iperanina. Kalak si melala ngerdangken benih, melala ka iperanina. Dibata si nikapken benih man kalak si merdang bage pe nakan si man pangan, dingen Dibata ka si peturah benih e, janah mereken ulih erlipat ganda. Ilumbaken Paulus maka perpulungen e banci merdang, banci rani erkiteken perkuah ate Tuhan. Lit gegehna guna nampati erkiteken leben Tuhan si enggo masu-masu kegeluhen perpulungen. Janah i bas penampat si isehken perpulungen e pe, labo erbahanca kegeluhenna kekurangen, sebab Dibata ngasup mereken man banta kasakai pemereNa alu sampur (ay. 8). Janah penampat si isehken perpulungen labo hanya ncukupi keperlun kalak Kristen si sangana lit i bas kekurangen, tapi pe mendorong perpulungen si enggo isampati gejapken perkuah ate Tuhan si erbahanca perpulugen pe ngataken bujur man Tuhan (ay. 13). Bahkan i jenda pe icidahken Paulus persadan si nteguh alu tetap sisampat-sampaten sebage kula ni Kristus, subuk i tengah-tengah perpulungen kalak non-Jahudi (Makedoni, Korinti) ras kalak Jahudi (perpulungen i Judea). Bagi si ikateken Paulus i bas 1 Kor. 12:26, “Adi sada ringring suin, kerina ringring si deban pe ikut nggejapkenca. Janah adi sada ringring ipehaga, kerina ringring si deban ikut ermeriah.”

Pengkenaina

Pesan si banci siidah i bas si man ogenta sendah e me si pemena soal kepedulian (mediate) nandangi keberlangsungan pelayanan i tengah-tengah perpulungen kalak si tek. Pelayanan kasih si enggo iteladanken Yesus Kristus harus terus erdalan la banci ngadi. Pelayanan kasih i jenda labo terjeng man sapih-sapih kalak si tek si butuh penampat, tapi pe man sekelewetta i bas rangka pembarken Berita Si Mehuli. Si e kerina harus idalanken kalak si tek, e maka harus lit dukungen arah perpulungen nari, salah sadana arah dukungen dana. Si peduaken, soal ngataken bujur man Dibata. Kalak si tek si enggo tergejap i bas ia keleng ate Dibata i bas geluhna, la banci lang geluhna dem alu pengataken bujur man Dibata. Logikana, kalak si bagenda enggo lanai man iah-iahenken, enggo turah kesadaren i bas dirina ngataken bujur man Dibata. Janah i bas ia nehken pengataken bujurna isehkenna alu dem sukacita. Perp. Korinti e me contoh nyata maka lenga tuhu-tuhu igejapkenna keleng ate Dibata si luar biasa i bas geluhna, e maka isingetken Paulus kerna padanna ndube guna nampati Perp. Judea. Jadi si penting i jenda labo soal nominal, tapi ukur ersuruh ras motivasi i bas nehken persepuluhen.

Palas teologis i bas kita nehken persembahen enggo tangkas i bas Konfesi GBKP ras Buku Katekisasi. I bas Konfesi GBKP memang la lit si secara spesifik ngerana kerna persembahen persepuluhen, tapi secara tersirat lit i bas Bab X kerna Ibadah poin 2 nina, “Kami percaya bahwa ibadah merupakan panggilan untuk memuliakan Allah melalui segala sesuatu yang diberikan Allah dalam hidup orang Kristen, baik pengetahuan, bakat atau talenta, dan harta milik (1 Taw. 29:14; 1 Sam. 2:7).” I bas uraian enda lit je tersirat maka nehken persembahen persepuluhen e me panggilan untuk memuliakan Allah.

I bas Buku Katekisasi lit penjelasen kerna persembahen i bas Pertemuan 34. Tapi la lit uraian si secara spesifik ngerana kerna persembahen persepuluhan. I bas buku e hanya itulisken kerna bentuk-bentuk persembahen si lit i bas GBKP e me: persembahan dalam setiap ibadah gereja (termasuk PA & PJJ), persembahan pesta panen (kerja rani), persembahan perpuluhan, ras persembahan ucapan syukur. Kerina bentuk persembahen e ialokasiken guna biaya-biaya kegiatan si berkaiten ras: kesaksian (marturia), persekutuan (koinonia), pelayanan (diakonia), ras kerina kegiatan penunjang pelayanan. Guna melengkapi bahan pengajaren e akap kami harus sitambahi alu bahan pengajaren si khusus membahas kerna persembahen persepuluhen.

Sistem persepuluhen enggo ilaksanaken i bas Gerejanta benaken tahun 2000. Keputusen secara Sinodal e akap kami labo keputusen si main-main. Tek kami maka lit proses si ndekah si melatarbelakangi litna keputusen e, arah pergumulen-pergumulen si terjadi i bas pelayanen, penelitian-penelitian si sifatna teologis, bage pe arah perbandingen-perbandingen i bas Gereja-gereja si deban nari, si menerapken sistem persepuluhen. Ertina adi enggo menjadi keputusen bersama, marilah sidukung ras silakoken. Janah adi siperdiateken keadaan Gerejanta sebelum dan sesudah diberlakukannya sistem persepuluhen enda, akap kami enggo melala manfaat si banci sinanami, amin pe tentuna lenga bo maksimal erkiteken enterem denga kita si la nehken persembahen persepuluhen, entah pe si la konsisten nehken setiap bulanna. Emaka perlu terus-menerus kita erlajar nehken persepuluhen. Ula lebe siukurken nominalna, tapi erlajar lebe kita konsisten nehken persepuluhen setiap bulanna. Umpamana, seratus ribu sisehken secara konsisten setiap bulan. Adi enggo sikalkulasi i bas sada tahun labo kekurangen, sitingkatken nominalna, ras seterusna. Mari radu ras sibuktiken janji Tuhan, apakah payo maler pasu-pasu Dibata man kalak si setia nehkeh persepuluhen? Dibata si mpengasup kita.