SUPLEMEN PJJ GBKP TGL. 6 - 12 SEP. 2026

Pdt. Larena Sinuhadji (Nd. ReyRapha Tarigan)

MBELANG MAN PERANIN TAPI KURANG SI RANISA

Matius 9:35-38 (Mengenal Tuhan Melalui Konsep Pemuridan)

Penaruh

Adi ngerana kita kerna rani (panen), pasti meriah ukurta. Sebab kai si ndube si ierdangken, si isuan, enggo sikap perturahna ras tading ngaloken hasilna. Tapi rikutken tema, sangat bertolak belakang. Mbelang man peranin, tapi kurang si ranisa. Aturna, adi mbelang si man peranin, tenaga entah si erdahin guna rani oratna enterem, tapi enda kurang. Kai penyebabna ras kai solusina? I bas PJJ-nta sekali enda erlajar kita arah Kata Dibata gelah tetap semangat kita melayani i bas juma Dibata.

Mpebagesi Ogen 

Perikop Matius 9:35-38 ibere judul “Mekuah ate Jesus kalak si nterem” (terj. TB-LAI, “Belaskasihan Yesus terhadap orang banyak”). Jelas arah judulna maka Jesus i bas pelayanenNa ipalasi alu keleng ate.

Konteks pelayanen Jesus paksa si e, eme daerah Galilea. Maka jelas, labo saja IA melayani i bas sada ingan, tapi isiar-siariNa kuta-kuta si meriah ras kuta-kuta si la meriah. Ertina subuk kota ras kuta mendapatkan pelayanen si seri, la ibeda-bedaken Jesus. Pelayanen si idalanken Jesus, ilakokenNa secara holistik, labo hanya IA mengajar i Rumah-rumah Pertoton, termasuk pe iberitakenNa Berita Si Meriah kerna Kinirajan Surga. Labo enda maksudna kegeluhen kenca kematen bengket ku surga, tapi nuduhken otoritas Dibata i bas kegeluhen manusia i doni enda. Sebage contoh, kuasa kegelapen italuken, manusia iperdameken ras Dibata, kalak si imarginalken ialoken, kalak si perdosa idilo guna jera ras nadingken dosa-dosana, kalak si sakit ipepalem, rsd.-na. Ras memang terbukti, labo hanya Jesus mengajar, tapi pe ipepalemNa erbage-bage pinakit kalak si enterem. Mekuah ate Jesus ngenehen kalak si enterem e, sebab enggo kote dingen la nai lit si ngepkepsa, bagi biri-biri si la ipermakani. Enda merupaken sada gambaren entah pe kinata si terjadi nandangi pemimpin-pemimpin agama (Ahli Taurat, kalak Farisi), si kurang peduli, kurang mengayomi. Terjeng menuntut man umat Tuhan guna ndalanken Undang-undang Agama tapi la lit kepedulianna nandangi masyarakat tupung paksa si e. 

Bahkan pemimpin agama paksa si e, la banci jadi usihen. Gambaren biri-biri si la ipermakani eme kondisi masyarakat si kote erkiteken buena perbeben geluh, kalak si imarginalken (tertindas), lelah ras butuh pertolongen tapi la ise pe si mperdiatekenca. Sebalikna, kehadiren Tuhan Jesus, mpegegehi, nampati, mulahi enterem kalak si menderita ras e ibenaken alu pusuh si erkuah ate (hati yang berbelas kasihan). Teks enda itutup alu kondisi si jelas, la itutup-tutupi, maka kurang si melayani, kurang pekerja. Lit pe si erdahin i bas juma Dibata tapi enterem ka si la mediate, terjeng gelar ngenca, entah pe dekahen berteori ras ngeranai, tapi kurang bertindak nyata. Emaka nina Jesus, pindolah man si mada juma e, gelah isuruhNa si erdahin guna perani e. Ertina, erdahin i bas ladang Tuhan harus ibenai alu erpengendes man baNa. Ula lebe konsep ras program si mejile itawarken tapi ertoto man Tuhan. Sebab ise pe banci ipake Tuhan guna isuruhNa melayani. Asal si isuruhNa e, nggit ras tuhu-tuhu tulus melayani guna nehken kekelengen man kalak si membutuhken pertolongen.

Pengkenaina

Tema i bas PJJ-nta minggu enda “Mbelang man peranin tapi kurang si ranisa,” adalah merupaken sada pendilo man banta guna nggit ipake Tuhan nehken keleng ateNa. Tuhan make kita, bagi Tuhan make ajar-ajar si 12 kalak, entah pe Rasul-rasulNa. Piga-piga poin penting rikutken bahan ogenta, e me:

Si pemena. Sebage Gereja (kalak si tek), kita idilo labo guna nimai kalak reh man banta guna ilayani, tapi encidahken keleng ate Kristus si nyata man sekelewetta, mulai i tengah jabunta nari, terus ku keluarga besarta, anggota perpulungenta, lingkungen sekitarta, inganta erdahin, rsd.-na. Adi sinik saja kita (menunggu) banci jadi la sieteh lit kepeken pergumulen temanta si perlu man sampaten. Gereja harus melayani. Maka pusuh si mediate, mereken dirinta guna ingan sharing kalak si deban, mpegegehisa alu kata-kata semangat ras pertoton, rsd.-na, melala denga si banci silakoken. Dahin Perkunjungan Rumah Tangga (PRT) harus itingkatken. Gereja hadir i LAPAS, Gereja hadir notoken kalak si sakit, Gereja hadir membuka pemikiren anggota perpulungen guna meningkatken ekonomi jemaat alu UMKM rsd.-na.

Si peduaken. Mindset entah pola pikir si harus siperluas i bas kita nggit nampati kalak si deban. Siusih Tuhan Jesus Kristus. Mekuah ateNa ngenehen kalak si enterem si membutuhken pertolongen i bas IA nari. Terkadang i bas kita nehken kekelengen lit rusur sekat (batasenna). Alasen si rusur siban kita, la kap kutandai, la kap sada sektor kami, perbedaan suku, agama, rsd.-na (istilah si megati ipake “situngkat-tungkat galuhna”). Ertina, hubungen emosional entah kedekaten, eme dalanta nggit nampati. Maka terkadang i bas ngapuli Runggun adi la kin i bas anggota sektorna, entah kurang penandaina erkiteken cukup galang Runggun e, maka la ia hadir. Bahan PJJ-nta i bas paksa enda, mpersingeti kita, adi butuh teman e penampat, mekuah ateta, asa gegeh ras kengasupenta sisampatilah ia.

Si peteluken. Motto “I jenda aku suruhlah aku Tuhan” eme penjemba man banta guna semangat terus erdahin melayani ras engkelengi asum ibereken Tuhan denga kesempaten man banta. Sebab banci jadi, la nari lit kesempaten e (banci erkiteken keterbatasen umur, kesehaten si terganggu, rsd.-na). Ambil ras pake kesempaten si lit i bas kita, rikutken gegeh, tenaga, talenta, perukuren si mehuli, sipakeken guna jadi pasu-pasu (berkat) man kalak si membutuhken penampat i bas kita nari. Enggo pasti melala tantangen. Istilah si rusur ipake LKM (latih, keri, meling). Melala pengorbanen si ialoken kita. Tapi janji Tuhan “ya dan amin!” Kalak si tetap setia melayani Tuhan, tetap ipasu-pasu Tuhan geluhna, dame geluhna (bdk. 1 Kor. 15:58, “Erkiteken si e, o senina-senina si kukelengi, tetaplah ukurndu, ola mbewat-mbewat. Mejingkatlah kam rusur i bas ndahiken dahin Tuhan, sebab la ietehndu maka labo percuma dahin si idahikendu i bas Tuhan).