SUPLEMEN PJJ GBKP TGL. 23 - 29 AGT. 2026

Pdt. Larena Sinuhadji (Nd. ReyRapha Tarigan)

TANDA NANDAI DIBATA - 1 Johanes 2:3-11

(Mengenal Tuhan melalui Alkitab metode BGA)

Penaruh

Kitab Jakup (Yakobus) bindu 2 mereken wawasen teologis man banta maka kiniteken la rikut ras perbahanen mate kap. Ertina kalak si erkiniteken e me kalak si ngelakoken kerina si jadi peraten Dibata sebab kiniteken ras perbahanen erdahin ras-ras. I bas kesempaten enda radu ras kita erlajar kerna nandai Dibata si teridah arah perbahanen si konkrit erpalasken Kata Dibata si jadi ogenta sendah. Erkiteken PJJ-nta sendah ilakoken alu metode Baca Gali Alkitab (BGA), maka renungenta sendah iarapken banci nambahi pengangkanta kerna Kata Dibata si jadi ogenta sendah, khususna i bas kita ngikuti PJJ alu metode BGA. Arah metode BGA nari akap kami banci lebih mbages pengangkanta kerna Kata Dibata janah kerina kita terkondisi guna ikut muat bagin.

Mpebagesi Ogen

Surat 1 Yohanes ibahan sekitar tahun 85 - 95 M, rikutken tradisi gereja, Rasul Yohanes si nuliskenca. Surat enda isehken man perpulungen kalak si tek i Asia Kitik (daerah sekelewet Epesus) si sangana ngadapi erbage-bage ajaren sesat si erbahanca turah konflik i tengah-tengah perpulungen. Ajaren-ajaren si papak e erkaiten ras status Yesus selaku Anak Dibata. Umumna ajaren-ajaren si papak e la iakukenna maka Yesus e me Anak Dibata si nusur ku doni enda sebage Juruselamat. Emaka tujun surat enda e me mpegegehi perpulungen paksa si e gelah tetap paguh njemak kiniteken mana Yesus Kristus tuhu-tuhu Anak Dibata si reh ku doni enda guna maba keselamaten man doni enda. Salah sada cara guna mbedaken perpulungen si tutus ras si enggo papak e me alu ngenen tanda-tanda praktis: lit entah lang pengakun kerna Kristus, apakah enggo tuhu nggeluh i bas terang, erkeleng ate man sesama manusia entah lang, patuh entah lang nandangi perentah-perentah Dibata, ras iakukenna entah lang dosa-dosana.

Perikop si jadi ogenta sendah banci sibagi ku bas telu bagin. Si pemena e me ay. 3-5a. I bas bagin enda enggo tangkas ikataken Yohanes man perpulungen, nina “Adi patuh kita ngikutken perentah Dibata, tandana kita nandai Dibata.” Kepatuhenta nandangi Dibata e me bukti nyata maka kalak si tek enggo nandai Dibata. Banci ka iertiken maka, adi tuhu kita enggo nandai Dibata maka teridah arah kepatuhenta nandangi perentah-perentahNa. Emaka adi lit si ngatakenca enggo nandai Dibata tapi la patuh nandangi perentah-perentah Dibata enggo pasti kalak e erbual. Nandai Dibata i jenda labo terjeng aktivitas kognitif, pemeteh ngenca, tapi relasi si mbages ras Dibata si erbahanca kita pe termotivasi guna encidahken keleng ateta man Dibata arah perukuren ras perbahanenta si tep-tep wari.

Si peduaken, ay. 5b-6, e me nggeluh ersada ras Kristus. Alu tangkas Yohanes ngatakenca maka “Kalak si ngataken maka ia nggeluh ersada ras Dibata, ia harus nggeluh bagi Yesus Kristus.” Lit sada istilah teologis “perikoresis” ertina “saling berdiam atau saling memberi ruang.” Ertina gaya hidup Kristus nggeluh i bas gaya hidupta si tep-tep wari. Enda tanda si peduaken si ibereken Rasul Yohanes man perpulungen guna membedaken antara ajaren si benar ras ajaren si papak. Adi pola hidup sekalak si ngatakenca kalak si tek tapi la seri ras pola hidup Kristus, enggo banci ipastiken maka ia enggo terpapar ajaren si papak.

Si peteluken, ay. 7-11, penandai si benar kerna Dibata i bas Yesus Kristus teridah arah keleng atena nandangi senina-seninana. Keleng ate i jenda labo banci iban-ban, entah pe gelah teridah kalak arah darat. Adi tuhu keleng ate Kristus e enggo nggeluh i bas dirinta maka keleng ate e la banci iban-ban, keleng ate e turah dengan sendirina janah ise pe banci nggejapkenca maka keleng ate e tulus, labo iban-ban entah pe pura-pura. Alu bage i bas telu bagin enda teridah sada pola erkiniteken Rasul Yohanes e me: 1) Ay. 3-5a, mengenal Allah melalui ketaatan. 2) Ay. 5b-6, tinggal di dalam Allah dengan hidup seperti Kristus. 3) Ay. 7-11, perintah kasih sebagai tanda hidup dalam terang.

Pengkenaina

I bas bagin penaruh i datas enggo radu ras siakuken maka kiniteken harus sedalanen ras perbahanen. I bas ogenta sendah pe teridah sada konsep teologis maka nandai Dibata labo terjeng bersifat kognitif konseptual, tapi tuhu-tuhu teridah ras tergejap man kalak si lit i sekelewetna, em tandana maka kalak si tek e enggo tuhu-tuhu nandai Dibata i bas Yesus Kristus. I bas perpulungen kalak si tek paksa si e, tanda-tanda si teridah arah perukuren, pengerana ras perbahanen banci jadi tolok ukur apakah sekalak perpulungen  enggo terpapar ajaren-ajaren si papak? Kai si ikataken Rasul Yohanes akap kami seri ras si ikataken Yesus i bas Mat. 7:15-23, “Batang si mehuli tentu mehuli nge buahna, tapi batang si la mehuli tentu pe la mehuli buahna … Emaka itandaindu nge nabi palsu e arah perbahanenna.”

Si jadi penungkunen evaluatif man banta, enggo nge tuhu-tuhu sitandai Dibata si isembah kita i bas Yesus Kristus? Marilah siuji dirinta masing-masing arah tanda-tanda si lit i bas dirinta. Selamat mengikuti PJJ alu metode BGA.