Pdt. Larena Sinuhadji (Nd. ReyRapha Tarigan)
Praktek Persidangen II : Matuhi P2P Mamre
Ogen : Perb. Rasul 15:1-12
Tema : ORAT PERSIDANGEN SI MEHULI
Tujun : Gelah Mamre :
1) Ngasup ngergaken pendapat kalak si deban
2) Ngidah maka lit aturen i bas persidangen sue ras si iaturken P2P Mamre
Metode : Diskusi
Penaruh
I bas organisasi i japa pe, enggo pasti lit si gelarna rapat rutin, rapat bulanan, rapat tahunan, persidangan, rsd.-na. Termasuk i bas Gerejanta pe enggo semal ilakoken rapat-rapat entah pe sidang-sidang. Si e kerina ilakoken guna ncakapken rencana kegiaten pelayanen, mengevaluasi kegiaten pelayanen si enggo ilakoken, ndarami solusi i bas persoalen-persoalen si lit, mutusken erbage-bage keputusen guna kiniulin pelayanen i bas Gerejanta. I bas rapat entah sidang si nilakoken, perbedaan pendapat enggo pasti lit. Tapi uga carana gelah perbedaan pendapat si lit e la berkembang menjadi konflik personal? I bas si e tentu kerina kita harus nggit erlajar berorganisasi alu pentar.
I bas kesempaten enda radu ras mulihi kita erlajar kerna orat persidangen si mehuli erpalasken ogenta sendah.
Mpebagesi Ogen
Sidang (runggu) rasul-rasul guna muat keputusen-keputusen i bas kitab Perb. Rasul enggo piga-piga kali ilaksanaken. I bas Perb. Rasul 1:23-26, idatken sada keputusen maka Matias si gantiken Yudas. I bas Perb. Rasul 6:1-6, ibahan keputusen ipilih 7 kalak si khusus dahinna ngelaken pangan si tep-tep wari. I bas Perb. 13:1-3, idatken sada keputusen maka Barnabas ras Paulus itetapken guna ndahiken dahin si enggo itetapken Dibata man bana. Secara khusus sidang rasul-rasul ras pertua-pertua i bas bahan ogenta sendah ilaksanaken i Yerusalem, guna ndungi persoalen si terjadi i bas Perp. Antiokia, i ja lit pengajaren si ngatakenca maka kalak si labo kalak Yahudi si tek harus lebe isunatken bagi iaturken Undang-undang Musa maka terkelin ibahan Dibata (ay. 1-2).
I bas ay. 7 teridah maka lit dua pendapat si berbeda kerna persoalen sunat enda. Sada pihak berpendapat maka sunat enda iwajibken man kalak si tek si labo kalak Yahudi. Pihak si deban berpendapat maka aturen sunat enda labo wajib. Kalimat “ndekah ngerana, janah percakapen e lalap la erkedungen,” i bas Alkitab Bhs. Ind., iterjemahken “sesudah beberapa waktu lamanya berlangsung pertukaran pikiran.” Labo teridah kel je maka situhuna lit perdebatan si cukup sengit antara dua pihak si berbeda pendapatna enda. I bas Alkitab New King James Version iterjemahken “had been much dispute,” i bas Alkitab New Revised Standard Version nina, “had been much debate,” ertina i bas sidang e lit je perdebaten, saling berargumen mempertahanken pendapatna masing-masing. Adi menurut pendapat kami rikutken alur percakapen i bas bahan ogenta, lit je dua kubu, kubu Jakup (senina Yesus) si mpertahanken kewajiben kerna sunat ras kubu Petrus si labo mewajibken sunat man kalak si tek si labo kalak Yahudi.
Leben Petrus ngerana mewakili kelompok si labo mewajibken sunat man kalak si tek si labo kalak Yahudi (ay. 8-11). Intina, lit i bas ay. 11, nina Petrus, “tek kita, maka erkiteken lias ate Tuhan Yesus kita terkelin bali ras si labo kalak Yahudi”, ertina sunat e labo menentuken keterkelinen kalak si tek tapi erkiteken lias ate Tuhan Yesus. Kenca enggo ngerana Petrus, maka sinik kerina kalak si pulung e. Sinik i jenda maksudna kerina si pulung rukur i bas pusuh perukurenna masing-masing. I bas sada tafsiren ikataken nina, kai si ikataken Petrus e “menjernihkan suasana dan mempersiapkan pikiran dan hati untuk mengambil keputusan bersama.” Ertina i bas proses sidang enda si niutamaken e me “hati dan pikiran yang jernih” asangken mempertahanken pendapat secara irasional ras emosional, janah la nggit ngakuken kebenaren pendapat kalak si deban secara objektif. I bas suasana pusuh perukuren si bersih e maka banci ibegiken pendapat Barnabas ras Paulus. Tek kita maka Kesah Si Badia erdahin mereken pusuh perukuren si bersih i bas sidang enda.
Kenca Petrus, Barnabas ras Paulus ngerana, maka seh ku giliren Jakup (Yakobus) ngerana mewakili kelompok si mewajibken sunat man kalak si tek si labo kalak Yahudi, bagepe aturen-aturen si deban sue ras Undang-undang Musa (ay. 13-21). Intina i bas ay. 19-21, “Adi kuakap, ola sisusahi si labo kalak Jahudi si enggo erpengendes man Dibata e. Tapi sibahanlah surat man bana gelah ola ipanna pangan si la bersih si enggo ipersembahken man dibata-dibata palsu; gelah ola ia erlagu la mehuli; gelah ola ipanna dareh ntah asuh-asuhen si mate la perbahan igeleh. Sebab nai nari Undang-undang Musa iberitaken i tep-tep kuta, janah seh asa genduari iogeken i bas rumah pertoton tep-tep wari Sabat kalak Jahudi.” Teridah maka ialoken Jakup pendapat kerna sunat si labo wajib hukumna man kalak si tek si labo kalak Yahudi. Tapi lit denga aturen-aturen rikutken Undang-undang Musa si harus ilakoken kalak si tek si labo kalak Yahudi. Adi rikutken 1 Kor. 8:1-13, teridah maka aturen kerna pangan-pangan enda harus ilakoken alu pertimbangen gelah ula jadi batu antuken man kalak si tek si berlatar belakang agama Yahudi.
Kai si ikataken Jakup e ialoken peserta sidang alu bulat ukur, enggo ersada arih rasul-rasul ras pertua-pertua erbahan dua keputusen i bas sidang e : 1) Aturen kerna sunat rikutken Undang-undang Musa labo wajib man kalak si tek si labo kalak Yahudi. 2) Ola pan pangan si enggo ipersembahken man dibata-dibata palsu; ola pan dareh; ola pan asuh-asuhen si mate la igeleh; janah ola erlagu la mehuli. Bagem akhirna keputusen e ipeseh alu surat si ibaba utusen si berkat ku Antiokia, janah ilaksanaken i tengah-tengah perpulungen Antiokia. Ula kita lupa maka lit je kuasa Kesah Si Badia i bas sidang rasul-rasul ras pertua-pertua enda. I bas ay. 28 ikataken i bas surat si ipeseh man Perp. Antiokia nina, “Enggo itetapken Kesah Si Badia.” I bas sidang-sidang si debanna pe teridah je peran Kesah Si Badia (Perb. Rasul 1:23-26; 6:1-6; 13:1-3).
 |
| Versi Audio silahkan klik : https://youtu.be/KO3PVwc3cMk |
Pengkenaina
PA-nta sendah ngajuk kam kerina Mamre gelah beluh bergorganisasi erpalasken kepentaren i bas Dibata nari. Ogenta sendah enggo mereken usihen man banta kerna orat persidangen si mehuli. Kai saja si man usihen? Si pemena, ula kita lupa maka kerina persidangen si ilakoken kita i bas Gereja tujunna guna kemulian gelar Dibata ras guna kiniulin pelayanen, labo guna kepentingen pihak-pihak tertentu. I bas si e tentu si iutamaken e me Kata Dibata ras aturen-aturen si enggo isepakati bersama.
Si peduaken, pakekenlah “hati dan pikiran yang jernih” i bas sidang-sidang si ilakoken kita. Enda si nampati kita beluh ngaloken pendapat kalak si deban secara objektif, labo secara emosional.
Si peteluken, ula kita lupa maka i bas persidangen-persidangen gerejawi si ilakoken kita, lit je peran Roh Kudus. Kesah Si Badia si mpengasup kita rukur alu mehuli ras ngelakoken kerina si jadi peraten Dibata. Emaka pindolah gegeh i bas Kesah Si Badia nari gelah ipengasupNa kita rukur alu mehuli, objektif, tetap mendukung kai pe keputusen-keputusen sidang amin pe la sue ras pendapatta.
Emaka i bas PA-nta sendah mari radu ras kita bertekad ngelakoken kerina persidangan-persidangan i bas Kategorial Mamre alu mehuli sue ras aturen-aturen si enggo isepakati bersama, janah si pentingna kel, sue ras peraten Dibata guna kiniulin pelayanen bage pe si utamana guna kemulian gelar Dibata arah pelayanenta. Kerna praktek persidangen alu matuhi P2P Mamre, sipelajarilah aturen e alu mehuli gelah tuhu-tuhu siteh kai saja aturen-aturen si enggo isepakati bersama guna ilakoken. Tuhan mpengasup Mamre guna ngelakoken sidang-sidang sue ras peraten Dibata guna kemulian gelar Dibata.
Tidak ada komentar:
Posting Komentar