SUPLEMEN PA MORIA GBKP TGL. 7 - 13 JUNI 2026

Pdt. Larena Sinuhadji (Nd. ReyRapha Tarigan)

Alasan Manusia Mengasihi Allah

Si Man Ogen : Johanes 3:14-21

Tema : KEGELUHEN SI TUHU-TUHU

Tujun : Gelah Moria :

- Ngidah perbahanen Yesus man manusia

- Nulisken tekad tetap nggeluh i bas kegeluhen si tuhu-tuhu

Metode PA: Erbahan Slogan

Penaruh

Kiniteken Kristen labo kiniteken si pasif tapi kiniteken si proaktif. Keselamaten si enggo ialoken kalak si tek mengandung konsekuensi ngelakoken keselamaten e i bas kegeluhen si tep-tep wari secara proaktif. Rasul Paulus i bas Filipi 2:12 ngatakenca “tetaplah kerjakan keselamatanmu” ertina hidupi, aktualisasikan, wujudkan keselamatan yang telah dianugerahkan Allah. Keselamaten labo terjeng status entah pe tiket ku surga, tapi ikut muat bagin i bas proses erberita kerna keleng ate Dibata i bas Yesus Kristus i bas kegeluhenta si tep-tep wari.

I bas kesempaten enda radu ras kita mulihi erlajar kerna makna kegeluhen si tuhu-tuhu entah pe kehidupan yang kekal erpalasken si man ogenta sendah. 

Mpebagesi Si Man Ogen

Si man ogenta sendah nuriken kerna percakapen Yesus ras Nikodemus, sekalak Farisi peminpin kalak Yahudi. Kelompok Farisi e me kelompok si la senang nandangi Yesus. Mungkin erkiteken mamang Nikodemus, maka idahina Yesus i bas berngi gelah la iidah teman-temanna sesama kalak Farisi. I bas percakapen e situhuna enggo iteh Nikodemus maka Yesus e me utusen Dibata (Dibata ras Yesus) alu tanda-tanda sengget si icidahkenNa. Tapi mungkin lenga tuhu-tuhu yakin Nikodemus maka Yesus e me utusen Dibata, entah pe Mesias. Yesus ngaloi alu pengajaren kerna sekalak Mesias si enggo iberitaken nabi-nabi. 

Rikutken ajaren nabi-nabi Israel, adi sekalak Mesias reh alu tanda-tanda sengget maka harus kalak Isarel tek man baNa. Tentuna sebage sekalak Farisi si enggo ipelajarina Taurat ras Kitab Nabi-nabi, enggo iteh Nikodemus kai si imaksudken Yesus. Tandana kalak tek nandangi Yesus sebage Anak Manusia si iutus Dibata guna nelamatken doni enda i bas keleng ateNa, e me harus tubuh peduakaliken. Tubuh peduakaliken maksudna bertobat (jera), tek man Yesus sebage utusen Dibata, janah nggeluh i bas kegeluhen si mbaru. 

Penungkunen Nikodemus kerna si e bagi nuduhkenca maka tetap ia la tek man Yesus. La ituriken uga kelanjuten percakapen enda ras uga tanggapen Nikodemus, tapi injil Yohanes nurikenca secara tersirat maka Nikodemus enda tek man Yesus. Ibelana Yesus i bas Yoh. 7:45-52. Nikodemus reh ndahi mayit Yesus kenca mate i kayu persilang i bas Yoh. 19:39. Ertina perjumpan Nikodemus ras Yesus erbahanca Nikodemus berobah jadi tek man Yesus amin pe teman-temanna si deban kalak Farisi termasuk kelompok si ikut erkonspirasi guna munuh Yesus. Iingetna denga perjumpanna ras Yesus maka idahina Yesus amin pe enggo mate.

Versi Audio silahkan klik : https://youtu.be/wnJZkN6NIl8

Pengkenaina

Tema PA-ta sendah e me “Kegeluhen si tuhu-tuhu,” enda akap kami ibuat i bas ay. 16 nari. Sada ayat si akap kami enggo semal man banta kerina. I bas terj. bhs. Ind., kegeluhen si tuhu-tuhu e me “hidup yang kekal” entah pe “hidup sejati dan kekal.” Hidup kekal i bas bhs. Yun., nina zōē aiōnios, i bas Injil Yohanes “kekal” (aiōnios) ertina labo terjeng kegeluhen kenca mate (durasi tanpa akhir), tapi terbagesen asa si e, kualitas nggeluh i tengah doni enda si asalna i bas Dibata nari. Jadi kegeluhen si tuhu-tuhu labo terjeng soal kegeluhen kenca kita mate, tapi “hidup dalam persekutuan dengan Allah.” Emaka nina Yesus i bas Yoh. 17:3, “Kegeluhen si tuhu-tuhu si la erkeri-kerin e: itandai kalak Kam ngenca Dibata si tuhu-tuhu, dingen itandaina Yesus Kristus si isuruhNdu.” Kata si penting i jenda e me “itandaina” (mengenal). I bas tradisi Yohanes “mengenal” labo terjeng meteh secara logika intelektual ngenca, tapi lit relasi si ndeher ras partisipatif. Jadi, kegeluhen si tuhu-tuhu maknana e me ikut muat bagin i bas kegeluhen sue ras peraten Dibata i tengah doni enda.

Emaka akap kami ay. 21 seh kel pentingna, “kalak si ndalanken si ngena ate Dibata reh ia ku terang e, gelah i je teridah maka kai si ibahanna e sue ras si ngena ate Dibata. Nikodemus akap kami enggo jadi usihen man banta Moria. Kenca perjumpanna ras Yesus kegeluhenna berobah total jadi kegeluhen si tuhu-tuhu i bas Kristus. Alu bage marilah kita bertekad nggeluhken kegeluhen si tuhu-tuhu si enggo ialoken kita arah kinitekenta man Dibata i bas Yesus Kristus. 

Marilah sievaluasi kegeluhenta sedekah enda, adi enggo nggeluh kita i bas kegeluhen si tuhu-tuhu erpalasken si man ogenta sendah, puji Tuhan! Kai saja kira-kira si ateta itingkatken, banlah e jadi tekadta i bas slogan si ibahan kita. Adi lenga, bahanlah rencana ras suratkenlah tindaken-tindaken konkrit kai saja si ateta silakoken sebage wujud nyata nggeluh i bas kegeluhen si tuhu-tuhu, baik i tengah jabu, pendahin, gereja, bage pe i tengah-tengah pergaulen sosialta. Janah ertotolah gelah ipengasup Dibata kita nggeluh i bas kegeluhen si tuhu-tuhu.