SUPLEMEN PA MORIA GBKP TGL. 28 JUNI - 4 JULI 2026

Pdt. Larena Sinuhadji (Nd. ReyRapha Tarigan)

PA Harganas: Wujud Mengasihi Allah Terlihat Dalam Keluarga

Si Man Ogen : 1 Petrus 3:8-16

Tema : SIKELENG-KELENGEN DINGEN MESAYANG

Tujun : Gelah Moria:

- Ngangkai tanda-tanda nggeluh ersada ras Kristus

- Mujiken perbahanen si mehuli anggota jabu teptep wari

Metode : Diskusi & Aksi

Penaruh

PA-nta sendah i bas rangka Harganas. Kai kin Harganas e? Adi sisungkun AI bagenda nina, “Harganas adalah akronim dari Hari Keluarga Nasional yang diperingati setiap tanggal 29 Juni di Indonesia. Peringatan ini bertujuan untuk mengingatkan masyarakat akan pentingnya keluarga sebagai fondasi utama dalam membangun kekuatan bangsa, serta momentum untuk meningkatkan kualitas keluarga melalui perencanaan yang baik.” Ertina Moria GBKP ikut mendukung program pemerintah i bas membangun keluarga si berkualitas. I bas kesempaten enda radu ras mulihi kita erlajar kerna keluarga si erkiniteken man Dibata erpalasken si man ogenta sendah.

Mpebagesi Si Man Ogen

Si man ogenta sendah e me sebagin pedah-pedah ras pergegeh Rasul Petrus nari man perpulungen kalak si tek si merap i daerah Pontus, Galatia, Kapadokia, Asia, ras Bitinia (wilayah negara Turki gundari), si sangana lit i bas kiniseran erkiteken kinitekenna man Yesus Kristus. I bas terj. Bhs. Karo si man ogenta termasuk ku bas perikop alu judul “Ngenanami kiniseran erkiteken perbahanen si mehuli” benaken ay. 8 a nari, sedangken i bas Alkitab TB-LAI masuk ku bas perikop alu judul “Menderita dengan sabar” benaken ay. 13 nari. Arah dua judul perikop enda nari banci idatken sitik gambaren kerna perpulungen kalak si tek si paksa si e, si ngenanami kiniseran erkiteken perbahanenna si mehuli, janah kiniseran e arus ilawan alu saber.

I bas ay. 8 mindo Rasul Petrus man perpulungen gelah ersada i bas penggejapen, sikeleng-kelengen, mesayang, dingen meteruk ukur sada ras si debanna. Adi ersada perpulungen sada ras si debanna maka kiniseran si mberat sekalipe banci ibentasi alu radu ras saling nampati ras mendukung. Ay. 9-10 e me pengajuk gelah membalas kejahaten alu pasu-pasu sebab perpulungen enggo leben ngaloken pasu-pasu i bas Dibata nari. I jenda teridah maka iajuk Petrus perpulungen gelah fokus ku pasu-pasu i bas Dibata nari asangken fokus ku kejahaten si ilakoken kalak si deban man bana.

Ay. 11-13 e me pengajuk gelah tetap erbahan si mehuli ras bujur nandangi kalak si jahat, sebab Tuhan tetap natap kempak kalak bujur, janah tetap ibegikenNa pertotonna. Ay. 14-16 e me kata-kata pergegeh si memotivasi gelah megenggeng. Amin pe enggo tuhu-tuhu erbahan si mehuli dingen bujur tapi tetap denga ngenanami kiniseran, ola mbiar ras aru ate tapi er-“malem ukur” (terj. Bhs. Ind., nina “kamu akan berbahagia”). I jenda pe iajuk Petrus perpulungen gelah fokus ku malem ukur si bakal ialoken asangken ku kiniseran, gelah pusuh peratenna tetap bersih. Adi siterusken ku ay. 17-18, iajuk Petrus perpulungen gelah terus erbahan si mehuli ras bujur. Ulin ngenanami kiniseran erkiteken perbahanen si mehuli, asangken erkiteken perbahanen si jahat. Sebab si mehuli memang e me sura-sura Dibata.

Versi Audio silahkan klik : https://youtu.be/TINoc3jo5AQ

Pengkenaina

Tema si seh man banta i bas PA-nta sendah akap kami ibuat i bas ay. 8 si man ogenta sendah, “Dage kedungenna ersada min ukurndu ras ersada min penggejapenndu. Sikeleng-kelengen min kami bagi ersenina, dingen mesayang janah meteruk min ukurndu sekalak nandangi si deban.” I bas terj. Bhs. Ind., TB Ed. II nina, “Akhirnya, hendaklah kamu semua seia sekata, seperasaan, mengasihi saudara-saudara, penyayang dan rendah hati.” Konteks i bas si man ogenta sendah e me situasi kegeluhen perpulungen kalak si tek si ngenanami erbage-bage kiniseran erkiteken kinitekenna, harus tetap ersada, sikeleng-kelengen, mesayang ras meteruk ukur sada ras si debanna. Ertina secara kelembagaan Moria mari radu ras terus silakoken geluh ersada, sikelengen, mesayang, ras meteruk ukur sapih-sapih kita Moria.

Tapi adi sioge bindu 3 benaken ay. 1 nari, kai si ilumbaken Rasul Petrus enda pe lit kaitenna ras pedah-pedah man ndehara ras perbulangen, sebab PA-nta sendah ikaitken ras keluarga entah pe jabu-jabu kalak si tek. Si jadi penungkunen enggo nge lit i bas jabunta masing-masing: ersada ukur, sikelengen, mesayang ras kiniteruken ukur? Adi enggo puji Tuhan! Ertina kerina pembinaan-pembinaan kiniteken, baik si rutin bagi PJJ, PA-PA Kategorial, bage pe si la rutin bagi ceramah, retreat, rsd.-na., enggo lit buktina. Kata Dibata enggo tuhu-tuhu bertumbuh i bas jabunta masing-masing.

Adina lenga, mari radu ras terus sitotoken jabu-jabunta gelah ipengasup Dibata ersada ukur, sikelengen, mesayang ras kiniteruken ukur. Memang labo murah guna ersada ukur, sikelengen, mesayang, ras meteruk ukur sada ras si debanna. Melala tantangen si harus ihadapi jabu-jabu, amin pe la seri tantangenna bagi perpulungen kalak si tek paksa Rasul Petrus. Tapi adi jabu-jabu kalak si tek bersatu hati erpengendes man Dibata, teklah maka kuasa Kesah Si Badia mpengasup kita kerina, khususna kam kerina Moria, nggeluh ersada ukur, sikelengen, mesayang, bage pe meteruk ukur. Enda nge wujud konkrit nggeluh ersada ras Kristus sue ras tujun si pemena PA-nta sendah. Wujud konkrit si deban bagi si lit i bas tujun si peduaken, e me mereken pujian man perbahanen-perbahanen si mehuli si ilakoken anggota jabu setiap wari. Alu bage tercipta suasana jabu si positif ras suportif. Pindolah gegeh i bas Dibata nari gelah ipengasupNa kita ngelakokenca.