SUPLEMEN PJJ GBKP TGL. 7 - 13 JUNI 2026

Pdt. Larena Sinuhadji (Nd. ReyRapha Tarigan)

PULUNG TUPUNG KEBAKTIN KERJA RANI - Bilangen 28:26-31

(Kerja Rani)

Penaruh

Kerja Rani e me pesta iman i ja radu ras kita ngataken bujur man Tuhan, mpehagaken Tuhan i bas IA enggo masu-masu geluhta, khususna ulih peraninta entah pe ulih pendahinta masing-masing (perjuma, perbinaga, pengusaha, dokter, direktur, pegawai, ASN, buruh, Pdt., pensiunen sekali pe, rsd.). Kerja Rani enggo semal ilakoken i bas gerejanta GBKP sebage wujud nyata pengataken bujurta man Dibata, janah ulih Kerja Rani e sipakeken guna mendukung dahin-dahin pelayanen i bas gerejanta. E maka i bas PJJ sendah radu ras kita ersikap guna mendukung ras mensuksesken Kerja Rani tahun 2026 si ilakoken i bas Runggunta masing-masing, si tujunna labo saja guna peningkaten kualitas ras kuantitas pelayanen tapi si utamana kel e me media erlajar man banta kerina i bas ngataken bujur man Dibata si seh asa genduari tetap denga masu-masu kegeluhenta.

Mpebagesi Ogen

Ogenta sendah lit i teruh judul perikop “Persembahen tupung perayaan roti si la tama ragi.” I bas terj. Bhs. Ind., ogenta termasuk ku bas perikop si lebih umum cakupenna e me “Korban pada hari-hari raya.” Sue ras judul i bas Bhs. Karo, ogenta secara spesifik ngerana kerna persembahen si isehken i bas perayaan roti si la tama ragi entah pe shavuot (pentakosta agama Yahudi). Ogenta sendah teridah sangat ritualistis, sebab je itulisken secara lengkap terperinci kerna kai-kai saja si harus ilakoken i bas liturgi kebaktinna, khususna i bas kai saja si harus ipersembahkan man Dibata i bas kebaktin e. Tapi situhuna i bas liturgi si rinci enda ndai lit tujun si mehuli, e me gelah terjalin spiritualitas relasional antara Dibata, manusia, ras doni enda. Kai saja bentuk konkrit spiritualitas relasional e?

Si pemena, i bas ay. 26 ikataken maka persembahen man Dibata harus isehken i bas waktu si khusus e me i bas kebaktin. Emaka la ise pe si erdahin erkiteken sada wari e ikhususken guna erbakti man Dibata. Waktu khusus guna erbakti man Dibata e me sada pengakun maka Dibata ulu kegeluhen i bas rani (panen). Sinuan-sinuan si irani e labo erkiteken gegeh beluh manusia i bas erdahin, tapi lit i je peran media-media si deban: taneh, lau, sinar matawari, ras si debanna. Janah si pentingna kel, lit je peran Dibata ulu kegeluhen si mpeturah sinuan-sinuan guna ikonsumsi manusia. Ertina kebaktin Kerja Rani e me sada bentuk pengakun maka Dibata ulu kegeluhen janah lit peran media-media si deban si erbahanca berhasil kerina usaha manusia. Lit relasi si mehuli antara Dibata, manusia ras doni enda.

Si peduaken, i bas ay. 27-31 ituriken kerna rincian kai-kai saja si harus ipersembahken man Dibata. I jenda teridah maka kerina si ipersembahken man Dibata harus si mehulina, la lit man pandangen. Enda antusenna, persembahen si isehken labo bersifat transaksional, ertina kerina si ipersembahken e tujun utamana e me guna ngataken bujur man Dibata si enggo mereken si mehulina man kalak si tek man baNa. Janah i bas bangsa e nehken persembahen sue ras aturen si rinci ndai tujunna gelah bangsa e erlajar nginget kerina pasu-pasu si enggo ibereken Dibata man bana. Mengingat dan menghitung berkat Tuhan yang luar biasa dalam kehidupannya. 

Versi Audio silahkan klik : https://youtu.be/WNUoBo44Tx4

Pengkenaina

Adi ngerana kita kerna Kerja Rani lit referensi si deban i bas Pustakanta selain si man ogenta sendah (Kel. 22:29, 23:15-16, 34:22, Im. 23:15-20; Ul. 16:9-12). Alu penekanen si saling melengkapi sada ras si debanna. Umpamana i bas Ul. 16:9-12, je ikataken setiap keluarga maba persembahenna alu ukur meriah guna pehaga Tuhan Dibata. Buena rikutken pasu-pasu si ibereken Tuhan man banta sekalak-sekalak. Ertina, setiap pribadi (keluarga) pasti la banci ipebali, sebab pasu-pasu Dibata pe berbeda-beda man banta. Si penting palas i bas kita nehken persembahen i bas Kerja Rani e me kap nggejapken pemeliharaan ras pemasu-masun Tuhan i bas geluhta. Maka Tuhan si enggo masu-masu kegeluhenta rikutken usaha ras pendahinta.

Si jadi fokus i bas PJJ-ta sendah e me, si pemena, i bas kita nehken persembahen Kerja Rani, harus ipalasi alu pengakun maka Dibata satu-satunya ulu kegeluhenta. Ingetlah maka lit peran pihak-pihak si deban si mendukung malerna pasu-pasu Dibata man banta. Si peduaken, sehkenlah persembahen Kerja Raninta alu dem pengataken bujur, janah ingetlah maka kerina si lit i bas kita e me pasu-pasu i bas Dibata nari. Ertina i bas Pesta Kerja Rani si ilakoken kita labo terjeng pulung bage-bage saja bagi semalna. Tapi tuhu-tuhu enggo tangkas man banta guna kai kita pulung tupung kebaktin Kerja Rani i bas Runggunta masing-masing.

Gerejanta GBKP setiap tahun ngelakoken Kerja Rani alu palas teologis nginget perkuah ate Tuhan si mereken keselamaten man banta, enggo itebusi Tuhan dosa-dosanta ras seh asa gundari Tuhan tetap memeliharaken geluhta arah pendahinta si pelain-lain. Tentu patut kita ngataken bujur man Tuhan, la perlu nari terlalu rumit persembahenta bali ras si nilakoken bangsa Israel, sebab Yesus Kristus, Anak domba Allah, enggo mpersembahken diriNa guna nebusi dosa-dosanta. Tapi i bas si e la ka banci kita meros, tetap si terbaik sibereken rikutken pasu-pasu si enggo ibereken Tuhan man banta. Rasul Paulus i bas suratna man Perp. Korinti (2 Kor. 9:6-9) mpersingetisa i bas nehken persembahen man Tuhan, sekalak-sekalak berekenlah sue ras si enggo itetapkenna i bas ukurna; ola alu pusuh jungut-jungut entah pe bagi si terpaksa, sebab Dibata ngkelengi kalak si mere alu ukur meriah. Keriahen ukurta mere man Tuhan i bas persembahen Kerja Rani erpalasken pasu-pasu si enggo ibereken Dibata man banta sekalak-sekalak. Tetap sipehaga Tuhan, sebab IA ngasup mereken man banta kasakai pemereNa alu sampur. Sue ras padan Yesus i bas Matius 6:33, “Tapi si pentingna kal daramilah lebe kinirajanNa, janah dalankelah si ngena ateNa maka icukupiNa kai si perlu man bandu.” Kai si nipadankenNa, ya ras amin! Nai, gundari ras seh rasa lalap tetap ipasu-pasu Tuhan kegeluhenta.

La pe kita perjuma, pelain-lain enggo dahinta, maka i bas perayaan Kerja Rani enda, tetap siinget identitasta sebage kalak Karo si umumna tading i Tanah Karo, perjuma, ngingetken kita guna mpertahanken Tanah Karo sebage daerah pertanian ras kalak GBKP la ndayaken tanehna guna mpertahanken identitasta si erat berkaiten ras tanah. La pe kita perjuma, tapi nuansa kerja (pesta meriah ukur) tetap banci sicidahken tupung kita ngelakoken Kerja Rani. Rikutken aturen si lit i bas GBKP, salah sada pos keuangen jemaat guna kerina kegiaten persekutuan, kesaksian, diakonia ras biaya operasional gerejanta, e me arah Kerja Rani nari. 60% tading bas Runggun ras 40% setor ku Moderamen. Alu sisehken persembahenta, termasuk Kerja Rani, kita mendukung kerina kegiaten si iaturken Gerejanta sekaligus ndalanken padannta tupung kita ingawanken maka kita nggit nanggung tanggungenta i bas GBKP enda. Sitotoken gelah perdalanen Kerja Rani bas Runggunta erdalen alu mehuli, Tuhan ipehaga ras imuliaken arah persembahenta. Mari sidukung ras sisuksesken Kerja Rani tahun 2026 enda. Dibata si mpengasup kita kerina.