SUPLEMEN PA MAMRE GBKP TGL. 23 - 29 AGT. 2026

Pdt. Larena Sinuhadji (Nd. ReyRapha Tarigan)

Teologia Bapa VII: Bapa Si Maba Jabu Ersembah (Ibadah Keluarga)

Ogen : Kejadin 35:1-4

Tema : ERSEMBAH MAN DIBATA

Tujun : Gelah Mamre :

1) Meteh semangat Yakub i bas mabai jabuna ersembah man Dibata

2) Jadi usihen ersembah i bas jabu

Penaruh

Topik kerna perbapan i bas konteks GBKP si erkemalangen man Dibata, janah tuhu-tuhu jadi usihen i bas nggeluh erkiniteken, akap kami enggo rusur sibahas. Tentu arapenna gelah reh buena perbapan entah pe Mamre si tuhu-tuhu: 1) Menyadari identitasna selaku kalak si enggo ngaloken keselamaten i bas Yesus Kristus; 2) Menyadari pentingna relasi si mehuli ras Dibata i bas Yesus Kristus, janah; 3) Tuhu-tuhu nggeluh erkemalangen man Dibata si dampakna banci inanami kalak si deban, khususna pernanden, anak-anak, kempu, ras ise pe si lit i sekelewetna. PA-nta sendah pe ngajuk kita kerina, khususna kam kerina perbapan entah pe Mamre gelah jadi usihen i bas nggeluh ersembah man Dibata erpalasken Kata Dibata si jadi ogenta sendah.

Mpebagesi Ogen

Perikop si jadi ogenta sendah lit i teruh judul “Jakup ipasu-pasu Dibata i Betel.” I bas terj. Bhs. Ind., nina, “Yakub di Betel untuk kedua kalinya,” entah pe “Yakub dengan rombongannya pergi ke Betel” i bas terj. Alkitab BIMK. Engkai maka ipasu-pasu Dibata Jakup i Betel? Kai si erbahanca maka Jakup mulihken ku Betel si peduakaliken? Penungkunen-penungkunen enda si akap kami banci turah arah judul-judul perikop ogenta nari.

Jakup e me sekalak tokoh i bas Padan Si Ndekah si penting i bas tumbuh kembang bangsa Israel. Abraham, Isak, ras Jakup e me Bapa-bapa Leluhur bangsa Israel. Arah Jakup nari tubuh 12 anak dilaki si jadi bangsa pilihen Dibata, e me bangsa Israel. Turi-turin kerna Jakup akap kami enggo semal man banta kerina. Sope si jadi ogenta sendah lit piga-piga peristiwa si banci ikataken labo peristiwa si maba keriahen man Jakup ras keluargana. I bas bindu 32 ituriken maka lawes Jakup ras keluargana i bas rumah Mamana Laban i Haran nari. Perlawes Jakup i jenda labo terjadi secara baik-baik tapi banci ikataken kiam i bas Mamana nari. Kenca bage i bas bindu 33 ituriken, jumpa Jakup ras Esau kakana kenca enggo 20 tahun la siangkan. Jumpa kalak enda duana ras erdame. Kenca enggo erdame ras seninana, kepeken lenga dung perbeben Jakup. I bas bindu 34 ituriken kerna peristiwa tragis si reh nderpa Dina, anak Jakup si diberu. Idatken Dina pelecehan seksual si ilakoken Sikem. Pelecehen e ibalas Simeon ras Lewi turang Dina alu munuh Sikem ras kerina dilaki i kota Sikem. Kenca peristiwa kekerasen ndai bengket kita ku bas Kata Dibata si jadi ogenta sendah. 

Isuruh Dibata Jakup lawes ku Betel. I bas ay. 1 ikataken Dibata nina, “Laweslah kam minter ku Betel. I jah me kam ringan. Pajekken i jah sada batar-batar ingan ersembah man bangKu. Aku kap Dibata si petandaken baNa man bandu Betel sanga kam lompat nadingken seninandu Esau.” Lit telu kata penting i jenda, “lawes,” “ringan,” ras “ersembah.” I bas terj. Bhs. Ind., nina, “pergilah,” “tinggallah” ras “dirikanlah sebuah mezbah bagi-Ku.” Perentah enda penting erkiteken situasi kegeluhen Jakup ras keluargana lit i bas situasi si dem alu perbeben ras ancamen. I bas situasi si bagenda rupana, reh Dibata ngingetken Jakup kerna sada ingan i ja marenda enggo ipulahi Dibata Jakup i bas kiniseran nari janah iarak-arak Dibata Jakup kujapa pe ia lawes. Telu perentah ndai labo guna melarikan diri dari masalah, tapi persinget maka lit Dibata si erkuasa, si pernah mulahi Jakup i bas kiniseranna nari bage pe ngarak-ngarak Jakup i bas kegeluhenna.

Ay. 2 - 4 encidahkenca maka enggo sempat ilakoken keluarga Jakup ersembah man dibata-dibata si deban. Emaka isuruh Jakup gelah ngambekken kerina dibata-dibata si deban e, ngelakoken acara pembersihen diri, ras make uis si mbersih sope jumpa ras ersembah Dibata i Betel. Enda encidahken dua hal, si pemena, sebage pemimpin i tengah keluarga, la kepen ngasup Jakup mabai keluargana ersembah man Dibata. Tapi amin bage gia, nggit denga keluargana patuh man Jakup. Si peduaken, kai si ilakoken keluarga Jakup e me bentuk nyata pertobaten, nadingken si jahat janah mulihken ersembah ku Dibata. I bas ayat-ayat berikutna ituriken maka iarak-arak Dibata Jakup ras keluargana seh ku Betel alu mejuah-juah, la lit ise pe si pang mengganggu perdalanen kalak enda. Janah ilakoken Jakup kerina si enggo iperentahken Dibata man bana, ipajekkenna ingan ersembah man Dibata.

Pengkenaina

PA-nta sendah ngajuk kita kerina, khususna kam kerina Mamre kami, gelah ersembah man Dibata alu tutus, janah mabai kerina isi jabu ersembah man Dibata. Adi sisungkun AI kai nge manfaat ibadah keluarga? Bagenda nina, “Ibadah dalam keluarga Kristen penting karena menjadi pusat pertumbuhan rohani, sarana bagi orang tua untuk mendidik anak mengenal Tuhan, serta benteng perlindungan rumah tangga dari pengaruh buruk dunia. Aktivitas ini menyatukan seluruh anggota keluarga di dalam kasih Kristus.” Akap kami kerna manfaat ibadah keluarga enda seh kel pentingna. Ertina harus terus siupayaken i bas jabunta masing-masing, amin pe mungkin lenga terban setiap wari erkiteken kesibuken ras si debanna.

Jakup ras keluargana mereken usihen man banta maka selaku perbapan harus lit lebe i bas kam relasi si mehuli ras Dibata secara pribadi. Tek kami maka kam kerina perbapan entah pe Mamre si tutus ngikuti kerina dahin-dahin pelayanen i Gereja, baik kebaktin-kebaktin, PA, PJJ, ras kerina dahin pelayanen si deban, enggo lanai man iah-iahenken. Enggo lit kesadaren i bas diri sendiri guna nggeluh rembak ras Tuhan alu hal-hal si konkrit, bagi ertoto, ngoge Pustaka, proaktif ikut muat bagin i bas dahin pelayanen, rsd.-na. Kalak si rembak ras Dibata enggo lanai mesera ipersingeti Kata Dibata, nggit ia robah ku si mehuli sue ras peraten Dibata.

Adi perbapan enggo nggeluh rembak ras Dibata, banci ipastiken enggo lanai mesera mabai isi jabu ersembah man Dibata, bagi keluarga Jakup si nggit megiken ras ngelakoken perentah Jakup guna tuhu-tuhu ersembah man Dibata. Emaka, marilah kita ertekad guna menjalin relasi si mehuli ras Dibata. Pindolah gegeh i bas Dibata nari gelah ipengasupNa kam kerina Mamre kami jadi usihen, mabai kerina isi jabu ersembah man Dibata janah ngelakoken kerina si jadi peraten Dibata i bas kegeluhen si tep-tep wari. Dibata si mpegegehi ras mpengasup kam kerina Mamre GBKP.