PJJ GBKP Tgl. 2 - 8 Oktober 2016

PJJ GBKP TGL. 2 - 8 OKTOBER 2016

Pdt. Larena br. Sinuhadji (Nd. Rey Tarigan)

Tema : BUJUR MAKEKEN SUKAT-SUKAT (Lukas 3:7-14)

Penjelasen Bahan Ogen & Renungen

Pengogenta ngerana kerna Khotbah Johanes Peridiken ras respon kalak si nterem si megi-megi khotbahna guna iperidiken. Asum enterem kalak reh ndahi Johanes maka iperseri Johanes kalak si nterem ndai ras kalak jahat (TB-LAI, “Keturunan Ular Beludak” adalah ular gurun pasir yang sangat berbisa. Ular tersebut sering tidak dapat dibedakan dengan  sepotong ranting yang kering, sehingga ketika didekati tiba-tiba ular itu menyerang dan menggigit dan dapat mematikan.) Begem kira-kira biak kalak si reh ndahi Jesus darat nari idah mehuli tapi situhuna jahat. Si iarapken labo hanya tampilan luar iperidiken, bahkan lit pengakap maka kalak enda enggo pasti selamat sabab kesusuren Abraham. E maka nina Johanes, “Cidahken arah perbahanen tandana enggo jera i bas dosa-dosa nari, sabab adi la lit pertobaten enggo pasti iukum” (kerina batang kayu si la mehuli buahna, itabah janah iambeken ku bas api).

Kalak si enggo ertobat arus teridah i bas perbahanenna, i ja lit perobahen ku arah si mehuli. Ras enda ibuktiken arah respon kalak si nterem. Kai dage si arus ibahan kami? Ise lit dua bajuna, arus iberekenna sada man kalak si la lit bajuna, bage pe ise si lit nakanna arus ibagikenna. Ertina, soal kebutuhen entah hal si penting, si kin arus lit bas sesekalak jelma : uis, pangan. Enggo pasti lebih dua bajuta, janah arus nggit kita erbagi (mediate) man kalak si sama sekali la lit uisna. Bage pe pangan, sabab terkadang riba-iba paganta sedangken i bas dampar si deban, lit deba kalak kelihen si kin arus iperdiateken (bdk. Pertoton Tuhan, “bereken man kami nakan cukup i bas wari si sendah enda”). Jadi si pemenana, lit kesediaan guna berbagi.

Reh ka pengalo cuke si atena iperidiken, janah nungkun, “kai arus ilakoken kami? Ola pindo buen asa si enggo itentuken.” Kalak enda situhuna kaki tangan pemerentah Romawi si paksa si e berkuasa nandangi kalak Jahudi. Si biasana nembeh ate masyarakat si nterem bahkan ikataken kalak perdosa (bdk. Sakeus pengalo cuke si minter lit aksina asum ia ertobat, “Setengah i bas erta-ertangku ku bere man kalak musil; janah adi lit kalak enggo kutipu, kuulihken man bana empat kali lipat”). Berarti hal si biasa man pengalo cuke guna muat cuke (pajak) lebih asa si enggo itentuken.

Je nari reh ka tentera si mindo gelah iperidiken, “kai dage arus ibahan kami?” Ola merampas entah ngataken salah man si la ersalah. Janah pebias-biaslah gaji siibereken man bandu.” Lit sada kebiasaan si ilakoken tentera paksa si e, erkiteken gaji si sitik iakapna, maka ilakokenna merampas, memeras,  ras erbahan laporen palsu : si benar jadi salah bage pe sebalikna ras tujunna guna nambahi uang masuk. Ertina, soal cukup entah lang tergantung i bas kita mampu menatalayanken kai si enggo ibereken Tuhan banta.  Sabab sitik pe banci bias, mbue pe banci nge kurang adi la beluh kita mengkelolasa alu bijaksana. E maka nina Johanes, “Pebias-biaslah gaji si ibereken man bandu”.

Tema i bas PJJ nta sendah, “Bujur makeken sukat-sukat”. Penungkunenna, sukat-sukat ise? Ise tolok ukurna i bas kita nehken kebujuren? Enggo pasti Firman Tuhan, palas kebujurenta Kata Dibata, labo manusia. Adi manusia enggo pasti berbeda-beda, seh makana melala kalak membenarken kajahaten erkiteken palasna ipakena sukat-sukat manusia. “Aku korupsi, nangko, ndayaken narkoba erkiteken musil aku, asangken la man anak-anak e, maka aku ngelakoken si bage”. Jujur, bujur, nggeluh berintegritas (utuh, kai sibelasken  e kang silakoken), la tergantung kondisi ras situasi, tapi i japa pe, katawari paksa pe, uga pe keadaanta tetap arus kita nggeluh berintegritas. Sabab melala siidah praktek kinilabujuren i sekelewetta alu erbage-bage alasen : korupsi, pungli, sogok, markup harga, rsd.

Firman Tuhan sendah mpersingeti kita, maka kalak si enggo iselamatken Tuhan arus teridah buah kinitekenna i bas kegeluhen si tep-tep wari. Kalimat, “Kai si arus kuban?”, merupaken kalimat evaluasi diri, introspeksi diri, respon nandangi Firman Tuhan si ibegiken kita, maka Dibata e la terjeng berlalu bage saja, tapi mpelimbarui geluhta wari lepas wari, mpesikap geluhta maka perukuren, pengerana ras perbahanenta sentudu bagi si ngena ate Dibata.