PA Kategorial GBKP Tgl. 4 - 10 September 2016

PA MAMRE GBKP TGL. 4 - 10 SEPTEMBER 2016

Pdt. Larena br. Sinuhadji

(Kegeluhen Sosial) HUT PERMATA

Ogen : Kolose 3:21

Tema : ANAKKU, KANDU-KANDUKU

Tujun :

1) Nuriken perbahanen-perbahanen si mpesega-sega anak

2) Mereken tanda (kado) i bas perayaan HUT PERMATA

Metode : Aksi Man PERMATA

Penjelasen Bahan Ogen

Ogenta sendah sada bagin i bas pedah-pedah praktis erpalasken etika kristiani si isehken rasul Paulus man perpulungen i Kolose. Pedah-pedah e menyentuh kerina bagin i bas jabu-jabu kalak Kristen, perbulangen entah pe perbapan, ndehara entah pe pernanden, anak-anak, bage pe budak si paksa si e masih denga lit. Lit keseimbangen pedah-pedah antara perbulangen ras ndehara, orang tua ras anak, bage pe antara tuan ras budakna.

Pedah i bas ay. 3 enda itujuken khusus man orang tua nandangi anak- anakna nina, “O, kam orang-tua ola rusursa junguti anakndu gelah ola bene ukurna”. I bas Alkitab Terj. Baru (TB-LAI) nina, “Hai bapa-bapa, janganlah sakiti hati anakmu, supaya jangan tawar hatinya”. I bas Alkitab Bahasa Indonesia Sehari-hari (BIS) nina, “Saudara-saudara yang menjadi ayah! Janganlah menyakiti hati anak-anakmu sehingga mereka menjadi putus asa”. Lit perbedan terjemahen i bas bahasa Indonesia pedah enda itujuken khususna man perbapan nandangi anakna. Adi sinen i bas bahasa aslina pe i je tertulis “pater” (bapa). Mungkin banci ka ipahami sebage tanggung jawab duana perbapan ras pernanden, sebab i bas piga-piga terjemahen bagi Today’s Englis Version ras Contemporary English Version iterjemahken “parents”. Tapi i bas kesempaten enda erkiteken PA Mamre fokus kita i bas relasi antara perbapan ras anak-anakna.

Adi sinen budaya si dominan paksa si e, khususna budaya Romawi, lit sada hukum si igelari Patria Potestas e me kuasa perbapan nandangi anak-anakna (William Barclay, 2002, hlm. 244). I bas budaya e, perbapan berhak ngelakoken kai pe nandangi anak-anakna: njadiken buruh si erdahin i bas jumana, ndayakenca man kalak si deban, bahkan ngukum anak-anakna seh mate. Ertina status anak paksa si e menam seri ras budak. Lit relasi si la seimbang antara perbapan ras anak-anakna. I bas budaya si bagenda tentuna la sue ras kiniteken kalak Kristen si erpalasken keleng ate Dibata i bas Kristus. E maka rasul Paulus nehken pedahna man perbapan gelah ngkelengi anak-anakna. I bas ngkelengi anak e, lit pengakun i bas orang tua nari bahwa anak e titipen Dibata, janah orang tua ertanggung jawab nehken kerina si mehuli man anak-anakna sue ras sura-sura Dibata.

Sue ras ogenta sendah, bentuk konkrit ngkelengi anak e me ula ban bene ukur anak-anak (bhs. Ind. nina, “tawar hatinya”, “putus asa”) erkiteken rusursa ijunguti. I bas bhs. Ind. ikataken, “janganlah sakiti hati anakmu”. Sakit hati i jenda banci terjadi erkiteken ipake perbapan denga budaya Romawi ndai. Banci ka jadi erkiteken perbapan la jadi usihen i lebe-lebe anak-anakna. Sebab perbapan kalak Kristen e me peminpin si ertanggung jawab minpin isi jabu ku bas si mehuli sue ras sura-sura Dibata. I bas si e wajar nge adi perbapan e jadi usihen anak-anakna i bas kai pe, subuk i bas pengerana, cara rukur, pengelako, rsd.

Pengkenaina

Tema si seh man banta “Anakku Kandu-kanduku” alu tujun gelah Mamre ngasup nuriken perbahanen-perbahanen si mpesega-sega anak ras mereken tanda (kado) i bas perayaan HUT PERMATA. PA-nta sendah ibahan i bas rangka HUT PERMATA si pe-68-ken i bas tahun enda. Tentuna gundari enda enggo melala Mamre si merupaken “produk” entah pe bentukan PERMATA ndube. Ertina secara kelembagaan kategorial, PERMATA GBKP enggo melala menghasilken Mamre-mamre si labo saja beluh berorganisasi tapi pe erkemalangen man Dibata, jadi usihen i bas kai-kai pe. I bas si e tentuna patut kita ngataken bujur man Dibata. Adi enggo melala Mamre si erkemalangen man Dibata tentuna cara rukurna pe nandangi anak-anakna enggo ipelimbarui Dibata.

Sue ras tema bage pe ogenta sendah, sebage Mamre, iajuk kita gelah tuhu-tuhu ngkelengi anak-anak erpalasken keleng ate Dibata, si secara konkrit iwujudnyataken alu, si pemena lebe, relasi si ndeher ras anak-anak. Tema-nta sendah nina “kandu-kandu” e me sahabat. Sebab i bas kinatana melala perbapan si hubungenna la ndeher ras anak-anakna. I bas PA PERMATA i bas piga-piga waktu si lepas alu tema “Mehamat er-Bapa”, melala PERMATA, khususna anak perana, si nurikenca la ia ndeher ras bapana, lebih ndeher ia ras pernanden, bahkan rusur la sicocoken ras bapana. Kinata si bagenda tentuna jadi bahan evaluasi man banta perbapan. Erkiteken sosok bapa i tengah jabu seh kel pentingna i bas tumbuh kembang anak-anakta. E maka terbeluhen kita ngaturken waktu si berkualitas guna banci ndeher ras anak-anakta. Si peduaken, marilah kita menjadi pendengar yang setia. Melala kasus kenakalan remaja i bas paksa gundari enda erkiteken la lit ise pe si megiken keluhan-keluhan anak. Terkadang kita perbapan enda enggo leben emosinta si ndarat asangken megiken lebe kai si terjadi. Si peteluken, mari radu ras kita tuhu-tuhu jadi teladan i bas kai pe. Si peempatken, ula lupa sibaba anak-anakta i bas pertotonta man Dibata, gelah ipengasupNa kita jadi perbapan si idolaken anak-anakta.  

PA MORIA GBKP TGL. 4 - 10 SEPTEMBER 2016

Pdt. Larena br. Sinuhadji

Si Man Ogen : Perngandungen 3:1-24

Tema : INGETLAH PERKUAH ATE TUHAN

Tujun : Gelah Moria :

1) Ngerenungken pengalamen nggeluh bangsa Israel i bas kiniseran si mesangat

2) Tetap nginget perkuah ate Tuhan i bas kegeluhenna

Metode : Meditasi

Penjelasen Bahan Ogen

Kitab Perngandungen isina kerna pengalamen nggeluh bangsa Israel i bas kiniseran si mesangat sialamina, subuk kerna keruntuhen Jerusalem ras pembuangen ku Babil. Janah kiniseran sialami bangsa Israel e situhuna erkiteken kesalahen bangsa Israel sendiri si kedungenna iukum Tuhan arah bangsa si deban. Amin bage gia, i bas kitab enda pe lit i je teridah kiniteken ras pengarapen bangsa enda man Tuhan amin tuhu-tuhu mberat kiniseran si arus ialami. Janah kiniseran enda icidahken alu bentuk puisi si rusur ipake i bas kebaktin pesta tahunen erpuasa ceda ate kerna kiniseran si pernah ialami bangsa e. Alu bage bangsa e ipersingeti rusur gelah tetap taat man Tuhan.

Judul i bas perikopta, “Ukumen, erkadiola ras pengarapen” (i bas Alkitab TB-LAI nina, “Penghiburan dalam penderitaan”). Rikutken judul situlisken i bas bahasa Karo, maka enggo kerina lit i je: ukumen bas Dibata nari erkiteken kejahaten bangsa e, penyesalen ras tetap erpengarapen man Tuhan gelah ipulahi Tuhan i bas ukumen nari.

Kiniseran-kiniseran si ialami bangsa Israel jelas ituriken i bas kerina ayat-ayat si jadi ogenta: igera ku kegelapen si seh kel bagesna, iulih-ulihiNa rusur nggudam, daging ras kulingna ipelepasNa kesip, tulan-tulanna meripuk ibahanNa, itamaken ras ieruk ku bas penjara, ipaksa nggeluh i bas kegelapen kematen si rasa lalap, iiket alu rante, jadi sasaren anak panah, idampesken seh getem, ipesega-sega ras itawai kala, ipaksa guna nginem inemen sipagit. Idehken Tuhan ayona seh ku taneh dingen penggelen ipenna perban man batu rintik. Perban mesangatna kiniseran sialami bangsa e, enggo lupa pe ia uga nanamna mejuah-juah, uga dame ras malem ate, persan besurna alu erbage-bage kiniseran. Bahkan la nari atena gedang nggeluh, pengarapenna nandangi Tuhan enggo bene. Tapi kedungenna turah mulihi semanangat ras pengarapen bangsa e, erkiteken ingetna keleng ate Tuhan si la erkeri-kerin (bdk. Kel. 20:5-6, iukum Tuhan kalak si ernembeh ate baNa, anak-anakna seh ku kesusuren si peteluken ras peempatken, tapi tetap Kukelengi kalak si engkelengi Aku seh kempak meribu-ribu kesusuren). Beliden keleng ate Tuhan asangken ukumen si bakal entah pe si enggo isehkenNa asal kita erkadiola ras hidup baru bagi si ngena ateNa. Keleng ate Tuhan mbincar tep-tep erpagi-pagi, bali tetapna ras matawari si pultak arah Timur. Bagem icidahken Pergandungen banta maka keleng ate Tuhan si pasti dingen la ersibar, la erkeri-kerin ku bas kegeluhenta. Robah dingen nggeluhlah bagi si ngena ateNa.

Pengkenaina

Labo lit kita manusia si nggeluh i doni enda si isilahi perbeben. Pasti lit kerina perbebenta, tapi enggo pasti beda kadar beratna setiap jelma. Kelebihenta kalak si tek man Kristus asum kita ngenanami kiniseran, maka Tuhan mereken gegeh man banta, dingen kiniseran e la melebihi kapasitas gegehta, janah pasti Tuhan nampati kita mereken serpang pulah (bdk. 1 Kor. 10:13). E maka perlu ipertanyaken kedewasan kinitekenna asum litna perbeben dekahen kita kelsehen, jungut-jungut, nalaken kalak bahkan Tuhan lit ka deba murtad ras ndelis bana guna ndungi persoalenna.

Tetap ernalem man Tuhan ras ula sirangi perpulungen. Lit ungkapen ngatakenca, asum meriah ukurta sibagiken sukacita man teman, kalak pe ikut ermeriah ukur. Asuk sedih kita erkiteken mbuena persoalenta, sibagiken man teman, sharing kita, reh nahangta siakap maba baban si mberat e. Tuhan tetap erdahin arah gegeh, pengarapen, keriahen ukur bage pe keluarga ras teman si tetap memotivasi kita asum kita iderpa perbeben.