PA Kategorial GBKP Tgl. 11 - 17 September 2016

PA MAMRE GBKP TGL. 11 - 17 SEPTEMBER 2016

Nrs. Pdt. Larena br. Sinuhadji (Bp. Rey Tarigan)

Mergermet Nandangi Roh Jaman

Ogen : Matius 7:15-20

Tema : METENGETLAH NANDANGI NABI-NABI PERGUAK

Tujun : Mamre Ngasup :

1) Nuriken perbahanen-perbahanen si semal ilakoken nabi-nabi perguak i bas ogen ras jaman enda

2) Nuriken kai-kai saja si arus ilakoken Mamre guna ngelawan nabi-nabi perguak

Penjelasen Bahan Ogen

Bahan ogenta sendah e me sada bagin i bas pengajaren-pengajaren Yesus i das uruk, ibenaken i bas bindu 5 nari. I bas Alkitab Terjemahan Baru (TB-LAI) ogenta sendah masuk ku bas sada perikop si ibere judul “Hal pengajaran yang sesat”, i bas Pustaka si Badia i bere judul “Kerna batang ras buahna”, e me pengajaren Yesus kerna nabi-nabi perguak entah pe nabi-nabi palsu. Nabi-nabi perguak enggo lit i tengah-tengah bangsa Israel nai-nai nari (bdk. Ul. 13:1-2; Ul. 18:20-22; Jer. 14:14; Esek. 22:28; rsd.). I bas Padan si Ndekah ciri-ciri nabi-nabi perguak enda e me : peminem ras pemabuk (Jes. 28:7); melasken kata la tuhu, mabai ku si papak, macik dingen la bujur perbahanenna, ras erlua-lua (Jer. 5:31; 23:13,14); penebu-nebu ras ngaloken duit sogok (Mi. 3:5,11); la ertanggung jawab ras la terteki (Sep. 3:4); rsd. I bas paksa Yesus erdahin denga i tengah-tengah bangsa Israel lit nabi perguak (bdk. Luk. 6:26). Adi sioge Mat. 23:1-36, mungkin kalak Parisi ras Guru-guru Undang-undang termasuk i bas kategori nabi-nabi perguak. I bas paksa rasul-rasul pe lit nabi-nabi perguak i bas istilah si deban e me “rasul-rasul perguak” entah pe “guru-guru perguak” (bdk. Perb. 13:6; 2 Kor. 11:13; 1 Tim. 1:6-7; 2 Tim. 2:16-18). Janah i bas ogenta sendah enggo isingetken Tuhan Yesus kerna kerehen nabi-nabi perguak i bas paksa si reh (bdk. Mat. 24:15-28).

Nabi-nabi perguak igambarken alu anding-andingen “bagi serigala si merawa” (i bas bhs. Yun. “serigala” ertina “rakus” ras “suka memangsa”) bage pe “batang si la mehuli”. Adi sibandingken ras Luk. 6:43-45 si jadi rujuken ogenta sendah i bas Pustaka si Badianta, i bas batangna pe enggo la mehuli apai ka buahna, ertina nabi-nabi perguak i bas pusuh peratenna nari pe enggo jahat. I bas ay. 19 tangkas maka nabi-nabi perguak datken ukumen i bas Dibata nari.

Arah anding-andingen “biri-biri” bage pe “batang ras buah si mehuli” ate Tuhan Yesus gelah kalak si tek ngikutken pedah-pedah Dibata bage pe diriNa sebage “Permakan si tuhu-tuhu” (bdk. Joh. 10:11) ras “Batang Anggur si tuhu-tuhu” (Joh. 15:1-8). Kalak si tek si tetap nggeluh i bas Kristus tetap ikawali Dibata janah erbuah kerina si mehuli i bas Dibata nari ras jadi pasu-pasu man kalak si deban (bdk. Gal. 5:22; Ef. 5:1-5; Kol. 1:10; rsd.). I bas kerembaken si tuhu-tuhu ras Dibata mpengasup kalak si tek mbedakenca apai si rehna i bas Dibata nari ras apai si rehna i bas si jahat nari.

Pengkenaina

Tema i bas PA-nta sendah e me “Metengetlah nandangi nabi-nabi perguak” alu tujun  gelah Mamre ngasup nuriken perbahanen-perbahanen si semal ilakoken nabi-nabi perguak i bas ogen ras jaman enda, ras ngasup nuriken kai-kai saja si arus ilakoken Mamre guna ngelawan nabi-nabi perguak. I bas jaman gundari enda, akap kami enggo la nai lit nabi bagi si lit i bas Pustaka si Badianta. Si lit e me kalak si ngaku-ngaku dirina sekalak nabi, entah pe pengikut-pengikut aliren tertentu si nggelari peminpinna sebage nabi. Si melala terjadi i bas jaman gundari enda e me pengajaren-pengajaren si papak. Emaka lebih tepat akap kami judul i bas Alkitab TB-LAI nari “Hal pengajaran yang sesat”, sebab si penting si perlu iwaspadai e me pengaruh si la mehuli si ibaba pelaku ajaran sesat guna ncedai ras nirangken kalak si tek i bas kinitekenna man Yesus Kristus. Adi pelakuna enggo pasti datken ukumen i bas Dibata nari adi la ia sadar ras ertobat. Erpalasken si e akap kami tepat sub judul “Mergermet nandangi roh jaman”, erkiteken melala roh jaman gundari enda si la sue ras kinitekenta i bas bentuk pengajaren-pengajaren si papak. Pengajaren-pengajaren si papak si berkembang i bas gereja baru-baru enda umpamana : Kitab Padan si Ndekah enggo lanai banci ipergunaken sebab enggo lanai berlaku, si berlaku e me Padan si Mbaru ngenca, konsekuensina man kalak si tek e me enggo lanai mereken persembahen-persembahen bagi si lit i bas Padan si Ndekah. Kalak si tek enggo lanai mindo pengalemi dosa i bas Dibata nari emaka i bas pertotonna pe ula kataken “alemi salah dosa kami”, rsd. Lenga ka termasuk pengajaren-pengajaren papak si deban si lit i bas doni enda.

PA-nta sendah ngajuk kita Mamre gelah reh rembakna kita ras Dibata. Kerembakennta ras Dibata si tuhu-tuhu mpengasup kita metenget, mergermet, iteh kita mbedakenca kai-kai saja si jadi sura-sura Dibata si arus ilakoken kita i bas geluhta ras sura-sura Iblis entah pe sura-sura kalak jahat si atena ncedaken ras nirangken kita i bas Dibata nari. Pindolah gegeh i bas Dibata nari gelah KesahNa si Badia mpengasup kita pang ngataken si benar ras nulak pengajaren-pengajaren si papak. Erkiteken tugas kenabian si payo i bas paksa gundari enda lit i bas kita sebage kalak si tek man Yesus Kristus, e me persuruhen Dibata guna meritaken Berita si Meriah ku tengah-tengah doni enda (bdk. 1 Pet. 2:9). Mari radu ras kita ertoto secara khusus man kalak si secara sengaja nehken ajaren-ajaren papak i bas gereja guna keuntungenna pribadi, gelah sadar ia ras ertobat (bdk. Jak. 5:19-20).