Khotbah GBKP Minggu Tgl. 18 September 2016

KHOTBAH GBKP MINGGU TGL. 18 SEPTEMBER 2016

Pdt. Larena Sinuhadji

Minggu Notoken Serayan Tuhan

Invocatio : “Sedangken perik tuan pe lit rumahna, kalimpines enggo dat asar. Itamakenna anakna i deher batar-batarNdu, TUHAN si Mada Kuasa, Rajangku dingen Dibatangku” (Masmur 84:4)

Ogen : Perbahanen Rasul 12:4-12 (Tunggal)

Khotbah : Kolose 4:2-6 (Antiphonal)

Tema : TOTOKENLAH SERAYAN TUHAN

Penjelasen Bahan Pustaka Si Badia

Perikopta lit i bas bagin penutup kitab Kolose si ibere judul “Pedah-pedah” (Alkitab BIS, “Petunjuk-petunjuk”). Bagin enda e me kap kerna kata telah guna ertoto ras hubungen perpulungen Kolose ras kalak si deban si la Kristen, subuk i bas perbahanen (ay. 5) bage pe i bas pengerana (ay. 6).

Paulus ngelumbaken man perpulungen Kolose gelah tutus ertoto (bdk. Luk. 18, “Ola ermedu-medu i bas ertoto gelah ula peltep pengarapenna”), ersikap katawari paksa (siap siaga) ras ngataken bujur man Dibata. I jenda ngataken bujur man Dibataa itekanken sebage bagian i bas pertoton kalak Kristen. Sabab umumna kita ertoto isina pemindon-pemindon tapi lupa ngataken bujur arah kai si enggo ibereken Tuhan banta. Janah  ipindoken Paulus gelah perpulungen pe tetap mendukung Paulus ras tim-na i bas pertoton gelah alu bage ibereken Tuhan kesempaten si mehuli guna meritaken KataNa (bdk. 1 Kor. 16:9). Rahasia Kristus (1:26,27; 2:2) sada istilah si ertina berita i bas Dibata nari kerna Kristus, sada berita i ja mbarenda rahasia denga lenga lit si metehsa. Janah erkiteken semangatna i bas Paulus mberitaken Kata Dibata nge maka ia ipenjaraken. Janah sekali nari Paulus mindo dukungen doa i bas perpulungen nari gelah banci mberitaken Kata Dibata alu mehuli, jelas rikutken si ngena ate Tuhan. Sabab paksa si e mbue ka nabi-nabi palsu si hanya mberitakan sue bagi selera pendengar petembil ras sura-sura Tuhan.

Je nari ipedahken Paulus gelah perpulungen bijaksana i bas bergaul ras kalak si deban si lenga itandaina Yesus Kristus. Pakeken setiap kesempaten gelah kegeluhen perpulungen e banci jadi “surat Kristus” (terang) man sekelewetna si lenga itandaina Kristus. Kata-kata si ibelaskenna kata-kata si membangun, berisi (bhs. Ind. : “jangan hambar”), ula gelah menggo saja ngerana tapi la lit isina, la lit maknana. Siukurken lebe i bas kita ngerana gelah ula sempat erbanca kitik ukur kalak. Siusahakenlah arah pengerananta pe kita banci er-PI man kalak si deban.

Ogen si pemena ngerana kerna kiniseran si ialami rasul-rasul Tuhan erkiteken Berita si Meriah, tapi Tuhan tetap nampati. Asum Herodes Agripa 1 jadi raja perpulungen kalak Kristen ngenanami kiniseran si mesangat. Rasul Jakub ibunuh alu pedang. Petrus itamaken ku bas penjara, i ja ia ijaga empat terpuk prajurit, tep-tep terpuk empat kalak. Asum Petrus bas penjara, perpulungen alu ate tutus tetap ertoto man Dibata kerna ia. Tuhan ndengkehken pertoton Petrus ras kerina perpulungen. Reh malekat Tuhan mulahi Petrus, si niakap Petrus ia mengalami pengenehenen. Arah si e mulihi reh tetapna ukur Petrus ernalem man Tuhan, maka Tuhan alu kuasaNa ras erbage cara banci nampati kalak si tetap setia ernalem man baNa.

Invocationta sendah, i bas Alkitab BIS nina, “Bahkan burung pipit mendapat rumah dan burung layang-layang sebuah sarang, tempat mereka menaruh anaknya di dekat mezbah-Mu, ya TUHAN Yang Mahakuasa, Rajaku dan Allahku”. Mezbah utama entah pe batar-batar ingan nutung persembahen biasana letakna i darat i lebe-lebe Rumah Pertoton kalak Israel. I deher batar-batar e biasana melala sarang burung, entah pe ingan tading perik bage pe kalimpines erkiteken gara api si nutung persembahen-persembahen e erbahanca suhu udara si hangat, nyaman akap perik ras kalimpines ndai ringan i je. Ayat enda ilanjutken alu ay. 5-6 nina, “Seh kal sangapna kalak si tading i RumahNdu, banci ia lalap rende muji Kam. Sangap kal kalak si daten gegeh i bas Kam nari, si ertedeh ate ndahi Deleng Sion”. Ertina jelas, perik pe datken manfaat i bas litna Rumah Pertoton Tuhan, apaika kalak si tading i RumahNa, pasti datken gegeh ras kesangapen. Invocationta enda mempertegas penampat Tuhan, pengkawali entah pe pemeliharaan Tuhan nandangi kalak si ndeher ras Dibata.

Aplikasi

Tema i bas Minggu Notoken Serayan Tuhan sekali enda, “Totokenlah Serayan Tuhan”. Serayan Tuhan ertoto guna perpulungen, perpulungen pe ertoto guna serayanna.

• Mbue tantangen, rintangen si ialami Serayan Tuhan. Enggo pasti tantangen, rintangen, kiniseran si ialami Paulus, Petrus sebage rasul Tuhan berbeda ras si ialami SerayanTuhan i bas paksa gundari, bage pe penginjil-penginjil (pendeta) si tangtangna melayani i bas manteki GBKP. Tapi si pasti lit tantangen si man alanken (bdk. Pil. 3:10 “ikut aku ngenanami kiniseranNa”; Mrk. 8:34b “ise atena ikut ras Aku, arus maka ipersilahangna bana, ipersanna kayu persilangna jenari ikutkenna Aku”). Arah tantangen si lit labo e erbahanca kita surut guna melayani Tuhan alu tutus, tapi sipindo gegeh man Tuhan gelah IA mpengasup kita ngalaken erbage-bage tantangen e. Serayan Tuhan arus tetap penalamenna man Tuhan sabab kita erdahin bas peken anggurNa. Serayan Tuhan lebe arus megegeh ras tutus ertoto man Tuhan, sabab IA si mada dahin e.
• Gelah tetap setia serayan Tuhan ndahiken dahin pelayanen e, maka arus tetap itopang, idukung, itotoken. Sebab mekatep si terjadi  mbelin kel tuntuten man Serayan Tuhan, tapi jemaat kurang bahkan la pernah notoken serayanna. Lit ka deba perpulungen e, menganggap remeh dahin si idahiken Serayan Tuhan alu dekahen mandangi (kritik yang melemahkan). Payo Paulus, Petrus ngalami mbue kiniseran, tapi melala ka perpulungen si peduli dingen notoken ia, termasuk rekan-rekan sepelayanenna si saling mendukung. Emaka mpebuai ertoto guna Serayan Tuhan, gelah tetap sura-sura Tuhan si mentas arah kerina kata ras pengkebet Serayan Tuhan e, ras perpulungen ikutlah muat bagin i bas ndahiken dahin pelayanen e. Kerina kita ipake Tuhan guna jadi per-Berita si Meriah arah kata ras perbahanenta.
• “Ulih latih si merdang”, ende-enden si iciptakan Pt. Jakobus Barus mereken pesan, maka cukup latih per-Berita si Meriah i bas manteki GBKP si malem enda. Tapi kelatihen Serayan Tuhan si arah lebe la sia-sia, GBKP seh 126 tahun semakin diberkati ras tetap berkembang guna kemulian Tuhan.
• Tek kita erpalasken invocationta sendah, Dibata si mereken gegeh, kesangapen, ras ncukupken kerina si jadi kebutuhen geluh Serayan-serayan Tuhan si tutus dahiken dahin-dahin pelayanen i bas GBKP (bdk. Mat. 6:25-34). Emaka ula aru ateta, tetaplah semangat melayani Tuhan i bas GBKP.