PA Kategorial GBKP Tgl. 2 - 8 Oktober 2016

PA MORIA GBKP TGL. 2 - 8 OKTOBER 2016

Nrs. Pdt. Larena br. Sinuhadji (Bp. Rey Tarigan)

Memaksimalkan potensi hidup (roh)

Si Man Ogen : Galati 5:22-23

Tema : ULIH KESAH SI BADIA

Tujun : Gelah Moria :

1) Nuriken siwah ulih pendahin Kesah si Badia

2) Naksiken ulih pendahin Kesah si Badia asa gegeh ras kengasupenna

Metode : Nuratken ulih pendahin Kesah si Badia

Penjelasen Bahan Ogen

Teologi rasul Paulus i bas suratna man perpulungen Galati, manusia si enggo iselamatken alu anugerah Dibata i bas kiniteken man Yesus Kristus, labo manusia si secara otomatis pulah i bas kuasa dosa si lit i doni enda. E maka geluh kalak si erkiniteken merupaken kegeluhen si dem alu kondisi tarik-menarik antara kuasa doni enda ras kuasa Dibata. Tapi kalak si enggo iselamatken, lit i bas ia Kesah si Badia, si erkuasa erbahan perobahen ras mpegegehi i bas kegeluhena. Enda lebe si arus isedari kerina kalak si tek. I bas pemahamen teologis enda rasul Paulus mbedakenca kegeluhen si ikuasai dosa (sura-sura ukur manusia) ras kegeluhen si itegu-tegu Kesah si Badia. Lit tanda-tanda si tangkas i bas dua jenis kegeluhen enda.

Kegeluhen si ikuasai dosa tanda-tandana e me : erlua-lua, si nggesuh, la meteh mela; nembah man berhala ras erbahan ilmu sihir; simusuhen, rubati, mecimberu, perampus dingen kepentingenna saja ngenca iukurina. Erbahan perpecahen dingen erpihak-pihak. Sician-cianen, mabuk, pesta minem-minem seh mabuk ras si debanna. Kegeluhen si itegu-tegu Kesah si Badia tanda-tandana e me : lit kekelengen, lit keriahen dingen lit kemalemen ate, lit kesabaren, idalankenna perbahanen si mehuli, mehuli ia, setia. Meteruk ukurna dingen ngasup engkuasai diri.

I bas ay. 17 rasul Paulus ngatakenca “Sura-sura ukur manusia erlawanen ras Kesah si Badia ... Si dua enda ermusuhen”, ertina dua jenis kegeluhen enda la banci radu ras sidalanken, arus ipilih salah sada alu tegas, nggeluh i bas Kesah si Badia entah nggeluh i bas sura-sura ukur manusia (dosa). Keputusen lit i bas perpulungen Galati si paksa si e lit denga si statusna lenga jelas, ngikutken Undang-undang kalak Yahudi, ngikutken agama-agama kalak Yunani si sinkretis, entah ngikutken Kristus. I bas si e tentuna perlu status si jelas, e maka rasul Paulus ngatakenca i bas ay. 24-25, “kalak si enggo jadi sikerajangen Kristus Yesus; perukurenna secara manusia enggo ibunuhna i kayu persilang rikut ras kerincuhen dagingna bage pe sura-surana ... e maka lagu langkahta pe arus rikutken peraten Kesah”.

Aplikasi

Tema PA Moria i bas wari sendah e me “Ulih Kesah si Badia” i teruh sub tema “Memaksimalken potensi hidup (roh)”, alu tujun gelah Moria ngasup nuriken siwah ulih pendahin Kesah si Badia ras naksiken ulih pendahin Kesah si Badia asa gegeh ras kengasupen. Adi kita Moria isuruh nuratken ulih pendahin Kesah si Badia si siwah e erpalasken bahan ogenta sendah, akap kami enggo melala si dat ponten 100. Si jadi penungkunen evaluatif man banta Moria, uga praktekna i bas kegeluhenta si tep-tep wari? Mungkin melala kita si njabab lenga 100% ipraktekken. Memang i bas kinata kegeluhen ndalanken si siwah pendahin Kesah si Badia e labo murah bagi nuratkenca.

E maka guna memaksimalken potensi geluhta, khususna kegeluhen si itegu-tegu Kesah si Badia, la banci lang si niperluken si pemenana e me gegeh i bas Dibata nari. E maka pindolah rusur gegeh man Dibata i bas pertotonta. Si peduaken, mari radu ras sikembangken karakter disiplin ras tekun i bas kegeluhen pertendinta, si secara praktis enggo semal ilumbaken bagi ertoto, ngoge Pustaka si Badia secara teratur, nentuken target si ateta icapai i bas waktu tertentu, rsd.-na. Si peteluken, mari radu ras kita saling mendukung, mpegegehi, ras notoken sada ras si debanna i bas persadanta Moria. Si peempatken, nggit kita iproses Dibata i bas kegeluhenta. Kalak si nggit iproses lit kesadaren i bas pusuh perukurenna, umpamana, adi lit kesalahen entah dosa si ilakokenna, mis ia sedar, ngakuken kelepakenna i adep-adepen Dibata, mindo pengalemi dosa i bas Dibata nari, ras njadikenca sebage pembelajaren. Adi erbahan salah man sapih-sapihna, umpamana, mis ia sedar ras mindo maaf. E me tanda-tandana kalak si nggit iproses Dibata si terbedaken ras kalak Kristen si la nggit iproses Dibata si tanda-tandana la lit kiniteruken ukur bas dirina, la nggit ievaluasi, rsd.  

Cataten : Bahan ogen PA Mamre seri ras ogen PA Mamre minggu si lepas si enggo iposting minggu si lepas i bas blog enda.