Khotbah GBKP Minggu Tgl. 11 September 2016

KHOTBAH GBKP MINGGU TGL. 11 SEPTEMBER 2016

Nrs. Pdt. Larena br. Sinuhadji (Bp. Rey Tarigan)

Minggu Perdamen

Invocatio : “Tadingkenlah kejahaten, lakokenlah kai si mehuli, bulatkenlah ukurndu erbahan perdamen”

(Masmur 34:15)

Ogen : Pilemon 1:7-20 (Responsoria)

Khotbah : Heber 12:12-17 (Antiponal)

Tema : MERIAHLAH RAS ISE PE

Penjelasen Bahan Pustaka Si Badia

Surat man kalak Heber itulisken alu tujun mpegegehi perpulungen kalak Heber si sangana ngenanami kiniseran si mesangat. Kiniseran si mesangat e teridah i bas bindu 10:32-34 i ja perpulungen enda igombangi dingen isakiti i lebe-lebe jelma si nterem, erta-ertana keri irampasi kalak. Erkiteken situasi si bagenda rupana, perpulungen enggo reh urakna janah labo sitik si itadingkenna kinitekenna (murtad). Bahan khotbahta ibere judul “Pedah dingen pertenget” (terj. BIS, “Petunjuk dan peringatan”) i bas Alkitab TB-LAI ay. 1-17 ibere judul “Nasihat supaya bertekun dalam iman”. Ay. 12 e me kutipen i bas Jes. 35:3 nari merupaken kiasan si ertina ersemangatlah mulihken, megegehlah, i bas ndalani kegeluhen. Ay. 13 e me kutipen i bas Kuan. 4:26 nari, si ertina tetaplah erdalan i bas dalan si benar (dalan Tuhan) gelah kekoten isalihken jadi gegeh i bas Tuhan nari (dipulihkan). Duana ayat enda i bas penafsiren si deban banci iertiken gelah si megegeh mpegegehi si la megegeh kinitekenna, mereken semangat man si enggo kote kinitekenna ras mabai si enggo bene kinitekenna mulihken ku Tuhan. Ay. 14, “meriahlah ras ise pe”, i bas bhs. Ind. nina, “berusahalah hidup damai dengan semua orang” (BIS, “berusahalah untuk hidup rukun dengan semua orang) ikaitken ras “nggeluh bagi si ngena ate Tuhan”, i bas bhs. Ind. nina, “kejarlah kekudusan” (BIS, “berusahalah juga untuk hidup suci”), iumputi alu kalimat “sabab adi la bage ise pe labo banci ngidah Tuhan”, i bas bhs. Ind. nina, “sebab tanpa kekudusan tidak seorangpun akan melihat Tuhan (BIS, “sebab tidak seorang pun dapat melihat Tuhan kalau ia tidak hidup seperti itu”). Kedamen ras kekudusen e me tanda-tandana Dibata erdahin i tengah-tengah perpulungen, janah e me tanda-tandana kalak si erkiniteken man Dibata sebab lit kedamen ras kekudusen i bas dirina. Kedamen ras kekudusen e me bagin si la terpisahken i bas proses segedang geluh erkiniteken man Dibata. Emaka perpulungen iajuk gelah erpala-pala (berusaha) erbahan suasana si dem alu kedamen ras kekudusen, i bas dirina sendiri, i tengah-tengah perpulungen si sada kiniteken, bage pe i tengah-tengah masyarakat si lenga itandaina Yesus Kristus, gelah kerina jelma banci ngenanami keleng ate Dibata. Ay. 15-17 e me pengajuk gelah geluh sitatang-tatangen, sikeleng-kelengen, siergan, sihamat-hamaten, simaaf-maafen, ersada sada ras si debanna i bas perpulungen kalak si tek, gelah la lit ise pe si jadi batu antuken si erbahanca ceda pusuh perukuren anggota perpulungen (bhs. Ind., “akar pahit”, “racun”) apai ka seh nadingken kinitekenna man Yesus Kristus (murtad).

Bahan ogenta nuriken kerna perentah rasul Paulus man Pilemon gelah ialokenna mulihken budakna si Erguna (Onesimus) si sempat kiam nadingken Pilemon erkiteken mungkin itangkona sen entah barang si kerajangen Pilemon, banci ka erkiteken melala utangna man Pilemon (tersirat i bas ay. 18). Pilemon enda sekalak peminpin perpulungen kalak si tek i Kolose. Ikataken “perentah” erkiteken Pilemon e me rekan pelayanen entah pe anak rohani rasul Paulus, tek rasul Paulus maka Pilemon enda ngasup ngaloken ras erdame ras budakna si Erguna ndai. Bage pe tek rasul Paulus maka si Erguna enda enggo tuhu-tuhu ertobat ras geluh erkiniteken man Tuhan Yesus Kristus. Mindo kel Paulus gelah si Erguna enda lanai ialoken sebage budak tapi sebage seninana i bas Kristus. Paulus si njaminisa.

Invocationta i bas Alkitab TB-LAI nina, “jauhilah yang jahat dan lakukanlah yang baik, carilah perdamaian dan berusahalah mendapatkannya!” I bas Alkitab BIS nina, “Jauhilah yang jahat, lakukanlah yang baik, usahakanlah perdamaian dengan sekuat tenaga”. Perbahanen-perbahanen si mehuli ndeher ras perdamen, janah perdamen e arus iwujudnyataken i bas kegeluhen enda.

Aplikasi

Point-point penting si banci sirenungken arah kerina bahan Pustaka si Badianta sendah e me: 1) bahan khotbahta ngingetken kita maka dame, kedamen, perdamen e me bagin si la terpisahken i bas erkiniteken man Yesus Kristus. Erkiniteken e me relasi si mehuli ras Dibata si enggo leben iwujudnyataken Dibata i bas Yesus Kristus i tengah-tengah doni enda. 2) Emaka i bas invocationta dame e arus tuhu-tuhu siupayaken iwujudken i bas kegeluhenta si tep-tep wari ras ise pe, i ja pape, i bas kondisi si kugana pe. Em tandana Dibata erkuasa i bas geluhta si mpengasup kita nggeluh sue ras sura-sura Dibata (hidup dalam kekudusan). 3) Arah bahan ogenta, perdamen ertina ngasup kita ngaloken teman si erbahan salah man banta. Janah dame e mpengasup kita geluh ermeriah ukur ras ise pe tanpa memandang status sosialna, sukuna, agamana, rsd. Em si nimaksudken ngaloken kalak si deban uga litna (labo berarti membiarkan ketidakbenaran).  

Lit sada kutipen arah sekalak tokoh si geluhna ibaktikenna guna perdamen doni enda ras pelayanen man kalak si musil entah pe kalak si imarginalken i India e me Mother Teresa, nina, “Peace is not something you wish for. Peace is something you make, something you do, something you are, something you give away”. Ertina kurang lebih, “Damai itu bukan hanya sesuatu yang kita harapkan kita terima dari orang lain, damai itu harus kita ciptakan, damai itu harus kita lakukan, damai itu adalah kita, dan damai itu harus kita berikan kepada orang lain”.

Ertina, dame, perdamen, kedamen e labo cukup hanya irananken entah pe idiskusiken saja tapi arus siciptaken, silakoken ras sibagiken. Ibenaken i bas dirinta sendiri. Sebab mekatep kita pe lenga banci erdame ras dirinta. Lenga ngasup kita ngaloken keberadaanta. Kecewa kita man dirinta sendiri erkiteken geluhta la bagi si niarapken kita, umpamana. Selain si e, mekatep ka kita mbiar ngadapi kegeluhen si reh si erbahanca geluhta idemi alu rasa cemas, kuatir, la lit kedamen i bas dirinta sendiri. I bas si e perlu kita menata dirinta alu ngaloken keberadaan dirinta, tek kita maka kerina si lit bas kita, kerina si enggo icapai seh asa gundari, kerinana lit i teruh perkuah ate Dibata. Dibata si meteh si terbaik i bas kegeluhenta. Mindo kita i bas pertotonta gelah ipengasup Dibata kita ngaloken keberadaan dirinta. Kenca enggo kita ngasup erdame ras dirinta sendiri, perdamen e perlu siwujudken i tengah-tengah keluarganta. Sebab penakit-penakit sosial si terjadi i tengah-tengah masyarakat salah sada penyebabna erkiteken la lit kedamen i tengah-tengah keluarga. I bas si e tentuna adi lit persoalen i tengah-tengah keluarganta dungilah alu dame, simaafen sada ras si debanna. Kenca kita enggo banci nggeluh i bas perdamen i tengah-tengah keluarganta, babalah ku tengah-tengah Gerejanta. Gelah persadanta i bas Kristus tuhu-tuhu idemi alu kedamen si tuhu-tuhu (tulus), labo semu, tampak luar, jaga imej, rsd. Sebab lit ka pemahamen maka dame e gelah dame-dame saja, gelah ula rubat, gelah ula gejek, rsd., padahal adi memang lit konflik, konflik e la idungi alu payo, mbiar kita ndungisa, piah dungna mpeturah “akar pahit” i bas relasinta sada ras di debanna. Dame e labo berarti terbebas i bas konflik nari, sebab la lit kita si sempurna. Mari sikelola alu payo konflik si lit gelah banci kita siajar-ajaren i teruh keleng ate Dibata. I bas si e tentuna perlu kita meteruk ukur, berbesar hati, nggit kita erlajar, nggit kita ikoreksi. Mari sievaluasi dirinta, adi lit persoalenta ras senina turangta sada perpulungen, simaafen kita.

Mari radu ras kita ertoto, mindo gegeh arah Dibata nari gelah ipengasupNa kita jadi agen-agen perdamen i japa pe, ras ise pe kita bergaul, i bas kondisi si kugana pe. Gelah keleng ate Dibata i bas Yesus Kristus tuhu-tuhu banci inanami kalak si deban si lenga itandaina Yesus Kristus.