PA Kategorial GBKP Tgl. 18 - 24 September 2016

PA MAMRE GBKP TGL. 18 - 24 SEPTEMBER 2016

Nrs. Pdt. Larena br. Sinuhadji (Bp. Rey Tarigan)

Pendidikan Tata Krama Keseharian Man PERMATA & KAKR

Ogen : Markus 10:14; Pilipi 2:15

Tema : NEPA KESUSUREN SI MABA KINIHAGAN (Mencetak Bintang Dunia)

Tujun : Gelah Mamre Ngasup :

1) Mereken tips umum cara nepa sinusur si maba kinihagan

2) Njelasken kriteria anak-anak si mehaga erpalasken ayat-ayat si enggo isikapken

3) Nulisken surat man anakna si isina kerna arapen guna ibereken man anak-anak i tengah-tengah jabu

Penjelasen Bahan Ogen

Ogenta si pemena masuk i bas sada perikop si ibere judul “Ipasu-pasu Yesus anak-anak” (bdk. Mat. 19:13-15; Luk. 18:15-17). I bas Mat. 19:13-15 ikataken je “danak-danak”, i bas Luk. 18:15, “anak-anak si kitik denga”. Bas tradisi kalak Yahudi, anak-anak si nimaksud i jenda e me si usiana i teruh 12 tahun, si secara status sosial kalak Yahudi termasuk i bas kelompok sosial si lenga ianggap penting. Mungkin erkiteken status sosialna ndai emaka merawa ajar-ajar Yesus man kalak (orang tua) si maba anak-anakna ndai janah la ipelepasna ndeheri Tuhan Yesus (ay. 13). I bas Mat. 19:13 ikataken “iambati”, i bas Luk. 18:15 “ilarangna”. Tapi i bas ay. 14, sanga idah Yesus e, merawa IA man ajar-ajarNa nina, “Pelepas anak-anak e reh ndahi Aku, ola ambati ia, sabap kalak si bage nge kap empuna Kinirajan Dibata”. Kai si nilakoken Tuhan Yesus si idakepNa anak-anak e sekalak-sekalak, itamakenNa tanNa ku babona janah ipasu-pasuNa, ncidahkenca maka anugerah keselamaten e itujuken man kerina jelma termasuk man anak-anak si secara status sosial lenga ianggap penting.

Ogen si peduaken masuk i bas perikop si ibere judul “Ersinalsal bagi terang i bas doni” (TB-LAI, “Tetaplah kerjakan keselamatanmu”), e me pengajuk rasul Paulus man perpulungen Pilipi alu anding-andingen bintang si ersinalsal i bas doni. Maksudna gelah perpulungen Pilipi tampil beda i tengah-tengah lingkungenna alu ndalanken kerina si ngena ate Dibata gelah la ersalah dingen la erpandangen selaku anak-anak Dibata si serta si nggeluh i bas doni kalak si jahat dingen erdosa.

Aplikasi

Point penting si banci idatken kita i bas ogen si pemena e me, sehkenlah pengajaren si mbages kerna erkiniteken man Yesus Kristus man anak-anakta kitik-kitik nari. Sebab i lebe-lebe Dibata anak-anak pe seri hakna guna ndatken pemeteh ras pemahamen si serta kerna keselamaten i bas Yesus Kristus. I bas tradisi kalak Yahudi, perbapan nge si utamana nehken pengajaren-pengajaren praktis bage pe disiplin kerna geluh erkiniteken man Dibata (Kel. 10:2; Kuan. 13:24, W.R.F. Browning, 2007, hlm. 21). Emaka selaku Mamre, iajuk kita gelah nehken pengajaren si mbages kerna erkiniteken man Yesus Kristus arah teladanta.

Point penting si banci idatken kita i bas ogen si peduaken e me, sedarilah statusta sebage anak-anak Dibata si enggo iselamatken Dibata alu pengorbanen Yesus Kristus i kayu persilang. I bas si e, lit tanggung jawabta selaku anak-anak Dibata, e me ncidahken pola nggeluh si lit bedana ras doni enda. Adi ateta mencetak bintang dunia arah kesusurenta, benakenlah i bas dirinta sendiri. Cidahkenlah man anak-anakta maka kita enda kalak si enggo iselamatken Dibata e me tinepa Dibata si mbaru arah kerina pengkebet geluhta selaku Mamre, perbapan kalak Kristen.

Adi enggo ngasup Mamre jadi usihen (teladan) i lebe-lebe anak-anakta i bas erkiniteken man Dibata, enggo banci sipastiken maka anak-anakta pe meteh ras beluh er-tata krama rikutken etika umum bage pe etika budaya si sue ras si ngena ate Dibata. Sebab kai pe si mehuli si nisuraken kita man anak-anakta arus lebe banci iidah anak-anakta arah kerina pengkebet geluhta. E me warisen si la erkeri-kerin si banci siwarisken man anak-anakta. I bas si e pindolah gegeh i bas Dibata nari gelah ipengasupNa kita jadi usihen anak-anakta.