PJJ GBKP Tgl. 4 - 10 September 2016

PJJ GBKP TGL. 4 - 10 SEPTEMBER 2016

Pdt. Larena br. Sinuhadji

Tema : ERGAILAH KEGELUHEN (Pengerana 7:1-8)

Penjelasen Bahan Ogen & Perenungen

Kitab Pengerana merupaken hasil perenungen si mbages sekalak tokoh si igelari Pengerana kerna pengalamen kegeluhenna ikaitken ras kinitekenna er-Dibata sitep-tep wari.

I bas pengogenta sendah Pengerana seh i bas sada kesimpulen maka meherga kel kegeluhen si enggo ibereken Tuhan. Engkai seh ia ku bas kesimpulen si bage? Perban i bas pengalamenna melala idahna kalak erkadiola erkiteken la ipergunakenna waktu si lit guna ngergai kerina si enggo ibereken Dibata. Umpamana, tuhu-tuhu meherga kesehaten e, ‘di kenca kita enggo sakit ras irawat i rumah  sakit. Meherga kel siakap orang tua kenca ia enggo lawes nadingken kita. Meherga kel pendahin bekas pemere Dibata kenca kita enggo ipenjara erkiteken korupsi, rsd. E maka i bas ay. 1-4 i jenda isingetken Pengerana kerna ceda ate ras kematen, sabab wari ketubuhen ipudinta entah pe enggo sitadingken, sedangken wari kematenna i lebe-lebenta, ras la ise pe kita metehsa ndigan kita mate. E maka penting kel man banta guna nginget sada paksa waktu kita mate ras madin kita ndahi kalak si rate ceda. I bas kita ndahi kalak si rate ceda selain kehadirenta mereken pengapul man keluarga si rate ceda, man banta secara khusus pe isingetken guna banci makeken wari-wari kegeluhenta alu mehuli sope kita mate (bdk. Mas. 90:12).

Ay. 5-8 berkaiten ras uga kita banci mengisi wari-wari kegeluhenta alu hal-hal si positif. Ulin nge kita erteman ras kalak si pentar si banci mabai kita reh dewasana arah saran-saranna si membangun entah pe nggit kita ngaloken kritik bas kalak si deban nari (bdk. ay. 5, “madin kita ipandang kalak si erpemeteh, asangken ipuji kalak motu”). Adi enggo siisi kegeluhenta alu hal-hal si positif, si ngena ate Dibata, e maka kedungenna tuhu-tuhu mereken kemalemen ate man banta, keluarganta bage pe kalak si deban i sekelewetta. Makana i bas ay. 8 Pengerana ngatakenca, “ulin kap pendungina asangken pemenana”. Ertina, ope kita ngelakoken erbage-bage hal perlu sik-sik lebe, ukurken lebe baik-burukna, resiko si arus sitanggung maka sidalanken, gelah ula terjadi penyesalen. Happy ending sura-suranta i bas kita ndungi sada-sada hal si enggo ibereken Dibata. Maka iperluken kesabaren, kinigenggengen, kiniteruken ukur, sabab kadang si terjadi i bas geluhta mekatep turah si la bagi ukurta. Tapi tek kita Dibata mereken pergegeh man kalak si ernalem man baNa.

Geluhta pelin-pelin pemere idur Dibata nari, labo erkiteken gegeh beluhta. E maka syukuri, ngataken bujur katawari paksa arah kai pe si lit bas kita, subuk geluhta, jabunta, pendahinta, kinilitenta, rsd. Sekalak anak si rusur mindo ganti sepatu baru man orang tuana ‘di kenca enggo idahna lit ka temanna ersepatu baru, kedungenna berubah cara pandangna ras sikapna kenca enggo idahna anak si la lit nahena sembelah tapi semangat ras meriah ukurna asum simbel ras ia i bas dalan. Bersyukur erkiteken anggota tubuhta berfungsi alu mehuli si arus ipakeken alu mehuli, maksimal guna kemulian Tuhan. Keluarganta, anak-anakta, kinilitenta, kerina e titipen ngenca, pemere Dibata si arus sipakeken ras siergai. Arah perukuren si bage nge maka ngasup kita memaknai geluhta terulin asa si enggona. Hidup berguna, mati bahagia.