Khotbah GBKP Minggu Tgl. 9 Oktober 2016

KHOTBAH GBKP MINGGU TGL. 9 OKTOBER 2016

Pdt. Larena br. Sinuhadji (Nd. Rey Tarigan)

Minggu Moria GBKP

Invocatio : “Rupa si mejile la terteki, dingen kinijilen bene me tapi diberu si erkemalangen man Tuhan patut ndatken pujin” (Kuan-kuanen 31:30)

Ogen : Keluaren 1:15-22 (Responsoria)

Khotbah : Perbahanen Rasul 16:13-15,40

Tema : DIBERU SI ERKEMALANGEN MAN TUHAN

Penjelasen Bahan Pustaka Si Badia

Bahan Invocationta merupaken bagin terakhir i bas kitab Kuan-kuanen bindu 31 si ngerana kerna ndehara si cerdik, si seh kel serana muatsa, sabab ndauh kal ia ergan asangken permata si erndilap. Janah i bas ay. 30 enda maka itekanken soal inner beauty (kecantiken pusuh, karakter), labo kecantiken rupa si banci ipoles arah darat si sifatna la kekal ras membohongi (munafik : muka nabi pikiran kotor). Kecantikan wajah hanya bertahan seh ngayak 60 tahun, tapi kinijelen bas nari si ipalasi erkemalangen man Tuhan tahan rasa lalap dingen geluhna banci jadi berkat man kalak si deban.

Bahan pengogen si pemena ngerana kerna kehebaten dua kalak bidan si nampati persalinen kalak Heber e me Sipra ras Pua. Dalam rangka mengurangi jumlah dilaki kalak Israel si itindes i Mesir maka perentah Raja Firaun jelas, bunuh adi si tubuh e dilaki, tapi adi diberu pelepas saja nggeluh. Tapi bidan enda duana patuhen ia man Tuhan asangken man Raja, e maka ipelepasna saja anak si dilaki nggeluh. Janah erkiteken duanana kalak enda erkemalangen man Tuhan ibereken Tuhan kepentaren man bana ras perlindungen. Asum iintrograsi raja, kai alasen bidan enda duana, maka la bunuhna adi si tubuh e dilaki maka alu la mbiar ijababna, maka diberu kalak Heber murah kel akapna mupus maka ope seh pe bidan-bidan e, anakna enggo tubuh. Erkiteken erkemalangen duana bidan e man Tuhan, maka mehuli Dibata man bana, ijujuri Tuhan geluhna maka banci ia membangun rumah tanggana, iberena ia manteki jabuna sekalak-sekalak.

Bahan khotbahta ngerana kerna sekalak diberu kalak Yunani si erkemalangen man Tuhan, e me Lidia. Ia sekalak pengusaha, e me perbinaga uis si meherga, ungu rupana, asalna Tiatira nari. Jelas ia kalak si erkemalangen sabab i sela-sela kesibukenna erusaha tetap isempatkenna guna muji ras ersembah man Tuhan. Ertina, Lidia tek man Dibata kalak Israel tapi lenga bo ia jadi pengikut Yesus Kristus. Tuhan erdahin i bas geluhna si erbahanca lit ketutusen i bas ia guna ndengkehken Kata Dibata si ilumbaken Paulus paksa si e. Sabab banci jadi erkiteken kesibuken sebage pengusaha, ibadah hanya formalitas seh makana masuk kuping kanan keluar kuping kiri. Italangi Tuhan ukurna seh makana tutus kel atena megiken kai si ikataken Paulus (bdk. Lukas 24:45). Kata Dibata si ibegikenna erbuah, si erbahanca ia nggit iperidiken, bahkan ibabaina seisi jabuna pe ikut iperidiken. Ertina, sebage sekalak diberu si erkemalangen man Tuhan, ia banci mempengaruhi seisi jabuna. Keluargana ngidah buah kiniteken Lidia ras hal enda menjadi daya tarik man seisi jabuna guna memberi diri iperidiken. Ketutusenna erkemalangen man Dibata secara vertikal teridah buahnana secara horisontal i ja mehuli ia ras Paulus ras timna, i ja ipindokenna gelah Paulus ras teman-temanna kesilang ku rumahna. Bahkan i bas ay. 40 lit i je tersirat maka kedungenna rumah Lidia ipake jadi ingan pulung seterusna guna bersekutu muji Tuhan.

Aplikasi

Selamat HUT Moria GBKP si pe- 59 tahun -ken. Iarapken maka Moria GBKP sebage ndehara ras nande ingan tinande tuhu-tuhu jadi sekalak diberu si erkemalangen man Tuhan si banci mabai jabuna ras kalak isekelewetna nggeluh erkemalangen man Tuhan. Kalak si erkemalangen man Tuhan berarti megenggeng i bas kiniseran ras la terbawa arus jaman i bas erbage-bage godaan i sekelewetna. Janah rikutken bahanta sekali enda lit piga-piga hal si perlu jadi penekanen kerna uga sekalak si nggeluh erkemalangen man Tuhan :

• La ia mbiar i bas ndalanken kebenaren, sabab mbiaren ia man Tuhan asangken man manusia.
• Membangun karakter si mehuli : inner beauty, sabar, mediate, lembah lembut, la erayo-ayo, rsd. Sabab kinijelen bas nari la pernah luntur imakan waktu. Labo berarti la banci mempercantik diri, si e tetap perlu silakoken, gelah indah ka tatapen mata.
• Tutus ras bertanggung jawab i bas ndahiken dahinna ras i bas kai pe.
• Metemue ras melumbar
• Mengisi geluh pertendinna alu nutus erlajar kerna Kata Dibata ras muji-muji Tuhan. Uga pe sibukna, beluh ia ngaturken waktuna guna banci membangun kerembakenna secara pribadi ras Tuhan bage pe ras teman-temanna sada kiniteken.

Cukup mbue siidah kalak entah pe diberu si kegeluhen kerohanian ras kegeluhen sehari-harina la seimbang. Tutus ku gereja ras aktivis i bas Moria tapi i bas jabu ras masyarakat la terpenalem. Bage pe sebalikna, bisnis entah pe guna erusaha guna kebutuhen hidup sangat sukses tapi erkiteken mbuena kesibukenna, lupa er-Dibata. Sabab pentingen akapna erta doni enda. Diberu si erkemalangen man Tuhan, kegeluhena terpenalem i bas jabu, gereja ras masyarakat.