PJJ GBKP Tgl. 18 - 24 September 2016

PJJ GBKP TGL. 18 - 24 SEPTEMBER 2016

Pdt. Larena br. Sinuhadji (Nd. Rey Tarigan)

Tema : OLA MERANGAP (Lukas 12:13-15)

Penjelasen Bahan Ogen & Renungen

Lit sada ungkapen i bas bahasa Indonesia si ngatakenca, “Kekayaan atau harta dunia bagaikan air laut, semakin banyak orang meminumnya semakin haus dibuatnya”. Ertina, manusia la erpuas-puas nandangi erta kebayakenna.

Janah enda banci siidah arah perikopta, arah perumpamaan kerna kalak bayak si lenge. Perikop enda ibenai sada dialog antara sekalak jelma ras Yesus tupung Yesus sangana ngajar jelma si nterem (bdk. Luk. 12:1-12). Ipindokenna gelah banci Yesus jadi hakim entah pe ngerunggui i bas pembagin harta warisen orang tuana ndube. Situhuna cita-cita entah sura-sura kalak Israel tading ras-ras i bas taneh warisen tanpa ibelahken (ibagi, bdk. Mas. 133:1). Amin bage gia, banci nge senina e mindo kai si jadi baginna (bdk. Luk. 15:12). Janah pembagin enda itentuken rikutken Torat (Ul. 21:15ii, Bil. 27:1-11). Adi kin lit persoalen emaka idarami bantuan sekalak Ahli Torat entah Guru Hukum si berwenang. Tapi pemindona enda itulak Yesus. Situhuna i bas penolaken e, tersirat i ja lit misi si deban si bakal isehken Yesus si banci siidah i bas ayat-ayat seterusna. Janah inti arah perumpaman si ituriken Yesus tertuang i bas ay. 15 ras 21, e me kap ola merangap nandangi kai pe, sebab kegeluhen manusia si tuhu-tuhu, labo erpalasken erta-erta si lit i bas ia, aminna uga gia ia bayakna ras ertanta la banci menjamin kegeluhenna, la banci nelamatken ia. Labo berarti i jenda erta la penting dingen la kita perlu erta. Erta memang penting i bas kegeluhen manusia tapi labo berarti erta e jadi hal si utamana kel si erbahanca kita egois ras merangap.

Erta (ay. 15) rikutken penuturen Lukas banci jadi hal si positif adi la ianggap sebage milikna sendiri (Perb. 4:32; Luk. 8:3). Tapi banci jadi negatif adi hanya guna kepentingen diri sendiri, bahkan enggo iakapna erta banci nelamatken dirina. Ras enda banci siidah arah perbahanen kalak bayak si lenge. Bingung ia sabab la nari siat lumbungna guna nimpan ulih jumana. Sungkunna dirina, “Kuga nge ndia kubahan?” Ibahanna sada perencanan bas ukurna, “Kuruntuhken lumbungku enda, je nari kupajekken si tergalangen; i je me pagi kutamaken ulih ...”, rsd. Lit lebih 10 kali (benaken ay. 17) pengulangen kata “ku” si ncidahken keegoisen, hanya ngukurken dirina sendiri. Pengakapna enggo mbue erta guna ersenang-senang menikmati hidup (tanpa peduli kalak si deban).

Tapi reh nina Tuhan, “O, bodoh! I bas berngi enda kam arus mate; man ise nge kerina erta-erta si enggo ipepulungndu e?” Kalak bodoh bas bahasa Ibrani nuduhken kalak si nggeluh tapi la mperdiateken Dibata (Mas. 14:1). Lupa ia maka geluh i doni enda kentisik ngenca ras sada paksa waktu mulih ku Dibata si enggo nepa kita. Emaka iujungi Yesus perumpaman enda alu kalimat, “Bagenda me jadina nandangi kalak si pepulung kinibayaken man dirina jine, tapi la bayak i bas adep-adepen Dibata.” Ibandingken Yesus bayak i bas pengertin manusia ras bayak i lebe-lebe Dibata. Bayak secara doni, secara manusia mbue ertana tapi man ia ngenca ras jabuna, sedang bayak i lebe-lebe Dibata, kebayaken si enggo ibereken Tuhan bana ibagikenna ka man kalak si deban, secara khusus kalak si musil si perlu man sampaten (bdk. Luk. 12:33).

Lit 3 biak si la mehuli si iangketken Yesus arah ogenta enda ndai e me : 1) Merangap. Biak merangap erbahanca kita menghalalken segala cara guna ndarami erta, termasuk korupsi, menjilat, ngaloken suap, rsd.  Bahkan biak meranggap enda pe erbahanca kita pelit, la nggit berbagi ras kalak si deban. 2) Egois, ngukurken dirina saja. 3) Ula ernalem man erta, tapi ernalemlah man Dibata. Lit kalak ngatakennca, “Adi litlah sen, kai kin la banci iban? Kai pe banci situkur (termasuk jelma?). Enda nuduhkenca, uga belinna kuasa sen, erta, kebayaken ndai. Penungkunenna, payo kin bage? Payo kin adi enggo bayak kai pe banci siban? LANG! Mbue pe depositonta, la jadi jaminen malem nari ateta, la nari kita mbiar entah pe aru ateta. Ula ernalem man ertandu si la tetap, sebab alu sekejap ertanta ndai bene, lesap (itangko, meseng, kena bencana, rsd). Piga-piga contoh banci siidah, ujung kegeluhen kalak si bayak namura : Howard Hopson (presiden perusahaan gas terbesar), menderita sakit ingatan. Charles Schwab (presideb perusahaan baja terbesar) mate i bas keadaan bangkrut ras nggeluh ngasamken sen pinjamen i bas akhir geluhna. M. Nasarudin (mantan bendahara Demokrat) menderita amnesia ras la teneng geluhna, janah gundari i penjara, rsd. Erta labo sibaba mate, bage pe erta labo banci nampati kita pulah i bas kematen nari. Labo kari sungkun Tuhan, asai enggo pepulungndu ertandu? Tapi sungkunNa, kai si enggo ilakoken ras uga enggo kita makeken erta si lit bas kita. E me si perlu sitingkatken nehken kekelengen arah erta si enggo bereken Tuhan banta. Sabab Dibata ulu kerinana termasuk erta si lit bas kita. Sipepulunglah ertanta i surga arah kita jadi saluren pasu-pasu (berkat) man kalak si deban.