PJJ GBKP Tgl. 11 - 17 Agustus 2016

PJJ GBKP TGL. 11 - 17 SEPTEMBER 2016

Nrs. Pdt. Larena br. Sinuhadji (Bp. Rey Tarigan)

Tema : RADIKALISME (Perb. Rasul 8:1-3)

Penjelasen Bahan Ogen & Perenungen

Perbahanen Rasul e me kitab si nuriken sejarah pajekna perpulungen kalak Kristen entah pe Gereja. Adi sioge benaken bindu 1 nari, kenca Yesus Kristus iangkat ku Surga, Kesah si Badia nusur ras ndemi kalak si tek sue ras si enggo ipadanken Dibata. Kenca peristiwa pentakosta, Petrus ngerana man kalak si nterem janah lit kira-kira 3 ribu kalak ertobat ras iperidiken. Melala tanda-tanda sengget si ibahan ajar-ajar Yesus raduken ras ipembarkenna Berita si Meriah sue ras si enggo iamanatken Yesus Kristus man ajar-ajarNa (Perb. Rasul 1:8). I bas sada sisi memang perpulungen kalak Kristen reh teremna (bdk. Perb. Rasul 4:4), tapi i bas sisi si deban melala kiniseran si nialami perpulungen kalak si tek paksa si e. Piga-piga contoh kiniseran e banci inen i bas Perb. Rasul 4:1-4 (Petrus & Johanes ipenjaraken); 5:17-42 (Rasul-rasul ngenanami kiniseran); 6:8-15 & 7:54-60 (Istepanus itangkap ras ibentari alu batu seh mate). Kenca kematen Istepanus, penganiayan man kalak si tek reh belinna. I bas ogenta sendah Saul, si paksa si e lenga itandaina Yesus Kristus, ersura-sura engkernepken perpulungen kalak si tek (ay. 3, bdk. ps. 9:1-2). Si jadi penungkunen, kai penyebab si mpeturah ancamen, kekerasen ras penganiayan man kalak Kristen paksa si e?

Penyebabna, si pemena lebe erkiteken litna perbedan kiniteken. Lit dua kelompok si berbeda paksa si e, e me kelompok kalak Yahudi si ijemakna denga alu paguh Hukum Musa ras kitab Nabi-nabi (e me agama Yahudi) ras kalak Yahudi si enggo iikutkenna pengajaren-pengajaren Yesus Kristus. Awalna memang lenga terbedaken antara kalak Yahudi si eragama Yahudi ras kalak Yahudi si iikutkenna ajaren-ajaren Yesus Kristus. Mulai terbedakan benaken Perb. Rasul 11:26, sebab i je kelompok pengikut Kristus igelari kalak Kristen. Perbedan antara dua kelompok enda reh meruncingna erkiteken reh teremna kalak Yahudi si eragama Yahudi beralih keyakinen jadi kalak Kristen, i bas Perb. Rasul 4:4 jumlah kalak Kristen reh tambahna jadi 5 ribu kalak. Daya tarik kelompok Kristen seh belinna bekas pendahin Kesah si Badia si mpeturah cara nggeluh si berbeda e me : sikeleng-kelengen sada ras si debanna, ersada ukurna, la lit perbedan antara budak ras kalak bebas, la lit si kekurangen i bas kelompok kalak Kristen, rsd.-na (bdk. Perb. Rasul 2:43-47; 4:32-35). Situasi si bagenda mengusik peminpin-peminpin agama Yahudi erkiteken reh urakna perpulungenna. Kedungenna turah nembeh ras cian ate man kelompok Kristen (bdk. Perb. Rasul 4:1-2; 5:17). Seh i jenda situhuna dalan kekerasen i bas dungi persoalen banci denga iredam adi peminpin-peminpin agama Yahudi nggit mengevaluasi dirina ras erbahan perbaiken-perbaiken i bas agamana.

Tapi erkiteken la ngasup menahan nembeh ras cian ate ndai maka ipakena dalan kekerasen. Enda merupaken penyebab si peduaken, la ngasup kalak si eragama Yahudi, khususna para peminpinna, bersikap secara positif i bas litna kiniteken si berbeda. Cian ras nembeh ate mpeturah kekerasen. Sebalikna, kelompok Kristen amin pe mbue secara jumlah, la ipakena cara-cara kekerasen erkiteken pengajaren-pengajaren Yesus bage pe rasul-rasul si mengutamaken kekelengen, la membalas kejahaten alu kejahaten, rsd. Saul i bas konteks ogenta sendah mewakili paham radikalisme si lit i bas peminpin-peminpin agama Yahudi. Paham radikalme enda labo saja erkiteken reh urakna perpulungen agama Yahudi, tapi erkiteken la iangkaina alu payo kinitekenna sendiri. Pengangkan si la payo nandangi kinitekenna sendiri banci siidah umpamana salah sadana i bas Perb. Rasul 7:1-53 i bas khotbah Istepanus i lebe-lebe Pengadilen Agama, ras si debanna khususna pengajaren-pengajaren Yesus Kristus kerna si e (bdk. Mat. 23 ras paralelna i bas Injil si deban). Enda merupaken penyebab si peteluken, pengangkan si la payo nandangi kiniteken sesekalak banci mabai ku cara-cara kekerasen.

Tema i bas PJJ-nta sendah e me “Radikalisme”. Akap kami definisi i bas Wikipedia nari banci nambahi pengangkanta kerna radikalisme si lit i bas buku PJJ-nta, nina : “radikalisme bila dilihat dari sudut pandang keagamaan dapat diartikan sebagai paham keagamaan yang mengacu pada fondasi agama yang sangat mendasar dengan fanatisme keagamaan yang sangat tinggi, sehingga tidak jarang penganut dari paham (aliran) tersebut menggunakan kekerasan kepada orang yang berbeda paham (aliran) untuk mengaktualisasikan paham keagamaan yang dianut dan dipercayainya untuk diterima secara paksa”. I bas definisi enda maka kerina agama ras penganut-penganutna berpotensi ikenai radikalisme. Kelompok Kristen amin pe tercatat i bas sejarah sebage kelompok si rusur datken perlakuan kekerasen pe tercatat ka i bas sejarah sebage kelompok si usur ipakena cara-cara kekerasen man kelompok-kelompok keyakinen si deban. Perlu i jenda ibedaken kerna istilah “radikalisme” enda, sebab kata “radikal” labo berarti negatif. Radikal akar katana “radic”, ertina mengakar. Perobahen si mehuli si niperluken salah sadana e me radikal, ertina perobahen seh ku akar-akarna. Yesus Kristus erbahan geraken si radikal i tengah-tengah masyarakat Yahudi, umpamana. Jadi radikalisme i jenda maksudna pemaksaan kehendak alu cara-cara kekerasan erpalasken keyakinen tertentu. E me radikalisme aktif. Lit ka radikalisme pasif, e me karakterisitik eksklusif, la nggit ergaul ras kalak si deban erkiteken la sada pemahamen, entah pe menganggap diri paling benar, mekeng (keras kepala), tetap berkeras dengan pendapatnya sendiri, la nggit ngaloken pendapat kalak, rsd.

Si jadi perenungenta, kai si banci ilakoken kita guna membendung radikalisme enda? Si pemena lebe arus lit pemahamen entah pe sikap si positif nandangi perbedan kiniteken si lit, alu cara menanamkan sedini mungkin sikap saling menghormati antar umat beragama. Alu bage banci mpeturah penghargaan nandangi teman-temanta si la sada kiniteken ras kita. Karakteristik eksklusif perlu sikikis alu kepedulianta nandangi masyarakat sekelewetta. Si peduaken, tuhu-tuhu nggit kita erlajar alu mbages kerna kinitekenta. Adi sinen kinierbagen si lit i bas kiniteken Kristen tentuna melala si arus sipelajari alu mbages gelah idatken kita pemahamen kerna kiniteken Kristen si menyeluruh, komprehensif, entah pe lengkap, labo setengah-setengah. I bas si e tentuna mindo kita man Dibata gelah ipengasupNa kita erlajar alu tutus kerna kinitekenta. Si peteluken ula nggit kita terpancing i bas isu-isu si ikembangken pihak-pihak tertentu guna menebar kebencian man si berbeda suku, agama, ras, dan antar golongan (SARA). Si peempatken, siusihlah Yesus Kristus ras ajar-ajarNa si meritaken Berita si Meriah alu cara-cara si dem kekelengen labo alu cara-cara paksaan apai ka alu cara-cara kekerasen, sebab Kesah si Badia nge si mpeturah kiniteken sesekalak, tugasta e me meritaken Berita si Meriah i bas kerina pengkebet geluhta si ncidahken keleng ate Kristus.

Cataten : Bujur ikataken kami man Pt. Bp. Iben Ginting, Pt. Em. Bp. Jop Peranginangin, Pt. Bp. Juharta Surbakti, ras Pt. Bp. Ema Tarigan. Masuken-masukenndu i bas Sermon Tgl. 7/9/2016 enggo masuk i bas revisi bahan PJJ-nta enda. Dibata si masu-masu pelayanenta.