PJJ GBKP Tgl. 25 Sept. - 1 Okt. 2016

PJJ GBKP TGL. 25 SEPT. - 1 OKT. 2016

Pdt. Larena br. Sinuhadji (Nd. Rey Tarigan)

Tema : KUTATANG-TATANG KAM SEH METUA (Jesaya 46:3-4)

Penjelasen Bahan Ogen & Renungen

Bahan ogenta sendah lit i bas konteks i ja bangsa Israel lit i bas proses mulih i bas negeri Babil nari ku taneh Israel. Bangsa Israel lit i bas pemulihen i bas kekoten erkiteken kiniseran i bas pembuangen nari ku keadaan pembaharuan, e me Israel si mbaru. I bas keadaan si kote ras nandangi bene pengarapen enda, Tuhan Dibata arah nabi Jesaya nehken pergegeh. Ay. 3 Dibata ngerana man bangsa Israel “si tading denga i bas bangsaKu”. I bas Alkitab TB-LAI nina, “semua orang yang masih tinggal dari keturunan Israel” (Alkitab BIS, “kamu semua yang tersisa dari umat-Ku”). “Si tading denga i bas bangsaKu” enda e me kalak Israel si geluh denga i bas proses kemulihen paksa si e, khususna kalak Israel si tetap setia man Dibata ras ipilih Dibata guna ikut muat bagin i bas pembaharuan Israel si paksa si e enggo hancur. Pembaharuan i jenda labo saja secara fisik, tapi pe pembaharuan erkiniteken. Ay. 4 merupaken penegasen maka Dibata si isembah kalak Israel si setia ndai tetap seri kuasaNa nai-nai nari, gundari, seh rasa lalap. E maka, i bas situasi ras kondisi si kuga pe, Dibata tetap si ngembah, natang-natang, ngangkip, ras ngkelini bangsaNa seh ndigan pe. I bas Alkitab TB-LAI nina, “Sampai masa tuamu Aku tetap Dia dan sampai masa putih rambutmu Aku menggendong kamu. Aku telah melakukannya dan mau menanggung kamu terus; Aku mau memikul kamu dan menyelamatkan kamu” (Alkitab BIS, “Aku tetap Allahmu sampai kamu tua; dan tetap menjaga kamu sampai kamu beruban. Aku menjadikan kamu dan tetap memelihara kamu, Aku akan menolong dan menyelamatkan kamu”). Enda merupaken janji Dibata si enggo terbukti i bas sejarah kegeluhen bangsa Israel si mpegegehi kalak Israel si tetap setia man Dibata. Lit hubungen antara kesetian kalak Israel man Dibata ras janji Dibata man kalak Israel si tetap setia man Dibata. Ertina, janji Dibata ndai isehkenNa man kalak Israel si tetap setia. Labo terjeng je saja, kalak Israel si tetap setia ndai ijadiken Dibata sebage alatNa guna erbahan pembaharuan i tengah-tengah bangsaNa.

Tema si seh man banta e me, “Kutatang-tatang kam seh metua” i bas rangka menyambut Hari Lansia Internasional i bas tep-tep Tgl. 1 Oktober. PJJ sekali enda merupaken pergegeh man Lansia GBKP si secara kategorial merupaken bagin pelayanen i bas GBKP. Lit kutipen si ngatakenca, “Menjadi tua itu pasti, tetapi menjadi dewasa itu pilihan”. Pengarapenta tentuna, reh metuana kita, reh dewasana kita i bas erkiniteken man Dibata. Labo terjeng je saja, tapi Lansia GBKP tuhu-tuhu jadi usihen i bas erkiniteken man Dibata. E me warisen si mehergana kel man kategorial si deban si lit i bas GBKP. Dewasa i bas erkiniteken i jenda tentuna berhubungen ras kesetianta man Dibata. Lansia si tetap setia e me si ngaloken janji Dibata bagi janji Dibata man kalak Israel si tetap setia. Janji Dibata enda pe seh man banta kerina si tetap setia. Mari radu ras sidukung pelayanen man Lansia i bas GBKP gelah i bas sada sisi semakin mpegegehi Lansia, i bas sisi si deban pe tetap lit wadah Lansia guna berinteraksi ras produktif berkarya guna kemulian Dibata. Mari radu ras kita ertoto gelah pelayanen man Lansia reh meningkatna secara kualitas ras kuantitas, bage pe Lansia GBKP tuhu-tuhu banci jadi usihen i japa pe ringan i bas kondisi si kugana pe.