Khotbah GBKP Minggu Tgl. 2 Oktober 2016

KHOTBAH GBKP MINGGU TGL. 2 OKTOBER 2016

Nrs. Pdt. Larena br. Sinuhadji (Bp. Rey Tarigan)

Minggu Budaya

Invocatio : “Ercakap-cakaplah kam sapih-sapih kam alu make masmur, ende-enden pujin dingen ende-enden pertendin. Endekenlah ende-enden ras masmur man Tuhan alu ukur dem ngataken bujur” (Epesus 5:19)

Ogen : 2 Samuel 6:1-5 (Tunggal)

Khotbah : Masmur 149:1-9 (Antiponal)

Tema : LANDEK DINGEN RENDE DEM PENGATAKEN BUJUR

Penjelasen Bahan Pustaka Si Badia

Bahan khotbahta ibere judul “Ende-enden pujin”, i bas Alkitab TB-LAI ibere judul “Nyanyian kemenangan  bagi orang Israel”, e me ende-enden si iendeken i bas kebaktin pengataken bujur bangsa Israel man Dibata. Syair i bas Mas. 149 enda e me pengajuk man bangsa Israel gelah ermeriah ukur, landek ras rende muji Tuhan alu ende-enden si mbaru. “Ende-enden si mbaru” i bas ay. 1, ertina e me kegeluhen ras semangat si mbaru si enggo ibereken Dibata man bangsaNa erkiteken : 1) Dibata e me Raja si erkuasa si enggo nepa bangsaNa (ay. 2); 2) Dibata enggo menang naluken kerina musuh-musuhNa (ay. 4-5); 3) Dibata e me Dibata si adil si majekken kebenaren i tengah-tengah doni enda (ay. 6-9). Si menarik i bas Mas. 149 enda lit i bas ay. 1, i bas kalimat “pujilah IA i tengah-tengah perpulungen bangsaNa si tutus, ras ay. 4, i bas kalimat “ipehagaNa kalak si meteruk alu mereken kemenangen”. Ertina puji-pujin man Dibata enda arus ipenangkih alu ketutusen ras kiniteruken ukur i adep-adepen Dibata, janah i bas kinata kegeluhen bangsa Israel pe, ketutusen ras kiniteruken ukur enda arus sicidahken.

Ogenta nuriken kerna Daud si paksa si e enggo jadi raja gantiken Saul, lawes ku Baala i Juda guna maba Peti Perpadanen ku Jerusalem. I bas ay. 5 ikataken, “Daud ras kerina bangsa Israel rende dingen landek-landek asa gegehna muji TUHAN, iikuti sora kulcapi, murdap, gendang, genta ras calacayak”. I bas Alkitab Bahasa Indonesia Sehari-hari (BIS) nina, “Daud dan seluruh bangsa Israel berjalan di depan Peti itu sambil menari-nari sekuat tenaga dan bernyanyi-nyanyi untuk menghormati TUHAN”. Peti Perpadanen e me lambang kerehen Tuhan i tengah-tengah bangsa Israel. Daud ras kerina bangsa Israel nehken kehamaten man Dibata alu landek ras mpenangkih puji-pujin man Dibata asa gegehna (dengan sekuat tenaga).

Invocationta e me sada bagin i bas pedah-pedah rasul Paulus si isehken man perpulungen i Epesus. I bas Alkitab TB-LAI ay. 19 enda merupaken sambungen i bas ay. 18 nari, nina, “Dan janganlah kamu mabuk oleh anggur, karena anggur menimbulkan hawa nafsu, tetapi hendaklah kamu penuh dengan Roh, dan berkata-katalah seorang kepada yang lain dalam mazmur, kidung puji-pujian dan nyanyian rohani. Bernyanyi dan bersoraklah bagi Tuhan dengan segenap hati”. Ertina, lit hubungen antara Kesah Dibata ras kai si irananken. Adi kalak si mabuk biasana pengerananna labo mehuli ras banci ncedai hubungen ras sapih-sapihna. Tapi adi kalak si dem alu Kesah Dibata enggo pasti pengerananna e me puji-pujin man Dibata si dem alu pengataken bujur ras banci mabai kemalemen ate i bas hubungenna ras sapih-sapihna.

Aplikasi

Kalak Kristen e me kalak si dem alu ende-enden pujin man Dibata. Nen saja i bas kerina perjumpan-perjumpan kalak Kristen, i bas suasana erceda ate seh ku suasana meriah ukur, kerinana dem alu ende-enden pujin man Dibata. Ertina i bas tradisi (budaya) kalak Kristen enggo semal mpenangkih ende-enden pujin man Dibata, tapi labo saja erkiteken enggo semal, enggo tradisi si ipesusur turun-temurun, tapi intina erkiteken rende muji Tuhan e salah sada perentah Dibata si arus ilakoken kalak si tek, janah Dibata si isembah kita e me Dibata si memang layak ipujiken erkiteken perbahanen-perbahanenNa si mbelin i bas kegeluhenta.

I bas bahan khotbahta ende-enden pujin si ipenangkih kita man Dibata e pe mplimbarui ras mpegegehi kita i bas kita ndalani kegeluhenta. Erkiteken ende-enden pujin si iendeken kita ngingetken kita kerna Dibata si ngkelengi kita, Dibata si erkuasa i bas kegeluhenta, Dibata si menang naluken kerina perbeben geluhta; rsd. I bas bahan ogenta, raja Daud nehken kehamaten man Dibata alu landek ras rende muji Tuhan asa gegehna. Ertina ende-enden pujin si ipenangkih kita arus iendeken alu tuhu-tuhu (serius) ihayati, labo hanya sekedarna saja gelah teridah rende, erkiteken e me kehamaten si isehken kita man Dibata. I bas invocationta, ende-enden pujin man Dibata e arus teridah nyata i bas kegeluhenta si tep-tep wari sebage tanda pengataken bujurta man Dibata si banci mabai kemalemen ate man dirinta bage pe man sapih-sapihta.