PA Kategorial GBKP Tgl. 25 Sept. - 1 Okt. 2016

PA MAMRE GBKP TGL. 25 SEPT. - 1 OKT. 2016

Nrs. Pdt. Larena br. Sinuhadji (Bp. Rey Tarigan)

Ogen : Ester 1:22; 1 Petrus 3:7

Tema : PERBULANGEN SELAKU PENGULU JABU

Tujun : Mamre Ngasup :

1) Nuriken antusen perbulangen kap pengulu jabu

2) Nuriken tanggung jabab Mamre selaku pengulu jabu

Metode : Sharing pengalamen (tep-tep Mamre nuriken seh i ja enggo encidahken biakna selaku pengulu i tengah jabu)

Penjelasen Bahan Ogen

Lit dua bahan ogenta sendah, si pemena e me aturen si ibahan Ahasweros raja Persia erkiteken kerembahenna e me ratu Wasti la ia nggit ngikutken perentah Ahasweros si atena ncidahken (“icidah-cidahken raja atena” : memamerkan) kinijilen kemberahenna man kerina pegawaina ras temuena i bas sada pesta. Erkiteken si e isetujui raja sada aturen si niusulken Memukan sekalak pembesar bangsa Persia ras Medi, e me, “maka perbulangen nge pengulu i bas jabuna, janah kata perbulangen arus ibegiken”. I bas Alkitab TB-LAI nina, “Setiap laki-laki harus menjadi kepala dalam rumah tangganya dan berbicara menurut bahasa bangsanya”. I bas Alkitab BIS nina, “supaya di dalam setiap rumah tangga, suamilah yang harus menjadi kepala, dan yang patut mengambil segala keputusan”. La ituriken i jenda kai alasenna makana la iikutken ratu Wasti perentah raja. Tapi i bas budaya patriakal bage pe i bas sistem monarki, aturen-aturen si idalanken secara sepihak i bas dominasi patriakal (kaum dilaki) enggo semal ilakoken paksa si e.

Ogen si peduaken e me pedah-pedah rasul Petrus nandangi ndehara ras perbulangen. I bas ay. 1-2 nina, “kam o ndehara, patuhlah man perbulangenndu, gelah adi perbulangen la tek nandangi Kata Dibata, banci ia tek erkiteken lagu langkahndu aminna gia la kam ngerana sengkebabah pe, sabab idahna maka mehuli dingen mehamat lagu langkahndu”. Patuh i jenda i bas konteks gelah banci mabai perbulangen si la tek nandangi Kata Dibata banci ia tek. Labo terjeng je saja, i bas ay. 7 nina, “bage pe kam o perbulangen, nggeluhlah kam alu dem pengertin nandangi ndeharandu ... Mehamatlah kam man bana, sabab ia pe radu ras kam, ngaloken kiniulin kegeluhen si ibereken Dibata. Bagendalah perbahanenndu gelah ula lit si ngolangi pertotondu ku Tuhan”. Kepatuhen ndehara arus idalanken raduken ras pengertin ras kehamaten i bas perbulangen nari, sebab ndehara pe ngaloken kiniulin kegeluhen si seri ras perbulangen. Pengertin ras kehamaten si ilakoken perbulangen nandangi ndeharana erkawiten ras pasu-pasu i bas Dibata nari. Adi la lit pengertin ras kehamaten maka e me si ngolangi pertoton ku Tuhan.

Aplikasi

Lit perbedan antara ogen si pemena ras si peduaken. I bas ogen pemena, ncidah-cidahken kejilen (pamer) ndehara i lebe-lebe kalak si deban merupaken hal si semal. Sedangken i bas ogen si peduaken, kejilen i bas pusuh ndehara nari nge si lebih penting, sebab e me si mehergana kel i lebe-lebe Dibata (ay. 4). Ogen si pemena ncidahkenca maka bangsa si deban si la itandaina Dibata lit aturen i bas ia gelah ndehara patuh nandangi perbulangenna, sebab perbulangen e pengulu i bas jabuna, tapi lit i je bagi pemaksaan kehendak secara sepihak i bas perbulangen nari. Ogen si peduaken ncidahkenca maka bangsa si enggo itandaina Dibata i bas Yesus Kristus pe lit aturen gelah ndehara patuh nandangi perbulangenna, tapi lit i je prinsip keseimbangan. Lit kepatuhen i bas ndehara nari, lit ka si arus ilakoken perbulangen, e me ngehamati ras dem alu pengertin nandangi ndeharana. Perbulangen ras ndehara seri i lebe-lebe Dibata, radu ngaloken kiniulin kegeluhen i bas Dibata nari. Adi enggo lit prinsip keseimbangan i bas relasi antara perbulangen ras ndehara maka la lit kai pe si ngolangi pertoton ku Tuhan, i bas kalima si deban pasu-pasu i bas Dibata nari maler ku tengah-tengah jabuna.

Tema si seh man banta i bas kesempaten enda e me “Perbulangen Selaku Pengulu Jabu”, alu tujun gelah Mamre ngasupn uriken antusen perbulangen kap pengulu jabu ras nuriken tanggung jabab Mamre selaku pengulu jabu. Pengulu jabu si uga? Pengulu jabu si nimaksud i jenda tentuna pengulu jabu si  ipakena prinsip keseimbangan i bas relasi antara perbulangen ras ndehara i lebe-lebe Dibata bagi ogen si peduaken. Adi situntut ndeharanta patuh man banta tapi la lit pengertin ras kehamaten i bas kita nari e maka si terjadi e me kinilapatuhen, baik secara terang-terangan bage pe secara tersembunyi. Tersembunyi i jenda maksudna i lebe-lebenta bagi si patuh tapi arah pudinta numpahi kita, e me si ngolangi pertotonta ku Tuhan. Memang labo sada jaminen adi enggo kita mehamat ras dem alu pengertin enggo pasti ndeharanta patuh nandangi kita perbulangenna. Erkiteken labo hal si murah guna nerapken prinsip keseimbangan enda i tengah-tengah jabunta. E maka babalah i bas pertotonta kegeluhen jabunta sekalak-sekalak, gelah Dibata si nampati kita mpeturah kebiaren man Dibata janah mpeturah sikap saling pengertin, saling ngehamati antara perbulangen ras ndehara.