Khotbah GBKP Minggu Tgl. 25 September 2016

KHOTBAH GBKP MINGGU TGL. 25 SEPTEMBER 2016

Pdt. Larena br. Sinuhadji (Nd. Rey Tarigan)

Minggu Notoken Serayan Tuhan II

Invocatio : “O temanku si kukelengi, ertoto aku gelah kai si mehuli jadilah man bandu, janah mejuah-juahlah bagi kueteh maka kegeluhen pertendinndu pe mehuli” (3 Johanes 1:2)

Ogen : Heber 13:16-21 (Antiponal)

Khotbah : Roma 15:30-33 (Tunggal)

Tema : TUMPAK-TUMPAK PERBERITA SI MERIAH

Penjelasen Bahan Pustaka Si Badia

I bas bahan khotbahta rasul Paulus nuriken kerna sura-surana reh ndahi perpulungen i Roma, tapi lalap lit abatna erkiteken padatna jadwal pendahin rasul Paulus guna meritakan Berita si Meriah ku ingan-ingan si deban. Sope rencana ndahi perpulungen i Roma e ilaksanakenna, berkat ate Paulus ku Jerusalem guna naruhken penampat arah perpulungen i Makedoni ras Akaya nari man perpulungen si musil si lit i Jerusalem. Si menarik i bas bahan khotbahta sendah, mindo rasul Paulus man perpulungen i Roma gelah ertoto man Dibata guna dirina. Ay. 30 i bas Alkitab TB-LAI nina, “aku menasihatkan kamu, saudara-saudara, untuk bergumul bersama-sama dengan aku dalam doa kepada Allah untuk aku”, i bas Alkitab BIS nina, “saya minta dengan sangat kepadamu, semoga kalian turut berdoa sungguh-sungguh bersama-sama saya kepada Allah untuk saya”, gelah rasul Paulus terkelin i bas bahaya si rehna i bas kalak Judea si la tek man Yesus Kristus, janah anak-anak Dibata si Jerusalem ermeriah ukur ngaloken pendahin rasul Paulus man bana. I bas Perb. Rasul 21-28 iteh kita maka i Jerusalem tuhu-tuhu rasul Paulus ndatken kiniseran erkiteken kalak Judea si la tek man Yesus Kristus. Tapi erkiteken pertoton kerina perpulungen si mendukung rasul Paulus, ipengasup Dibata ia ngalaken kerina kiniseran e seh ia banci ndahi perpulungen i Roma.

Bahan ogenta merupaken bagin i bas kata pendungi surat Heber, isina e me pedah-pedah etis praktis si salah sadana e me pengajuk man perpulungen kalak si tek gelah ertoto guna kerina peminpin perpulungen gelah la erlatih-latih ikepkepna pertendin perpulungen (ay. 17), bersih pusuh peratenna (ay. 18), janah ipegegehi Tuhan i bas erbage-bage perbeben si nialamina (ay. 19, kemungkinen penulis surat Heber enda lit i bas penjara erkiteken Berita si Meriah). Invocationta surat rasul Johanes man Gayus (sekalak peminpin perpulungen paksa si e) si ncidahkenca maka rasul-rasul pe ertoto guna kiniulin peminpin-peminpin perpulungen bage pe perpulungen.

Aplikasi

Enggo dua minggu berturut-turut bengket kita ku bas Minggu Notoken Serayan Tuhan, janah tema i bas wari Minggu sendah e me “Tumpak-tumpak perberita si meriah”. Ertina dukungen man Serayan Tuhan e seh kel pentingna, sebab tugas tanggung jawab Serayan Tuhan enda cukup mbelin. Bagi bahan ogenta sendah umpamana, salah sada tanggung jawab Serayan Tuhan e me ngepkep pertendin perpulungen sebab Serayan Tuhan ertanggung jawab man Dibata. Janah kerina bahan Pustaka si Badia i bas wari Minggu sendah mereken penekanen kerna pentingna ertoto man Dibata guna peminpin-peminpin perpulungen termasuk i je perberita si meriah, bage pe perpulungen. Mungkin enggo rusur ibegi kita istilah-istilah, “ditopang oleh doa” entah pe “tiang doa”, payo kel istilah-istilah e erkiteken pertotonta man Dibata merupaken tumpak-tumpak (bhs. Ind., ertina “tiang penyangga”) kinitekenta man Dibata. Secara khusus i bas tema wari Minggu sendah, maka pertotonta man Dibata guna Serayan Tuhan e me pergegeh si mbelina kel, sumber energi si mbelin, tiang penyangga si nteguh man kerina Serayan Tuhan guna ndahiken dahin-dahin pelayanen. Sekalak jelma sekelas rasul Paulus pe membutuhken dukungen doa i bas perpulungen nari, ertina rasul Paulus tuhu-tuhu nggejapken uga belinna kuasa doa i bas pelayanenna bage pe i bas kegeluhenna. E maka totokenlah Serayan-serayan Tuhan.

I bas kita meritaken berita si meriah pe, pertotonta man Dibata tuhu-tuhu mereken pergegeh man banta erkiteken ipengasup Dibata kita ncidahken keleng ate Dibata ku sekelewetta si lenga itandaina Yesus Kristus. E maka mari radu ras secara kontinyu kita saling notoken sada ras si debanna gelah gegeh si rehna i bas Dibata nari mpengasup kita ndalanken kerina si ngena ate Dibata i bas pelayanenta bage pe i bas kegeluhenta si tep-tep wari.