Khotbah GBKP Minggu Tgl. 4 September 2016

KHOTBAH GBKP MINGGU TGL. 4 SEPTEMBER 2016

Pdt. Larena br. Sinuhadji (Nd. Rey Tarigan)

Minggu PERMATA GBKP

Invocatio : “Dage o anakKu, arus maka iusihndu perbahanen kalak si mehuli dingen nggeluhlah i bas kegeluhen si benar” (Kuankuanen 2:20)

Ogen : Kejadin 39:1-6 (Tunggal)

Khotbah : Keluaren 17:8-16 (Tunggal)

Tema : PERMATA GBKP TERTEKI

Penjelasen Bahan Pustaka Si Badia

Bahan khotbahta nuriken kerna Josua si isuruh Musa minpin piga-piga kalak dilaki guna erperang ngelawan bangsa Amalek. Ilakoken Josua bagi si iperentahken Musa man bana, janah Josua berhasil naluken bangsa Amalek. I bas kitab Keluaren bindu 17 enda si pemenana gelar Josua isebutken. Janah i bas ay. 14 enda si pemenana Dibata ngerana man Josua erkelangken Musa. E me tanda-tandana makana Josua enda me jadi gancih Musa minpin kalak Israel bengket ku taneh Kanaan. Ise Josua enda? Josua e me anak Nun kempu Elisama peminpin suku Epraim (bdk. 1 Kron. 7:27; Bil. 1:10). Gelar aslina e me Hosea, igantiken Musa jadi Josua (bdk. Bil. 13:16. Hosea ertina “keselamaten”, Josua ertina “Dibata keselamaten” entah pe “Dibata si nelamatken”). Enggo jadi pembantu Musa mulai anak peranana nari (“masih muda”, bdk. Kel. 24:13; 33:11; Bil. 11:28). Josua e me sekalak si megegeh (bdk. Bil. 27:18, bhs. Ind. nina, “seorang yang penuh roh”). Ngikutken TUHAN alu bulat ukur (bdk. Bil. 32:12). Dem alu kepentaren (i bas bhs. Ind. nina “roh kebijaksanaan”) sanga ia gancihken Musa (bdk. Ul. 34:9). Janah i bas kitab Josua, radu ras siteh uga Josua berhasil minpin kalak Israel bengket ku taneh Kanaan seh ibagi-bagikenna taneh man 12 suku Israel. Seh kematenna pe Josua ras isi jabuna tetap isembahna Tuhan alu tutus (bdk. Jos. 24:15).

Bahan ogenta nuriken kerna Jusup anak Jakup si idayaken senina-seninana man bangsa Ismael, seh i Mesir idayaken ka ku Potipar sekalak pegawai raja (Jusup ertina “menghapus” ras “menambah”, Kej. 30:23-24 i bas bhs. Indonesia nari). Si menarik i bas turi-turin enda : 1) Jusup si nguda denga paksa si e (iperkiraken usiana 17 tahun denga) sekalak perlajang i Mesir iarak-arak Dibata seh maka sangap ia i bas kerina pendahinna (ay. 2, Alkitab TB-LAI, “selalu berhasil dalam pekerjaannya”). Ertina, amin pe nguda denga Jusup i bas status budak i Mesir, tapi rembak ia ras Dibata. 2) Pengarak-ngarak Dibata man Jusup kepeken inanami tuanna Potipar. Kenca enggo ijadikenna Jusup sebage pelayan pribadina si ertanggung jawab ngelola kerina si lit i bas rumah bage pe usaha Potipar, pasu-pasu Tuhan simpar man keluarga Potipar. Ertina, i bas ay. 3-6, teridah pasu-pasu Dibata labo hanya ngadi man pribadi Jusup, tapi kegeluhen Jusup tuhu-tuhu jadi pasu-pasu man kalak si deban, khususna man keluarga Potipar. 3) Jusup igambarken sebage sekalak anak perana si paguh dagingna dingen rupana pe mejile. Ay. 5 i bas Alkitab TB-LAI nina, “manis sikapnya dan elok parasnya”. Ertina labo hanya teridah mejile arah darat nari tapi pe kepribadianna (karakterna) mejile.

Invocationta e me pedah-pedah man kalak si nguda denga, i bas Alkitab TB-LAI nina, “Sebab itu tempuhlah jalan orang baik, dan peliharalah jalan-jalan orang benar”. I bas Alkitab Bahasa Indonesia Sehari-hari (BIS) nina, “Karena itu, anakku, ikutilah teladan orang baik, dan hiduplah menurut kemauan Allah”. Ertina kalak si nguda denga iajuk gelah ngusih perbahanen ras kegeluhen kalak si benar (kalak si mehuli) sue ras sura-sura Dibata.

Aplikasi

Bahan khotbah, ogen, bage pe invocationta i bas kesempaten enda radu ras sirenungken i bas rangka Minggu PERMATA GBKP, e maka tema-nta sendah pe “PERMATA GBKP Terteki”. Tema-nta sendah banci inen i bas piga-piga pengertin. Si pemena, banci iertiken PERMATA GBKP enggo terteki i bas kai-kai pe. Si peduaken, PERMATA GBKP lenga terteki i bas kai-kai pe. Si peteluken, enggo terteki i bas hal-hal tertentu tapi perlu denga sitingkatken kualitas ras kuantitasna, i bas kata si deban, tema-nta sendah merupaken idealisme si perlu denga jadi perayaken PERMATA GBKP. Akap kami ratana kita pasti milih pilihen si peteluken. E maka evaluasi diri, otokritik, man banta khususna PERMATA GBKP arus terus-menerus idalanken gelah reh dewasana PERAMATA GBKP i bas Kristus.

I bas kesempaten enda, lit piga-piga point si banci jadi usihenta, khususna PERMATA, i bas rangka erproses jadi PERMATA si terteki i bas kai-kai pe.

Si pemena, arah bahan khotbahta, erlajar kita i bas sekalak tokoh Pustaka si Badia nari e me Josua. Karirna sebage sekalak peminpin Israel banci ikataken tanpa cacat-cela adi sibandingken ras peminpin-peminpin si deban i tengah-tengah bangsa Israel. Keberhasilen Josua labo idatkenna secara instan, tapi lit proses si idalanina : 1) Rembak ia ras Dibata. Kerembakenna ras Dibata teridah arah ngikutken Tuhan alu bulat ukur, dem ia alu kepentaren Dibata (Kesah Dibata lit bas ia), ras banci ia mabai keluargana bage pe bangsana ersembah man Dibata seh ku kematenna. Kerembakenna ras Dibata mabai Josua erkarakter meteruk ukur i adep-adepen Dibata, tutus ersembah man Dibata, janah konsisten ndalankenca seh ku kematenna. 2) Nggit ia erlajar arah Musa nari. Karir kepemimpinen Josua ibenaken i bas statusna sebage pembantu Musa sanga ia anak perana denga. Arah kininggitenna erlajar arah Musa nari mabai Josua erkarakter mehamat man kalak si enggo erpengalamen, saber, tekun, patuh ras setia.

Si peduaken, erlajar kita arah Jusup. Kerembakenna ras Dibata mabai ia jadi sekalak si ipasu-pasu Dibata amin pe nguda denga usiana, ibahan Tuhan berhasil ia i bas kai pe si idahikenna. Janah ipengasup Dibata ia jadi pasu-pasu man kalak si deban.

Si peteluken, arah invocationta, iajuk kita, khsususna PERAMTA, gelah ngusih perbahanen ras kegeluhen kalak si benar (kalak si mehuli) sue ras sura-sura Dibata.

Tentuna i bas ngusih Josua bage pe Jusup butuh perjuangan si labo murah man PERMATA GBKP, apaika i bas situasi jaman si gundari enda, i ja melala anak muda si enggo lanai itehna mehamat man kalak si erpengalamen, hidup serba instan, kisat erlajar, murah putus asa, murah terpengaruh hal-hal si la mehuli, rsd. I bas si e tentuna dukungen i bas kita orang tua nari bage pe Gereja seh kel perluna man anak-anakta PERMATA. Dukungen enda banci ilakoken kita i bas kita ngergai keberadaan PERMATA, jadi sahabat PERMATA, bage pe jadi usihen i bas kerembakenta ras Dibata bage pe i bas kerina pengkebet geluhta.