SUPLEMEN PA MAMRE GBKP TGL. 19 - 25 JULI 2026

Pdt. Larena Sinuhadji (Nd. ReyRapha Tarigan)

Bijak Bermedia Sosial

Ogen : Epesus 4:29

Tema : MBELASKEN KATA SI MABA KINIULIN

Tujun : Gelah Mamre :

1) Meteh uga mbelasken kata si mehuli

2) Makeken media sosial nehken kata si mehuli

Metode : Diskusi

Penaruh

Manusia isebut “homo loquens” entah pe makhluk yang pandai berbicara dan menyusun kata-kata untuk menyampaikan pikiran. Selain si e, manusia pe isebut “homo sapiens” entah pe makhluk yang berakal dan bijaksana. Ertina kai pe si ibelasken manusia enggo leben iukurkenna. I bas kesempaten enda radu ras kita erlajar kerna mbelasken kata si maba kiniulin. Enda penting erkiteken manusia pe isebut “homo socius” entah pe makhluk sosial yang selalu ingin berinteraksi dan hidup bermasyarakat.

Mpebagesi Ogen

Surat man Perp. Epesus isehken Paulus i bas konteks pembentukan identitas kalak si tek sebage komunitas si mbaru i bas Kristus. Bindu 4-6 ngerana kerna implikasi etis identitas si mbaru i bas Kristus. Si jadi ogenta sendah lit i bas bagin si ngerana kerna perobahen geluh kalak si tek, e me nangtangi manusia si male janah make manusia si mbaru si itepa rikutken tempas Dibata (Ep. 4:22-24). Erkiteken enggo ipersadaken ras Kristus maka kegeluhen kalak si tek harus encidahken identitas si mbaru i bas kerina pengkebet nggeluh khususna i bas hal ngerana entah pe mbelasken kata. Ranan kalak si tek i jenda labo terjeng mengandung konsekuensi pribadi, tapi lit dampakna ku bas relasi antar sesama i tengah-tengah perpulungen kalak si tek, bage pe i tengah-tengah masyarakat. Si enda tentu harus isedari kalak si tek paksa si e.

Ogenta sendah sada ayat ngenca e me ay. 29, nina, “Adi kam ngerana ula sitik pe belasken cakap si la erturi-turin. Tapi kata-kata si ergunalah belasken, si banci nampati kalak si deban rikutken perluna, gelah kata-katandu e maba kiniulin man si megisa.” I bas terj. TB-LAI Ed. 2, nina, “Janganlah perkataan kotor keluar dari mulutmu, tetapi pakailah perkataan yang baik untuk membangun, di mana perlu, supaya mereka yang mendengarnya, beroleh anugerah.” Kata Yunani i bas “cakap si la erturi-turin” (“perkataan kotor”) e me σαπρός (sapros), si secara harfiah ertina “busuk,” “rusak,” entah pe “tidak berguna.” I jenda Paulus labo terjeng mpersingeti gelah ula mbelasken cakap si kotor, tapi kerina bentuk komunikasi si berpotensi encedai relasi, umpamana: merendahkan martabat orang lain; menyebarkan kebencian; mpermelaken; menghancurkan kepercayaan; entah pe memperbesar konflik.

Kata “erguna” entah pe “membangun” bhs. Yunani-na e me οἰκοδομή (oikodomē), si ertina membangun sebuah rumah. Gambaren enda penting erkiteken Gereja e me bangunen rohani si terus ibangun Dibata (Ep. 2:19-22). Ranan kalak Kristen enggo sepatutna erguna, membangun, entah pe konstruktif. Kai pe si ibelasken kalak si tek harus erbahanca ise pe si megisa bertumbuh dalam iman, pengharapan, kasih, ras pemulihan relasi. Janah si pentingna kel, gelah maba kiniulin man si megisa, i bas terj. Bhs. Ind., nina, “supaya mereka yang mendengarnya beroleh anugerah.” Kata “anugerah” bhs. Yunani-na e me “charis.” Ertina ranan kalak si tek erbahanca anugerah keleng ate Kristus tuhu-tuhu igejapken ise pe si megisa.

Versi Audio silahkan klik : https://youtu.be/NbYlneacShg

Pengkenaina

PA-nta sendah ngajuk kita kerina, khususna kam Mamre kami, gelah si pemena, tuhu-tuhu menyadari identitasta selaku manusia si mbaru i bas Kristus. Alu bage nggit kam kerina terus-menerus ipelimbarui Kesah Si Badia. Ertina kegeluhen si mbaru i bas Kristus e labo terjadi secara instan, lit proses berobah ku si mehuli. Kuncina nggit kita ipersingeti, janah nggit kita erlajar berobah ku si mehuli, khususna i bas hal mbelasken kata si maba kiniulin. Si peduaken, selektif i bas pergaulen. Pilihlah komunitas si sehat pengeranana, gelah alu bage kita pe terkondisi guna mbelasken kata-kata si mehuli si maba kiniulin baik untuk diri sendiri bage pe guna ise pe si megikenca. Si peteluken, kata-kata si maba kiniulin e harus terus ipelajari, alu bage perbendarahaan kata si mehuli pe semakin melala i bas perukurenta. Si enda banci idatken kita arah megiken ras ngoge Kata Dibata. Si peempatken, pindolah kebeluhen i bas Kesah Si Badia nari gelah reh beluhna kita mbelasken kata-kata si maba kiniulin. 

Tema umum i bas PA-nta sendah e me “Bijak Bermedia Sosial” janah tujun si peduaken i bas PA-nta sendah e me gelah Mamre makeken media sosial guna nehken kata si mehuli. Ertina iajuk kita kerina khususna kam kerina Mamre kami gelah makeken kemajun teknologi komunikasi ras media sosial (medsos) guna er-Berita Si Meriah. Banlah status i bas medsosta kata-kata si membangun, si memotivasi, si maba kiniulin, si jadi pasu-pasu man ise pe si ngogesa. Tek kita adi enggo sidalanken empat hal i datas, ngasup kam kerina Mamre kami bijak i bas bermedia sosial. Dibata si mpengasup kita kerina.