SUPLEMEN PJJ GBKP TGL. 19 - 25 JULI 2026

Pdt. Larena Sinuhadji (Nd. ReyRapha Tarigan)

KALAK SI TEK REMBAK RAS DIBATA - Roma 10:1-4

(Konfesi Keselamatan: Trias Sola)

Penaruh

PJJ-nta sendah lit kaitenna ras telu “sola” si turah i bas Gerakan Reformasi Gereja abad 16, e me Sola Gratia, Sola Fide, ras Sola Scriptura. Selain telu “sola” ndai, lit ka dua “sola” si deban e me “Solus Christus” ras “Soli Deo gloria.” Adi sibahan daftar urutenna sue ras sistematika kiniteken Kristen maka uruten si pemena e me Sola Scriptura erkiteken Dibata mpetandaken diriNa arah kesaksin Pustaka Si Badia nari. Uruten si peduaken e me Solus Christus erkiteken puncak penyataan Dibata lit i bas Yesus Kristus. Uruten si peteluken e me Sola Gratia erkiteken anugerah keselamaten ibereken Dibata erkelangken Yesus Kristus. Uruten si peempatken e me Sola Fide, erkiteken anugerah keselamaten ialoken manusia arah kinitekenna. Uruten si terakhir e me Soli Deo Gloria, erkiteken tujun pengkebet geluh manusia kenca enggo ialokenna keselamaten e me guna memuliaken gelar Dibata.

I bas PJJ-nta sendah radu ras mulihi kita erlajar pengajaren kiniteken Kristen kerna keselamaten erpalasken ogenta sendah bage pe Konfesi GBKP.  

Mpebagesi Ogen

Ogenta sendah masuk ku bas kelompok bindu 9-11, si nuriken kerna hubungen kalak Yahudi ras si labo kalak Yahudi i bas sura-sura Dibata nandangi manusia. Kesimpulen Paulus e me maka penulaken kalak Yahudi nandangi Yesus e me sada bagin i bas rencana Dibata guna maba kerina manusia ku bas kebayaken perkuah ate Dibata i bas Yesus Kristus, janah tek pe Paulus maka labo rasa lalap kalak Yahudi nulak Yesus. 

Secara khusus si jadi ogenta sendah lit i teruh judul perikop “Kerna kalak Israel ras Berita Si Mehuli.” I bas terj. Bhs. Ind., nina, “Keselamatan bangsa-bangsa lain dan kesesatan orang Israel.” Ay. 1 e me pertoton Paulus nandangi kalak Israel si lenga ialokenna Yesus sebage Mesias Juruselamat. Tedeh ate Paulus gelah kalak e kerina nggit ngaloken Yesus sebage Tuhan ras Juruselamat janah idatkenna keselamaten. I bas terj. BIMK teridah ketedehen ate Paulus arah kata-kata “rindu sekali.” Ketedehen ate enda akap kami harus jadi palas i bas erpengarapen nandangi keselamaten kerina isi doni enda. Janah Paulus mereken usihen man banta, gelah terus notoken kerina kalak si lenga tek nandangi Yesus sebage Tuhan ras Juruselamat.

I bas ay. 2-3 ipujiken Paulus ketutusen kalak Israel i bas ersembah man Dibata arah idalankenna Undang-undang (Taurat). Tapi ketutusen e ipalasi alu pemeteh manusia ngenca, labo ipalasi alu kepentaren i bas Dibata nari. Alu bage la terantusi kalak Israel kebenaren Dibata, e me kuga Dibata ngerembakken manusia kempak Dibata. Emaka ketutusen i bas ersembah man Dibata harus ipalasi alu kepentaren si rehna i bas Dibata nari. Kepentaren i bas Dibata nari erbahanca kalak si tek rembak ras Dibata. Kerembaken ras Dibata erbahanca tuhu-tuhu terantusi kebenaren Dibata. I jenda pe akap kami, Paulus ngerana man banta kerina kalak si tek, gelah ula sempat geluh kinitekennta hanya sekedar rutinitas, gelah iidah kalak, entah pe hanya terjeng mewarisi kiniteken orang tuanta. Tapi tuhu-tuhu sitandai Dibata i bas Yesus Kristus, geluh rembak ras Dibata, janah ngelakoken kerina si jadi peraten Dibata sebage wujud nyata kinitekenna.

I bas ay. 4 mulihi isingetken Paulus kai si pernah ikataken Yesus i bas Mat. 5:17, maka Yesus e me penggenepen Undang-undang (Taurat). I bas Alkitab TB-LAI Ed. 2 ikataken bagenda nina, “Tujuan akhir hukum Taurat adalah Kristus, sehingga kebenaran diperoleh tiap-tiap orang yang percaya.” Alu bage seharusna kalak Israel si memang tuhu-tuhu tutus ndalanken Undang-undang erpalasken kepentaren i bas Dibata nari, labo mesera guna ngaloken Yesus sebage Mesias Juruselamat.     

Versi Audio silahkan klik : https://youtu.be/fygbmwOTxyA

Pengkenaina

Pengajaren kiniteken kerna keselamaten i bas Yesus Kristus akap kami enggo tangkas man banta kerina. I bas Konfesi GBKP Bab 14 si ngakuken kerna keselamaten, ikataken bagenda nina, poin si pemena, “Kami percaya bahwa keselamatan adalah pemulihan kembali citra Allah dalam diri manusia. Keselamatan merupakan inisiatif Allah yang mengasihi manusia (Yoh. 3:16). Oleh karena itu, keselamatan merupakan anugerah Allah, bukan hasil usaha manusia (Ef. 2:8-9).” Poin si peduaken, “Kami percaya bahwa keselamatan dari Allah diterima oleh iman dan membuahkan hidup benar dan kudus sesuai firman Allah serta semangat melakukan perbuatan-perbuatan baik sebagai ucapan syukur atas keselamatan yang telah dianugerahkan Kristus (2 Pet. 3:14; Kol. 1:17, 3:15-17; 1 Pet. 1:16).”

Selain si e, i bas Buku Katekisasi GBKP enggo lit pengajaren kerna telu sola, i bas hlm. 200 ikataken bagenda nina, “Sola fide, sola gratia, dan sola Scriptura adalah warisan teologi Reformasi yang masih terus dipakai dan dihidupi Gereja-gereja Protestan masa kini. Bahwa bukan karena kehebatan dan kebaikan manusia, ia beroleh keselamatan, melainkan karena imannya (sola fide) dan anugerah Allah (sola gratia). Sebagai respon ungkapan syukurnya, hidupnya dituntun dan dibimbing oleh kehendak Allah melaluij firmanNya (sola Scriptura).

Ertina pengajaren kiniteken kerna keselamaten i bas konteks GBKP akap kami enggo nge lengkap, penungkunenna man banta kerina, enggo nge kita nggeluh rembak ras Dibata? Enda penungkunen evaluatif si harus terus-menerus sisungkun i bas dirinta. Ula sempat kita bagi kalak Israel si teridah tutus ersembah man Dibata, tapi la iangkaina tujun i bas ia ersembah man Dibata. Emaka marilah kita ertekad guna tuhu-tuhu nandai Dibata i bas Yesus Kristus. Pindolah kepentaren i bas Dibata nari gelah reh rembakna kita ras Dibata. Alu bage tuhu-tuhu terantusi kita kai si jadi peraten Dibata i bas kegeluhenta, janah geluhta tuhu-tuhu jadi surat Kristus si maba keselamaten ku sekelewetta. Gelar Dibata termulia arah dirinta i japa pe kita ringan. Dibata si mpegegehi ras mpengasup kita kerina.