SUPLEMEN PA MORIA GBKP TGL. 19 - 25 JULI 2026

Pdt. Larena Sinuhadji

Wujud Kasih: Komunikasi

Si Man Ogen : Keluaren 32:7-16

Tema : ERCAKAP-CAKAP RAS DIBATA

Tujun : Gelah Moria:

- Meteh kerembaken Musa ras Dibata

- Nuriken isi pusuhna man Dibata arah pertoton

Metode : Meditasi (Self Verbatim)

Penaruh

PA-nta sendah lit i teruh tema umum “Wujud kasih: komunikasi.” Adi sisungkun AI, engkai maka komunikasi e penting i bas kegeluhenta si tep-tep wari? Bagenda nina jawabenna, “Komunikasi berfungsi sebagai sarana untuk menyampaikan informasi, mengekspresikan emosi, membangun hubungan sosial, memengaruhi orang lain, dan mengendalikan perilaku. Hal ini memungkinkan kita untuk bekerja sama, menyelesaikan masalah, dan menghindari kesalahpahaman dalam kehidupan bermasyarakat sehari-hari.” Adi sikaitken ras kinitekenta, komunikasi e me sarana guna nehken keleng ate Kristus ras ise pe. Janah relasi si terjalin arah komunikasi e banci simanfaatken guna bersaksi, pembarken Berita Si Meriah, baik secara verbal maupun non-verbal. I bas kesempaten enda radu ras kita erlajar kerna menjalin relasi si ndeher ras Dibata alu komunikasi si intens i bas pertotonta.

Mpebagesi Si Man Ogen

Latar belakang si man ogenta sendah e me bangsa Israel si kurang sabar i bas nimai Musa si sangana njumpai Dibata i deleng Sinai, empat puluh wari empat puluh berngi. Erkiteken si e, ipaksa bangsa e Harun gelah erbahan sada dibata si man sembahen guna minpin bangsa e, e me patung lembu emas. Kenca enggo iteh Dibata kai si ibahan bangsa e, isuruh Dibata Musa pedas nusur i bas deleng Sinai nari guna njumpai bangsa si la patuh ersembah man Dibata ndai.

Si jadi fokus i bas PA-nta sendah rikutken tema ras tujun, labo turi-turin kerna kinilapatuhen bangsa Israel ersembah man Dibata, tapi relasi si ndeher antara Dibata ras Musa. Adi sioge kerina turi-turin Musa tentu melala ayat si encidahken uga ndeherna ia ras Dibata. Melala ayat si nuriken maka Musa banci ngerana secara langsung ras Dibata, bage pe sebalikna. Amin pe mungkin sora Dibata ngenca si banci ibegiken Musa, tapi Musa ras Dibata banci berdialog secara langsung.

Adi siperdiateken ay. 11-13, lit hal si menarik akap kami, Musa bagi mereken pedah-pedah man Dibata gelah ula merawa. Isingetken Musa mulihi kerna perbahanen-perbahanen Dibata si mbelin man bangsa Israel benaken Abraham nari. I jenda Dibata igambarken bagi sekalak kandu-kandu (sahabat) si nggit ngaloken pedah-pedah i bas Musa nari. Enda tentu secara logika la mungkin, tapi i bas si man ogenta sendah ituriken maka Musa labo terjeng banci ngerana secara langung man Dibata, banci megiken respon Dibata secara langsung, tapi banci ka nge Musa mpekusur ukur TUHAN, janah la isehkenNa cilaka si enggo isurakenNa man bangsa Israel. Enda nuduhkenca relasi si sangat dekat antara Musa ras Dibata.

Relasi si dekat e tentu labo terjadi secara instan, benaken Kel. 3 nari banci sioge maka Dibata enggo berinisiatif ngerana secara langsung ras Musa guna ngutus ia mbebasken bangsa Israel i bas perbudaken i Mesir nari. Kenca si e Musa ras Dibata terus berkomunikasi secara intensif seh bangsa Israel bengket ku taneh Kanaan. Arah komunikasi si intensif enda ndai terjalin relasi si sangat dekat antara Musa ras Dibata, bahkan gaya komunikasina pe terbuka bagi kita ngerana ras sahabat, entah pe ngerana ras kalak si ndeher ras kita.

Versi Audio silahkan klik : https://youtu.be/kqlEZzm6ax0

Pengkenaina

Metode PA-nta sendah e me meditasi (self-verbatim). Verbatim e me teks entah pe transkrip si mencatat setiap kata ras tindakan i bas percakapen konseling secara persis dan lengkap. Self-verbatim ertina sekalak konselor banci mencatat pengalamenna sendiri guna iteliti respon entah pe perasaan dirinya sendiri. Mungkin banci ikataken maka self-verbatim enda seri ras kita ngerana ras dirinta sendiri. Enda akap kami penting guna mengevaluasi diri sendiri, memotivasi diri sendiri, menyembuhkan diri sendiri, rsd.-na.

Sue ras tujun si peduaken i bas PA-nta sendah, iajuk kita kerina Moria gelah nuriken isi pusuhta man Dibata arah pertoton. Nuriken isi pusuh seri ras erbahan self-verbatim. Jamanta gundari enda labo seri ras jaman Musa, i ja Musa banci ngerana ras Dibata janah banci megiken secara langsung kai si ikataken Dibata. I bas jamanta si gundari enda la kita banci megiken secara langsung respon Dibata nandangi pertotonta. Tapi si seri ras Musa, kita banci ngerana ras Dibata secara langsung arah pertotonta. Jawaben Dibata banci isehken Dibata arah erbage-bage cara: arah Pustaka Si Badia nari, arah renungen-renungen si ibegiken kita, arah syair puji-pujin si iendeken kita, arah kalak si lit i sekelewetta, arah pengalamen geluhta, rsd.-na.

Si man ogenta sendah enggo mereken usihen man banta kerna relasi si ndeher ras Dibata si terjalin arah komunikasi si intensif. Emaka marilah kita terus-menerus ercakap-cakap ras Dibata i japa pe ras i bas kondisi si kugana pe, gelah terjalin kedekatan ras Dibata. Adi enggo ndeher relasinta ras Dibata tek kita maka secara otomatis enggo siteh kai saja si jadi kerinduan Dibata i bas kegeluhenta si tep-tep wari.