SUPLEMEN PA MAMRE GBKP TGL. 12-18 JULI 2026

Pdt. Larena Sinuhadji (Nd. ReyRapha Tarigan)

Penyakit Sosial/Masyarakat PEKAT

Ogen : Galati 5:19-23

Tema : JAGA KEBADIAN GELUH

Tujun : Gelah Mamre:

1) Meteh kerna kebadian geluh

2) Ngelumbaken nggeluh badia

Penaruh

PA-nta sendah lit i teruh tema umum “Penyakit Sosial/Masyarakat PEKAT.” Rikutken informasi i bas AI nari, “PEKAT adalah singkatan dari Penyakit Masyarakat. Istilah ini merujuk pada segala bentuk perilaku, aktivitas, atau penyakit sosial yang dianggap melanggar norma agama, adat istiadat, dan hukum yang berlaku di Indonesia. Aktivitas yang dikategorikan sebagai PEKAT umumnya mencakup: 1) Perjudian, baik konvensional maupun online. 2) Prostitusi dan pasangan mesum, yaitu praktik asusila di hotel, kos-kosan, atau tempat hiburan malam. 3) Miras ilegal, atau peredaran dan konsumsi minuman keras tanpa izin. 4) Penyalahgunaan narkotika, psikotropika, dan obat terlarang. 5) Premanisme dan tawuran, yaitu tindakan pemerasan, preman jalanan, hingga keributan yang meresahkan warga.”

Kerina perbahanen si la mehuli e lit i sekelewetta, emaka harus kita metenget, waspada, mbera la lit Mamre si terlibat i bas PEKAT ndai. I bas si e PA-nta sendah ngerana kerna kebadian geluh sebage kalak si enggo ngaloken keselamaten i bas Yesus Kristus nari, i bas konteks kegeluhen sosial si dem alu perbahanen si la mehuli.

Mpebagesi Ogen

Si jadi ogenta sendah lit i teruh judul perikop “Kesah Si Badia ras Manusia”. I bas terj. Bhs. Ind. TB-LAI, nina, “Hidup menurut daging atau Roh.” Dua judul perikop enda akap kami banci saling melengkapi. Judul i bas terj. Bhs. Ind., encidahkenca maka lit kehendak bebas si ibereken Dibata man manusia. Lit i bas dirinta kebebasen guna milih, nggeluh ngikutken sura-sura daging, entah nggeluh sue ras peraten Dibata? Judul perikop i bas terj. Bhs. Karo nari encidahkenca maka lit je peran Kesah Si Badia. Selaku kita kalak si tek, si enggo ngaloken perkuah ate Tuhan arah Yesus Kristus, enggo lit i bas kita Kesah Si Badia si nampati kita nggeluh erpalasken kiniteken man Dibata, janah Kesah Si Badia si mpengasup kita ngelakoken kerina si jadi peraten Dibata i bas geluhta si tep-tep wari. Ertina amin pe lit kehendak bebas i bas diri kalak si erkiniteken, kecenderungenna tentu lebih mbelin guna ngelakoken kerina si jadi peraten Dibata asangken sura-sura doni enda. 

Konteks Perp. Galati paksa Paulus nehken suratna, lit denga kepeken perpulungen si lenga tertadingkenna karakter kegeluhenna si ndekah. Kondisi si bagenda rupana erbahanca perpulungen si deban terganggu pertumbuhen kinitekenna. Emaka i bas suratna enda mulihi Paulus mereken persinget man Perp. Galati, maka sura-sura ukur manusia erlawanan ras sura-sura Kesah Si badia, janah sebalikna, sura-sura Kesah Si Badia erlawanen ras sura-sura ukur manusia. Si enda duana berlawanen, bagi lau ras minak, la banci rembak ersada  i bas kegeluhen kalak si tek. Ketedehen ate Paulus, maka Kesah Si badia min si negu-negu kegeluhen kalak si tek i tengah-tengah Perp. Galati (ay. 16).

Perbahanen-perbahanen erpalasken sura-sura ukur manusia icidahken Paulus antara lain: erlua-lua, si nggesuh, la meteh mela, nembah man berhala ras erbahan ilmu sihir, simusuhen, rubati, mecimberu, perampus, egois, erbahan perpecahen dingen erpihak-pihak, sician-cianen, mabuk. Kalak si tetap denga ndalanken perbahanen-perbahanen si bagi enda adi la kin ia bertobat labo banci dat bagin i bas Kinirajan Dibata si reh pagin. Sebalikna, perbahanen-perbahanen erpalasken sura-sura Kesah si Badia e me: lit kekelengen, lit keriahen dingen lit kemalemen ate, lit kesabaren, idalankenna perbahanen si mehuli, mehuli ia, setia. Meteruk ukurna dingen ngasup engkuasai diri.

Pengkenaina

Tema bage pe tujun i bas PA-nta sendah ngajuk kita kerina, khususna kam kerina Mamre kami, gelah terus njagai kebadian geluhna selaku kalak si enggo ngaloken keselamaten i bas kinitekenna man Yesus Kristus. I bas si e si harus leben isedari maka, si pemena, kerina kalak si tek e me sikerajangen Kristus Yesus. Adi enggo jadi sikerajangen Yesus perukurenna secara manusia enggo ibunuhna rikutken ras kerincuhen dagingna bage pe sura-surana. Si peduaken, kalak si enggo ngaloken keselamaten i bas Yesus Kristus enggo lit i bas ia Kesah Si Badia. Emaka Kesah Si Badia min si negu-negu kegeluhenta. Kesah Si Badia si mpengasup kita geluh badia, sebab la kita ngasup geluh badia adi siandalken gegeh beluhta. Geluh badia erpalasken ogenta sendah secara konkrit e me: lit kekelengen, lit keriahen dingen lit kemalemen ate, lit kesabaren, idalankenna perbahanen si mehuli, mehuli ia, setia. Meteruk ukurna dingen ngasup engkuasai diri.

Genduari si perlu jadi evaluasi man banta, engkai makana enggo pe kita jadi kalak Kristen, bahkan lit ka deba Serayan Tuhan, tetap denga la ngasup nimbak peraten daging e? Melala denga kalak Kristen si jadi pelaku PEKAT: pemakai ras pengedar narkoba, koruptor, selingkuh, mabuk, ermusuhen, nembah man berhala, rsd. Alu bage kegeluhenna jadi batu antuken man perpulungen janah menghambat pertumbuhan iman anggota jemaat si deban.

Johanes Calvin i bas bukuna Institutio mereken motivasi man banta, maka lit 6 kebiasaan si harus terus sibiasaken i bas kegeluhen kalak si tek guna banci ngalaken sura-sura daging. Si pemena, bergantung man Kesah Si Badia. Kesah Si Badia enggo ibereken Tuhan man banta. Emaka si erbahanca Kesah Si Badia tetap nggeluh bas kita, tetap kita rembak ras Dibata. Kesah Si Badia si mpengasup kita nggeluh i bas pertobaten sepanjang geluhta (labo sesaat). Kerembaken ras Kristus erbahanca lit dua tindaken si ihasilken kita, e me tindaken mortifikasi (mematikan kehidupan lama) ras vivifikasi (mpekeke kegeluhen si mbaru). Si peduaken, menyangkal diri (mpersilahang banta). Iterangkenna, maka kita enggo itebus Kristus, maka geluhta labo nari kita si empuna, tapi Dibata. Emaka arus kita tunduk nandangi sura-sura Dibata i bas kegeluhenta.

Si peteluken, mersan kayu persilang. Bagi Kristus mengalami erbage-bage kiniseran guna keterkelinenta, maka selaku pengikutNa kita pe tetap ngataken bujur i bas erbage-bage kiniseran si nderpa kita. Kiniseran merupaken dalanna ujian guna reh gegehna kinitekenta. Si peempatken, menfokuskan diri man kegeluhen si rasa lalap. Ibereken pengangkan man perpulungen maka geluhnta labo terjeng bas doni enda saja, tapi lit kegeluhen si rasa lalap. Si pelimaken, memanfaatkan seluruh aspek kegeluhen guna kemulian man Dibata. Dibata tetap ermulia arah perukuren, pengerana ras perbahanenta. Ras si peenamken, bertekun i bas doa. Dibata si mpengasup kita kerina guna tetap njagai kebadian geluh selaku sikerajangen Dibata i bas Yesus Kristus.