SUPLEMEN PA MORIA GBKP TGL. 30 JUNI - 6 JULI 2024

Pdt. Larena Sinuhadji (Nd. ReyRapha Tarigan)

Moria Jadi Pasu-pasu Man Isi Jabu

Si Man Ogen : Keluaren 4:24-26

Tema : NJAGAI KEBADIAN JABU

Tujun : Gelah Moria :

- Nggargari perbahanen Sipora nelamatken kegeluhen jabuna

- Ngkuhi isi jabu gelah rembak ras Dibata

Metode : Meditasi

Penaruh

I bas Konfesi GBKP Bab XI Poin 3 si ngerana kerna Perkawinan nina, “Kami percaya bahwa perkawinan merupakan ikatan yang kudus dan anugerah Allah kepada manusia, maka perkawinan itu harus dijalani dengan ucapan syukur dan penuh tanggung jawab.” Salah sada tanggung jawab si harus sidalanken e me njagai kebadian jabu. I bas kesempaten enda radu ras kita erlajar mulihi kerna njagai kebadian jabu.

Mpebagesi Si Man Ogen

Ogenta sendah nuriken kerna Musa si mbaru denga iutus Dibata guna mbebasken bangsa Israel i bas perbudaken i Mesir. I bas perdalanen ku Mesir lit sada peristiwa i ja sanga Musa ras keluargana erberngi i bas sada ingan, ijumpai Tuhan Musa janah ibunuhNa ate Tuhan Musa. Engkai maka lit sura-sura Tuhan guna munuh Musa? Ogenta sendah situhuna enggo jadi perdebaten i kalangan penafsir erkiteken i bas naskah aslina la lit je isebutken gelar Musa. Gelar Musa itambahken penterjemah mungkin gelah si ngoge meteh ise si imaksudken je bakal ibunuh Tuhan. Amin pe situhuna tetap membingungkan, sebab konteks ogenta sendah e me perdalanen Musa ku Mesir sebage utusen Dibata guna mbebasken bangsa Israel. Engkai maka lit sura-sura Dibata guna munuh Musa padahal mbaru denga ia iutus?

Satu-satunya kunci guna ngangkai ogenta sendah e me tradisi sunat si lit i tengah-tengah bangsa Israel. Sunat adalah tradisi dalam bangsa Yahudi yang merupakan tanda perjanjian Allah dengan umat Israel (Kej. 17:9-14), dan harus dilakukan pada tubuh setiap anak laki-laki di Israel pada umur 8 hari (Im. 12:3). Lit penafsir si ngatakenca maka Musa paksa si e lenga isunatken, e si erbahanca Dibata la senang. Lit ka si ngatakenca maka sada anak Musa lenga isunatken, e si erbahanca Dibata la senang. Lit ka si ngatakenca maka Musa ras salah sada anak dilakina lenga isunatken, ikataken nina, “Kenyataan bahwa Musa tidak bersunat membangkitkan murka Allah. Zipora berhasil meredakan murka Allah dengan sungguh-sungguh menyunatkan anaknya dan pura-pura menyunatkan Musa, yaitu dengan menyentuh kemaluannya (kaki memang dapat berarti: kemaluan, bdk. Yes. 6:2; 7:20) dengan kulup anaknya yang dikerat” (Alkitab SABDA Tafsiran Jerusalem).

Rikutken tema ras tujun PA-ta sendah, si jadi fokus e me Sipora ras kai si enggo ilakokenna guna nyelamatken Musa entah pe anakna. Sipora e me sekalak Midian anak Jetro ndehara Musa. Sebage sekalak si labo kalak Yahudi, tentu keluarga Sipora la ngelakoken tradisi sunat enda. Tapi amin bage gia, kenca enggo iperhadapken pilihen, antara la ngelakoken sunat tapi mate Musa (anakna), ras ngelakoken sunat janah tetap nggeluh Musa (anakna). Ipilih Sipora ngelakoken sunat gelah tetap nggeluh Musa ras anakna.

Versi Audio silahkan klik : https://youtu.be/7saR-k1nAYI

Pengkenaina

Tema ras tujun PA-ta sendah ngajuk kita kerina Moria gelah beluh njagai kebadian jabu. Adi rikutken ogenta sendah, erlajar kita arah Sipora nari alu milih pilihen si mehuli guna kelangsungen geluh perjabunna. Adi siperdiateken turi-turin i bas Pustaka Si Badia, peran diberu biasana labo melala ituriken. Tokoh-tokoh dilaki nge biasana si mendominasi turi-turin i bas Pustaka Si Badia. Tapi sekali paksa peran diberu ituriken, biasana peran si krusial entah pe peran si penting bagi ogenta sendah. Ertina peran diberu i bas Pustaka Si Badia tuhu-tuhu ianggap penting ras jadi penentu guna kiniulin.

I bas kesempaten enda pe radu ras kita isingetken kerna peranta si penting i bas jabu-jabu kalak Kristen. Amin pe mungkin peran sekalak nande entah pe ndehara i bas jamanta gundari enda enggo melala bedana ras jaman si nai, tapi adi kerna peran penentu guna kiniulin isi jabu tetap denga seri nai nari seh asa gundari, sebab bagi nina Konfesi GBKP i bas bagin penaruh i datas, perbulangen ras ndehara radu ras bertanggung jawab ndalanken kegeluhen perjabun alu mehuli.

Emaka i bas kesempaten enda mari radu ras kita Moria secara proaktif terus njagai kebadian jabu alu, si pemena lebe ndalanken tugas tanggung jawabta sebage ndehara ras nande alu mehuli. Si peduaken, njagai geluh rohaninta alu tetap setia ertoto, ngoge Pustaka, erbakti, ngikuti kegiaten-kegiaten gereja, rsd. Si peteluken beluh menatakelola waktu si lit alu mehuli guna erdahin, mperdiateken perbulangen ras anak-anak, bage pe kegiaten-kegiaten mehuli si debanna. Si peempatken, mabai isi jabu guna rembak ras Dibata. Bagi si enggo isingetken i bas PA Moria si lepas, adi perbapan i bas jabu lenga beluh nggeluh erkemalangen man Dibata, pernanden harus berinisiatif mengambil peran, ula sempat sidalih-dalihen entah pe ngadi guna mabai isi jabu nggeluh rembak ras Tuhan bage pe ndalanken si ngena ate Tuhan. Em akap kami peran penting kita Moria entah pe ndehara i bas njagai kebadian jabu. Dibata si mpengasup kerina kita Moria guna ngelakokenca.