SUPLEMEN PA MAMRE GBKP TGL. 2 - 8 JUNI 2024

Pdt. Larena br. Sinuhadji (Nd. ReyRapha Tarigan)

Ogen : Mazmur 128:1-6

Tema : JABU SI MALANG MAN TUHAN

Tujun : Gelah Mamre :

1) Nuriken ulu kemalemen ate e me i bas Dibata nari

2) Naksiken tanda-tanda kemalemen ate arah perukuren, pengerana ras perbahanen

Penaruh

Tema kerna jabu entah pe keluarga akap kami enggo rusur sibahas baik i bas PJJ bage pe i bas PA-PA Kategorial. Tujunna tentu gelah jabu-jabu kalak si tek semakin paguh amin pe tantangen i bas konteks jaman gundari enda semakin mbelin. Jabu-jabu kalak si tek akap kami e me pondasi kekristenan i tengah-tengah doni enda. Adi mehuli jabu-jabu kalak si tek, maka enggo pasti mehuli ka kekristenan i tengah-tengah doni enda, erkiteken jabu-jabu kalak si tek tuhu-tuhu banci jadi saluran pasu-pasu Dibata man doni enda, khususna jabu-jabu kalak si tek tuhu-tuhu banci jadi media pembarken Berita Si Meriah.

I bas kesempaten enda radu ras kita erlajar mulihi kerna jabu kalak si tek si erkemalangen man Dibata erpalasken ogenta sendah. 

Mpebagesi Ogen

Masmur 128 e me salah sada ende-enden ziarah si iendeken tupung bangsa Israel berkat ku Rumah Pertoton Tuhan i Jerusalem. Masmur 128 e me ende-nden kerna pasu-pasu Tuhan man isi jabu. Sada ketedehen ate, kalak si berkat ersembah man Tuhan ku Jerusalem ndatken pasu-pasu i bas Tuhan nari i bas jabuna. Masmur 128 enda ncidahkenca maka jabu e me unsur si penting si jadi pondasi bangsa Israel. I bas Masmur 128 enda icidahken kegeluhen jabu si ideal sue ras peraten Dibata. Adi mehuli geluh perjabun kalak Israel enggo pasti bangsa e pe ipasu-pasu Dibata.

Inti i bas perikop enda e me sangap kalak si malang man Tuhan si nggeluh ngikutken kerina perentahNa (Bhs. Ind.: “Berbahagialah setiap orang yang takut akan TUHAN, yang hidup menurut jalan yang ditunjukkanNya”). Ayat enda iulihi sekali nari i bas ay. 4, “Bage me pasu-pasu Tuhan man kalak si malang man baNa” (Bhs. Ind.: “Sesungguhnya demikianlah akan diberkati orang laki-laki yang takut akan TUHAN”). Ertina kesangapen (kebahagiaan) i bas jabu ibenaken i bas sekalak perbapan si malang man Tuhan, si nggeluh ngikutken perentah Tuhan. Dalan Tuhan si ikutken labo dalanta. Adi kita, kadang pintas, instan, cepat, la nggit susah, labo siakap masalah la sentudu bagi si ngena ate Tuhan, si penting berhasil, sukses.

Kai saja dage kebahagiaan (kesangapen) man kalak si malang man Tuhan, entah pe  ulih kalak si nggeluh ngikutken perentah Tuhan? Piga-piga hal icidahken i jenda :

Si pemena, ipanna me ulihna latih, sangap nggeluh mehuli sikerajangenna (“Apabila engkau memakan hasil jerih payah tanganmu, berbahagialah engkau dan baiklah keadaanmu”). Tuhu-tuhu ternikmatisa ulih latih e ras tuhu-tuhu maba kinulin, maba kemalemen ate. Secara tersirat lit i je ungkapen pengataken bujur ras erlajar mencukupken diri arah ulih latih bekas Tuhan si merekenca, seh makana tuhu-tuhu maba sukacita, maba kiniulin arah kai si enggo ibereken Tuhan i bas kinilatihen erdahin.

Si peduaken, ndeharana bali ras anggur si meramis i sekelewet mejana. Anggur e me sada buah si cukup penting i Israel. Sada inemen si ibutuhken dingen mereken keriahen. Bage me iarapken ndehara si tuhu-tuhu jadi penolong, mereken keriahen kempak perbulangen ras seisi jabu.

Si peteluken, anak-anakna bali ras tunas batang saitun. Buah saitun jadi pangan dingen minakna jadi tambar, minak penangkuhen man imam, banci jadi parfum, rsd. Ertina, anak-anakna tuhu-tuhu mereken kebahagiaan man keluarga sebab tuhu-tuhu erguna kehadirenna bas jabu e. Cawir metua, maka sempat siidah kempu-kempu.

Versi Audio silahkan klik : https://youtu.be/vkONb7YgZTY

Pengkenaina

Lit dua kalimat kunci i bas tema bage pe tujun PA-ta sendah. Si pemena e me “malang man Dibata” si peduaken “kemalemen ate.” Adi i bas ogenta sendah nina  “sangap kalak si malang man Tuhan” ras “pasu-pasu Tuhan man kalak si malang man baNa.” Ertina i bas PA-ta sendah kemalemen ate seri ras kesangapen bage pe pasu-pasu i bas Dibata nari. Janah kemalemen ate e ialoken kalak si malang man Tuhan. Nggeluh erkemalangen man Tuhan rikutken ogenta sendah, ibenaken i bas perbapan nari. Emaka i bas kesempaten enda isingetken mulihi kam kerina Mamre kami gelah tuhu-tuhu nggeluh erkemalangen man Tuhan. Nggeluh erkemalangen man Tuhan e me ngikutken kerina si jadi peraten Dibata, si secara praktis banci silakoken i bas kegeluhen si tep-tep wari, umpamana, tutus ertoto, tutus erlajar kerna Kata Dibata, erkeleng ate, ermeriah ukur, dem alu dame, sabar, mehuli, setia, meteruk ukur, ngasup engkuasai diri, rsd.

Adi enggo sibenaken perbapan tengah jabu nggeluh erkemalangen man Tuhan, emaka kesangapen, kemalemen ate, entah pe pasu-pasu i bas Dibata nari maler ku tengah-tengah jabu sue ras janji Dibata i bas ogenta sendah. Emaka marilah kam kerina Mamre kami gelah ertekad nggeluh erkemalangen man Dibata. Man bandu Mamre kami si enggo erpala-pala nggeluh erkemalangen man Dibata, mari sitingkatken. Man bandu Mamre kami si man iah-iahenken denga ertoto, ngoge Pustaka, entah pe ngikuti kebaktin-kebaktin bas gereja, mari sitekadken gelah lit perobahen i bas dirindu jadi Mamre si tuhu-tuhu nggeluh erkemalangen man Tuhan. Mari radu ras sigegehi ertoto man Dibata, gelah ipengasup Dibata kita nggeluh erkemalangen man baNa. Sebab godaan i bas jamanta gundari enda semakin mbelin. Enterem kalak si ndabuh ku bas godaan judi online, game online, pinjaman online, rsd., janah i bas si e si jadi korban e me anak-anak ras isi jabunta. Dibata si mpegegehi ras mpengasup kita nggeluh erkemalangen man baNa.