SUPLEMEN PJJ GBKP TGL. 23 - 29 JUNI 2024

Pdt. Larena Sinuhadji (Nd. ReyRapha Tarigan)

TUTUS I BAS SI MEHULI DINGEN ERGUNA (Titus 3:8b-11)

Penaruh

Tutus ertina sungguh-sungguh, dengan sepenuh hati, tulus, tidak main-main atau setengah-setengah. Tema PJJ-ta sendah “Tutus i bas si mehuli dingen erguna,” adi sikaitken ras erti tutus ndai, ngelakoken si mehuli dingen erguna saja lenga cukup. Sebab e lenga bo pasti silakoken alu sungguh-sungguh, dengan sepenuh hati, tulus, tidak main-main atau setengah-setengah. Jadi kai nge standarna entah pe patokenna maka si mehuli dingen erguna ndai enggo silakoken alu tutus? I bas PJJ-ta sendah radu ras kita erjalar kerna ketutusen i bas ngelakoken si mehuli dingen erguna.

Mpebagesi Ogen

Titus e me sekalak Yunani anak rohani Rasul Paulus (Titus 1:4). Titus rusur iutus Paulus guna er-Berita Si Meriah, janah peranna i bas perkembangen Perp. Korinti banci ikataken mbelin (bdk. 2 Kor. 2:13; Gal. 2:1-3). Surat Titus enda Rasul Paulus si nuliskenca alu tujun memotivasi gelah reh semangatna Titus pembarken Berita Si Meriah, janah tetap setia ngajari ras membimbing perpulungen gelah nggeluh sue ras peraten Dibata. I bas bindu 1:5 ituriken maka Titus melayani perpulungen kalak si tek i Pulau Kreta. Perpulungen Kreta banci ikataken perpulungen si lenga tuhu-tuhu dewasa i bas erkiniteken. Enda banci sioge i bas ay. 12 ras 13 bindu 1. Tapi amin bage gia, Titus tetap setia melayani.

Ogenta sendah lit i teruh judul “Lagu langkah kalak Kristen.” I bas terj. TB-LAI nina, “Pesan-pesan penutup.” Arah dua judul enda nari teridah maka terj. Bhs. Karo ras BIMK lebih spesifik mengacu ku tingkah laku kalak Kristen si seharuna jadi usihen si mehuli. Si jadi fokus sue ras tema i bas PJJ-ta sendah e me ay. 8b nina, “Kalak si enggo tek man Dibata tutus ndahiken dahin si mehuli, si metunggung dingen erguna man manusia.” I bas terj. BIMK nina, “supaya orang-orang yang percaya kepada Allah sungguh-sungguh berusaha untuk melakukan pekerjaan-pekerjaan yang baik dan berguna untuk semua orang.” Si jadi palas i bas kalak si tek ndahiken dahin si mehuli, si metunggung dingen erguna ijelasken Paulus i bas ay. 3-7, si intina, kalak si tek e me kalak si enggo ngaloken keselamaten i bas Yesus Kristus. Kalak si enggo ngaloken keselamaten i bas Yesus Kristus labo terjeng ngaloken kegeluhen si tuhu-tuhu si la erkeri-kerin i surga, tapi geluhna i doni pe enggo ipelimbarui Kesah Si Badia.

Tandana maka geluhna enggo ipelimbarui Kesah Si Badia, kalak si tek harus tutus ndahiken dahin si mehuli, si metunggung dingen erguna man sekelewetna. Kata “tutus” i bas ay. 8, i bas terj. TB-LAI ras BIMK nina “sungguh-sungguh berusaha.” Ertina harus lit upaya si serius i bas ndahiken dahin si sue ras peraten Dibata. Engkai maka bage? Erkiteken melala tantangen i bas ndahiken dahin si sue ras peraten Dibata. Si pemena lebe tantangen arah bas nari e me kerincuhen kula ras erbage-bage sura-sura si la mehuli (ay. 3). Kalak si enggo ipelimbarui Kesah Si Badia labo berarti bebas i bas godaan nari. Godaan si mbelinna rehna i bas kerincuhen kula nari.

Si peduaken tantangen arah ndarat nari, e me pergaulen si la membangun kiniteken (ay. 9-11). I bas ay. 11 alu tegas Paulus ngatakenca “sirangi ia.” Kai si ikataken Paulus enda seri ras si ikatakenna i bas 1 Kor. 15:33, “Ula kal kam papak! Pergaulen si la mehuli, encedaken biak si mehuli.” Memang kalak si tek iutus guna er-Berita Si Meriah ku tengah doni enda, tapi i bas dampar si deban, kalak si tek pe harus beluh njagai dirina gelah ula terbawa arus pergaulen si la mehuli. Kesah Si Badia si mpengasup kalak si tek ngelawan kerincuhen kula ras pergaulen si la mehuli.

Versi Audio Silahkan Klik : https://youtu.be/HwuShGmQSPY

Pengkenaina

Kalak si tek iutus ku tengah doni enda guna er-Berita Si Meriah arah kerina pengkebet geluhna. Salah sada bentuk kesaksian kalak si tek e me arah perbahanen. Tema si seh man banta i bas PJJ sendah ngajuk kita kerina gelah reh tutusna i bas ngelakoken si mehuli ras si erguna i japa pe kita ringan. Ibenaken i bas jabuta sekalak-sekalak. Kerina si mehuli ras si erguna harus leben ilakoken sapih-sapih kita kalak si tek. Lingkungen pergaulen si mehuli i tengah-tengah perpulungen kalak si tek erbahanca kita kerina imotivasi ras ipegegehi i bas ketutusen ngelakoken si mehuli ras si erguna kai pe tantangenna i tengah-tengah doni enda. Mari radu ras sievaluasi kiniersadan sapih-sapih kita perpulungen kalak si tek i bas ngelakoken kerina si ngena ate Dibata. Sebab adi dekahen kita erjengil ras rubati sapih-sapih kita, enggo pasti la lit gegeh entah pe energi positif i bas kita ngelakoken kerina si ngena ate Dibata i tengah-tengah doni enda.

Selain si e, pindolah gegeh i bas Dibata nari gelah ipegegehiNa kita ngelakoken si mehuli dingen erguna i tengah-tengah doni enda. Motivasi i bas kita ngelakoken si mehuli dingen erguna e labo seri ras doni enda. Adi motivasi doni enda jelas mengharapkan balasan entah pe ndarami keuntungen i bas ngelakoken si mehuli ras si erguna. Motivasinta ngelakoken si mehuli ras si erguna jelas erkiteken keleng ate Dibata si mbelin si enggo mereken keselamaten si tuhu-tuhu i bas geluhta. Kerina si mehuli ras si erguna si ilakoken kita e me bentuk nyata pengataken bujurta man Dibata.