SUPLEMEN PJJ GBKP TGL. 16 - 22 JUNI 2024

Pdt. Larena Sinuhadji (Nd. ReyRapha Tarigan)

NEHI PADAN KERNA PERSEMBAHEN KERJA RANI

(Keluaren 34:21-28)

Penaruh

Kerja Rani e me pesta iman i ja radu ras kita ngataken bujur man Tuhan, mpehagaken Tuhan i bas IA enggo masu-masu geluhta, khususna ulih peraninta entah pe ulih pendahinta masing-masing (perjuma, perbinaga, pengusaha, dokter, direktur, pegawai, ASN, buruh, Pdt., pensiunen sekali pe, rsd.). Kerja Rani enggo semal ilakoken i bas gerejanta GBKP sebage wujud nyata pengataken bujurta man Dibata, janah ulih Kerja Rani e sipakeken guna mendukung dahin-dahin pelayanen i bas gerejanta. E maka i bas PJJ sendah radu ras kita ersikap guna mendukung ras mensuksesken Kerja Rani tahun 2024 si ilakoken i bas Runggunta masing-masing, si tujunna labo saja guna peningkaten kualitas ras kuantitas pelayanen tapi si utamana kel gelah erlajar kita ngataken bujur man Dibata si seh asa genduari tetap masu-masu kegeluhenta.

Mpebagesi Ogen 

Persembahen Kerja Rani i bas tradisi Padan si Ndekah, awalna bangsa Israel nomaden, berpindah-pindah selama 40 tahun. Tapi kenca enggo seh i Kanaan, enggo ipajekenna rumahna, iadopsina tradisi bangsa-bangsa sekelewet si nuan-nuan gandum, anggur, saitun, rsd. Kenca enggo ilakokenna nuan-nuan ndai, kepeken ipasu-pasu Tuhan usaha perjuma bangsa e seh makana hasil panen berlimpah ruah. I bas perkembangen selanjutna setiap wari pe-50-ken kenca rani i je me irayakenna Pesta Kerja Rani. Pulung alu meriah ukur, bapa, nande, anak-anak, kade-kade. Je nari ipersembahkenna persembahen man Tuhan rikut pasu-pasu si enggo ibereken Tuhan. Bahkan i je pe lit unsur diakoniana, sebab pulung ras kerina anak melumang, diberu mbalu-mbalu, kalak tandang-tandang. Siingetlah maka marenda kam tandang i Mesir, janah susah susah kam i negeri Mesir, tapi gundari geluhndu enggo ipasu-pasu Tuhan. Si e kerina Dibata si erbahanca.

Latar belakang si jadi ogenta sendah e me perpadanen si mbaru si ibahan Dibata ras bangsa Israel. I bas si e pe bangsa Israel mpelimbarui padanna man Dibata kenca enggo ibahanna si la ngena ate Dibata alu nembah patung lembu emas. Salah sada padan si ibahan e me kerna persembahen Kerja Rani. Piga-piga hal si banci sirenungken i bas ogenta sendah nari:

Si pemena, i bas ay. 22 ikataken nina, “Pestakenlah kerja rani tupung kam menaken peranin buah pagendu si pemena.” Lit unsur perayaan i bas kerja rani labo terjeng rani saja. Ertina kerja rani ilakoken alu meriah ukur, riang gembira, penuh dengan sukacita.
Si peduaken, kerja rani ikaitken ras ketutusen ersembah man Dibata entah pe fokus ersembah, ula ku jah ku je perukuren. I bas ay. 21, 23-25, bangsa Israel harus ngadi erdahin, je sipergunaken kesempaten guna ersembah man Dibata alu tutus.
Si peteluken, i bas ay. 26 ikataken nina, “Tep-tep tahun babalah ku Rumah TUHAN buah gandum si pemena iperanindu.” Ertina si mejilena sipersembahken man Dibata.

Pengkenaina

Lit telu hal si penting i bas ogenta nari erkaiten ras kerja rani, si pemena, harus lit keriahen ukur i bas kita nehken si mehulina man Dibata. Si peduaken, harus lit fokus ras ketutusen i bas kita ersembah man Dibata. Si peteluken, sehken persembahen si mehulina man Dibata. Janah ula kita lupa maka telu hal enda e me padanta man Dibata.  

Persembahenta man Tuhan labo sumbangen tapi pengataken bujurta man Tuhan, erkiteken perkuah ateNa si mbelin si enggo isehkenNa man banta, janah kerina si lit bas kita termasuk doni enda ras kerina isina Dibata kap empuna. Bage pe i bas persembahen Kerja Raninta sekali enda, sigejapkenlah maka Dibata si masu-masu kegeluhenta, usahanta, pendahinta, profesinta (perjuma, perbinaga, pengusaha, buruh, dokter, pejabat, ASN, pegawai, Pdt., rsd.), e maka siendeskenlah rikutken pasu-pasu si enggo ibereken Dibata man banta sekalak-sekalak, alu dem keriahen ukur. Sabab terkadang, adi soal tambah-tambah, kali-kali, pelipatgandaan, senang kita ndatkenca. Tapi ‘di kenca enggo bagi-bagi, terlebih ngataken bujur man Tuhan, bagi si enggo mberat sitik.

Siingetlah maka Dibata si tetap masu-masu kegeluhenta. Dibata si nikapken benih si iperlukenndu, IA ka nge si mpeturah benih e dingen mereken ulih si erlipat ganda i bas kiniulindu e nari (PEE 103, “Benih si isuan kami e pe rehna bas kam nari, kuasaNdu erbahanca turah, kuasaNdu erbahanca erbuah”). E maka Kerja Rani arus silakoken alu dem keriahen, lebihen asa kerja-kerja kalak Karo, erkiteken Tuhan nge si erbahanca maka lit si man peraninta. Ngataken bujurlah kita man Tuhan, amin sekali mbue perbeben ras tantangen si man alanken seh ngayak gundari Dibata tetap masu-masu kegeluhenta. Sipehagalah Tuhan alu mpersembahken ulih jumanta (pendahinta) si mehulina man Tuhan.