SUPLEMEN PA MAMRE GBKP TGL. 16 - 22 JUNI 2024

Pdt. Larena Sinuhadji (Nd. ReyRapha Tarigan)

Teks : Ulangen 16:9-12

Tema : KU BEREKEN SI METUNGGUNGNA

Tujun : Gelah Mamre :

1) Meteh erti ras makna Kerja Rani rikutken teks

2) Ergiah-giah nehken Kerja Rani alu Metunggung

Penaruh

Kerja Rani e me salah sada bentuk pengataken bujur i bas konteks gerejanta GBKP erkiteken tek kita maka Dibata si mereken pasu-pasu i bas geluhta khususna i bas pendahinta. Rikutken jadwal si lit i bas Buku Almanak GBKP tahun 2024, i bas minggu pemena bulan Juli bakal silaksanaken Kerja Rani i belang-belang GBKP. Amin pe melala Runggun si labo tepat waktu ngelakoken Kerja Rani tapi Pesta Kerja Rani enggo semal silaksanaken i bas gerejanta setiap tahunna guna mendukung dana pelayanen. 

I bas kesempaten enda radu ras kita nikapken dirinta i bas mendukung pelaksanaan Kerja Rani tahun 2024 i bas Runggunta masing-masing. Mbera arah PA-ta sendah semakin ergiah-giah kita nehken persembahen Kerja Rani alu metunggung sue ras ogenta sendah.

Mpebagesi Teks

I bas ogenta ras piga-piga teks Pustaka Si Badia si ngerana kerna Kerja Rani (Kel. 22:29, 23:15-16, 34:22, Im. 23:15-20), maka Kerja Rani ilakoken i bas wari pelimapuluhken kenca panen gandum. Masa raya buah pertama (the first fruit) entah pentakosta (shavout). Perayaan enda awalna pesta panen, ibahan makna si mbaru arah pendahin Kesah Si Badia, jadi wari raya pantekna gereja bagi tertulis i bas Perb. Rasul 2. Setiap keluarga maba persembahenna alu ukur meriah guna pehaga Tuhan Dibata. Buena rikutken pasu-pasu si ibereken Tuhan man banta sekalak-sekalak. Ertina, setiap pribadi (keluarga) pasti la banci ipebali, sebab pasu-pasu Dibata pe berbeda-beda man banta. Si penting palas i bas kita nehken persembahen i bas Kerja Rani e me kap nggejapken pemeliharaan ras pemasu-masun Tuhan i bas geluhta. Maka Tuhan si enggo masu-masu kegeluhenta rikutken usaha ras pendahinta, secara khusus Tuhan masu-masu page (gandum) si enggo sisuan (kontkes bangsa Israel ras kalak Karo si i daerah pertanian).
 
Janah adi sibandingken ras Bil. 28:26-31, maka i je pe icidahken proses pelaksanaan Kerja Rani. Asum Kerja Rani e iendesken perpulungen persembahen gandum si mbaru iperanina janah enda ilakoken i bas sada kebaktin ras la banci kai pe idahiken. Persembahen-persembahen si enggo iaturken (2 jenggi lembu si nguda denga, sada bajar biri-biri, 7 anak biri-biri bajarna umur 1 tahun, persembahen buah gandum si payo i bas tepung nari icampur ras minak saitun, sada bajar kambing jadi persembahen pengalemi dosa ras persembahen anggur jadi tambahan persembahen tutungen). Intina, kerina si nipersembahken e, la lit si man pandangen (si terbaik) ras ngena iakap Tuhan.
 
Adi sipepayo kebaktin i bas Kerja Rani e, maka lit dua hal penting si perlu iperdiateken, si pemena, mpehaga ras mpermuliaken Tuhan arah nehken persembahen si jadi pengataken bujur ras buah kiniteken. Si peduaken, mpeteguhi persadan bangsa e, sabab pulung alu meriah ukur radu ras anak-anak, suruh-suruhen, kalak Lewi, petandang bage pe anak melumang ras diberu mbalu-mbalu.

Versi Audio Silahkan Klik : https://youtu.be/u147BA3JX9U

Pengkenaina

Bagi si enggo tersinget i bas bagin penaruh i datas, Gerejanta GBKP setiap tahun ngelakoken Kerja Rani alu palas teologis nginget perkuah ate Tuhan si mereken keselamaten man banta, enggo itebusi Tuhan dosa-dosanta ras seh asa gundari Tuhan tetap memeliharaken geluhta arah pendahinta si pelain-lain. Tentu patut kita ngataken bujur man Tuhan, la perlu nari terlalu rumit persembahenta bali ras si nilakoken bangsa Israel, sabab Yesus Kristus, Anak domba Allah, enggo mpersembahken diriNa guna nebusi dosa-dosanta. Tentuna i bas si e la ka banci kita meros, tetap si terbaik sibereken rikutken pasu-pasu si enggo ibereken Tuhan man banta. Rasul Paulus i bas suratna man Perp. Korinti (2 Kor. 9:6-9) mpersingetisa i bas nehken persembahen man Tuhan, sekalak-sekalak berekenlah sue ras si enggo itetapkenna i bas ukurna; ola alu pusuh jungut-jungut entah pe bagi si terpaksa, sabab Dibata ngkelengi kalak si mere alu ukur meriah. Keriahen ukurta mere man Tuhan i bas persembahen Kerja Rani erpalasken pasu-pasu si enggo ibereken Dibata man banta sekalak-sekalak. Tetap sipehaga Tuhan, sebab IA ngasup mereken man banta kasakai pemereNa alu sampur. Sue ras padan Yesus i bas Matius 6:33, “Tapi si pentingna kal daramilah lebe kinirajanNa, janah dalankelah si ngena ateNa maka icukupiNa kai si perlu man bandu.” Kai si nipadankenNa, ya ras amin! Nai, gundari ras seh rasa lalap tetap ipasu-pasu Tuhan kegeluhenta.

La pe kita perjuma, pelain-lain enggo dahinta, maka i bas perayaan Kerja Rani enda, tetap siinget identitasta sebage kalak Karo si umumna tading i Tanah Karo, perjuma, ngingetken kita guna mpertahanken Tanah Karo sebage daerah pertanian ras kalak GBKP la ndayaken tanehna guna mpertahanken identitasta si erat berkaiten ras tanah. La pe kita perjuma, tapi nuansa kerja (pesta meriah ukur) tetap banci sicidahken tupung kita ngelakoken Kerja Rani. Rikutken aturen si lit i bas GBKP, salah sada pos keuangen jemaat guna kerina kegiaten persekutuan, kesaksian, diakonia ras biaya operasional gerejanta arah Kerja Rani. 60% tading bas Runggun ras 40% setor ku Moderamen. Alu kita nehken persembahenta termasuk Kerja Rani kita mendukung kerina kegiaten si iaturken Gerejanta sekaligus ndalanken perpadanenta tupung kita ingawanken maka kita nggit nanggung tanggungenta i bas GBKP enda. Sitotoken gelah perdalanen Kerja Rani bas Runggunta erdalen alu mehuli, Tuhan ipehaga ras imuliaken arah persembahenta.

Ogenta sendah ras piga-piga ayat Pustaka Si Badia i bas pembahasen i datas akap kami enggo rusur sibahas baik i bas PA-PA Kategorial bage pe i bas PJJ. Tading sievaluasi enggo seh i ja kinitekenta i bas kita nehken si mehulina man Tuhan? PA Mamre-ta sendah ngajuk kam kerina Mamre gelah tuhu-tuhu nggejapken perkuah ate Dibata i bas kegeluhenndu. Adi lenga sigejapken keleng ate Dibata si mbelin i bas geluhta, enggo pasti asakai pe buena persembahen si isehken kita mberat siakap. Janah rikutken Tata Gereja GBKP Ps. 178, Kerja Rani e me salah sada sumber keuangan GBKP si tujunna guna semakin meningkatken kualitas ras kuantitas pelayanen i bas runggunta masing-masing. Ertina Kerja Rani enggo jadi kesepakaten bersama si harus ilaksanaken i bas runggunta masing-masing. Emaka sue ras tema ras tujun i bas PA-ta sekali enda, iajuk kam kerina Mamre gelah ergiah-giah nehken Kerja Rani alu metunggung. Mari sidukung ras sisuksesken Kerja Rani tahun 2024 enda. Dibata si mpengasup kita kerina.