SUPLEMEN PJJ GBKP TGL. 30 JUNI - 6 JULI 2024

Pdt. Larena br. Sinuhadji (Nd. ReyRapha Tarigan)

JADI USIHEN NANDANGI KERINA JELMA

1 Tesalonika 1:2-10

Penaruh

I bas Konfesi GBKP Bab IX si ngerana kerna Gereja poin pe-3-ken ikataken nina, “Gereja dipanggil untuk melakukan tri-tugas demi mewujudkan jemaat yang misioner.” Misioner ertina ngelakoken misi entah pe sura-sura Dibata nandangi doni enda. I bas ngelakoken misi Dibata, tentu kita harus jadi usihen. I bas PJJ sekali enda radu ras kita mulihi erlajar kerna jadi usihen nandangi kerina jelma erpalasken ogenta sendah.

Mpebagesi Ogen

Tesalonika e me ibukota propinsi Makedoni, jajahen Roma. Rasul Paulus manteki perpulungen i Tesalonika kenca ia nadingken Pilipi. Tapi la ndekahsa kenca si e, minter lit perlawanen i bas kalak Yahudi nari, sabab cian atena ngenehen Paulus si tuhu-tuhu sangap i bas meritaken pengajaren Kristen i tengah-tengah kalak si la Yahudi. Terlebih-lebih, sope si e, kalak enda enggo mulai ipengaruhi agama Yahudi. Emaka Paulus terpaksa nadingken Tesalonika, lawes ku Berea. Kedungenna, kenca seh i kota Korinti, Rasul Paulus ndatken laporen i bas temanna sada dahin Timotius kerna kecibal Perp. Tesalonika.

Kenca enggo ibegina kerna keadaan Perp. Tesalonika maka itulisken Paulus suratna si pemena enda. Secara garis besar surat enda ertujun guna mpegegehi ras petetap ukur kalak Kristen i kota e. Ikataken Paulus bujur sebab ibegina berita si mehuli kerna kiniteken ras kekelengen perpulungen e; isingetken Paulus mulihi man perpulungen e kerna kegeluhenna jine asum ia nggeluh i tengah-tengahna. Janah kenca si e ijababna pengungkunen-pengungkunen si turah i bas perpulungen e kerna kerehen Kristus si peduakaliken. Kesempaten enda ipergunaken Rasul Paulus guna ngajari perpulungen e gelah terus erdahin alu teneng janahna nimai kerehen Kristus alu dem pengarapen.

Si jadi ogenta sendah, ipujiken Paulus Perp. Tesalonika sebab perpulungen e tuhu-tuhu ncidahken buah kinitekenna arah pemberitaan Firman Tuhan si enggo ilumbaken Paulus ndube. Piga-piga hal si nggeluh i bas perpulungen Tesalonika si banci siidah i bas ogenta sendah, si pemena, Perp. Tesalonika tetap ukurna i bas erpengarapen man Tuhan. Aminna melala kiniseran si inanami perpulungen e tapi tetap ialokenna Berita Si Meriah alu sada keriahen si rehna i bas Kesah Si Badia nari (Bdk. Perb. Rasul 17:5-9).

Si peduaken, Perp. Tesalonika ncidahken kinitekenna arah perbahanen, i ja perpulungen enda enggo jadi usihen nandangi kerina kalak si tek si ringan i daerah Makedonia ras Akaya, bahkan ku daerah si deban.

Si peteluken, itadingken perpulungen e sembah-sembahenna, janah isembahna Dibata i bas Yesus alu tutus.

Si peempatken, Perp. Tesalonika si dem alu kekelengen ras kepedulian, i ja sikap i bas ngalo-ngalo Perberita si Meriah. Sada hal si luar biasa i bas kita banci ngalo-ngalo kalak kesilang ku perpulungenta entah jabunta. Enggo pasti adi lit kalak kesilang, lit i je pengorbanen subuk waktu, tenaga, materi, perasaan, rsd.

Si pelimaken, Perp. Tesalonika setia i bas nimai kerehen Yesus peduakaliken alu tetap erbahan si mehuli si ngena ate Dibata.

Versi Audio silahkan klik : https://youtu.be/M2yqBXX0KoM

Pengkenaina

Tema-tema si erkaiten ras marturia entah pe ersaksi kerna berita keselamaten i bas Yesus Kristus akap kami enggo rusur sibahas ras sirenungken. Tema i bas PJJ-ta sekali enda pe ngajuk kita kerina ngawan perpulungen gelah jadi usihen nandangi kerina jelma. Arapen kami tentuna la kita bosan guna terus erlajar kerna ersaksi enda. Arah ogenta jelas maka Perp. Tesalonika amin pe mungkin lenga dekah jadi kalak Kristen, tapi geluhna enggo jadi usihen man kerina jelma si lit i sekelewetna paksa si e. I bas si e tek kita maka perpulungen e ipengasup Kesah Si Badia guna ngelakoken kerina si ngena ate Dibata.

I bas Konfesi GBKP i bas penaruh i datas secara lengkap ikataken nina, “Gereja dipanggil untuk melakukan tri-tugas demi mewujudkan jemaat yang misioner untuk memproklamasikan nilai-nilai Kerajaan Allah yang tampak dalam kehidupan Yesus yaitu: cinta kasih, keberpihakan pada yang miskin, lemah dan terpinggirkan untuk menegakkan kebenaran dan keadilan (Lukas 4:18-19) serta mampu bersikap positif, kreatif, kritis dan realistis terhadap nilai-nilai dunia (Roma 12:2).” Jelas je ikataken maka misi Dibata e me ngelakoken nilai-nilai Kinirajan Dibata e me: keleng ate, mediate nandangi kalak si musil, lemah ras isingkirken, majekken kebenaren ras keadilen, janah labo murah ngaloken kerina si itawarken doni enda, tapi erbahan seleksi secara kritis sue ras peraten Dibata.

Emaka i bas kesempaten enda mari radu ras kita ertekad nggeluh jadi usihen nandangi kerina jelma. Piga-piga hal si harus ilakoken, si pemena, megegeh kita ertoto, erkiteken memang la ngasup kita alu gegehta jadi usihen, harus lit gegeh i bas Kesah Si Badia nari si mpengasup kita nggeluh sue ras si ngena ate Dibata. Si peduaken, megegeh kita erlajar kerna Kata Dibata, sebab Kata Dibata e me ulu kegeluhen kalak si tek. Adi pusuh perukurenta idemi alu Kata Dibata, tentu kita pe termotivasi guna ngelakoken Kata Dibata e i bas geluhta si tep-tep wari. Si peteluken, erlajarlah ngelakoken kerina si ngena ate Dibata i bas geluhta si tep-tep wari, janah nanamilah hasilna. Semakin tutus kita erlajar ngelakoken Kata Dibata semakin tergejap pasu-pasu i bas Dibata nari. Erlajarlah arah hal-hal si sederhana, umpamana, ertoto secara teratur, rukur si positif ras si mehuli, terapkan pola hidup sehat, rsd. Kesah Si Badia si mpengasup kita jadi usihen i tengah-tengah lingkungenta.